Ɛsekeɛl 21 - mzwDBL

Korowii kere pama wa

¹ Korowii bol men Ɛsekeɛl be ŋɔ,

² “Nɛwɛnyini bie, eɡle sie ta Jerusalam tena nɛ, dɛ́ bol ba be ŋɔ, bɔra baa dɛ tom mɛ a ta la aa were. Kah Israel harɛ ta tena ŋɔ,

³ n ne ba dɔɔ. Mɛɛ pamɛ n keree le o tɔɔ ta, dɛ́ kpoo nɛra ba wa aa toɡra ne wechɔɡ-ɛɛra bwa.

⁴ Mɛɛ pamɛ n keree dɛ́ kpoo nɛra baa lɔ weekaŋle harɛbɔr ne weekaŋle nyunduabɔr bwa.

⁵ Anee dɛ́ ɡel nɛra jemɛ kɛŋɔ men Korowii, n pamɛ n kere aa, maa berɛ kpɔ su o tɔɔ ta kpa.

⁶ Anomanta, Nɛwɛnyini bie, ɡel he bambile chɔɡ he loo ku kohona hɛɛ hime, ásɛ nɛra bwa nae.

⁷ Dɛ ba bɔɔre ŋɔ, ‘Ɛrɛɛ he bambile chɔɡ hɛɛ hime kohona naa’, ŋɔ ba be ŋɔ, ‘Waa a taa lɔ sie dɛɛ ba bala waa. Ɔmee ɛɛ lawɛ nomɛlbwa kohonaa ba bwara ɛɛ sa, ba bambile chɔɡ, ba bwara yɔr.’ A dɛ ba bala. Aa bao ɡe. Men Nemenɛ Korowiirii bola.”

⁸ Korowii berɔ bol waa n be dɛ ŋɔ,

⁹ “Nɛwɛnyini bie, bol waa aa dɛ ba bala dɛ́ ŋɔ, kenii mɛɛ bol, ‘N sar n kere o do nyɛɡre, asɛ wɛɛ nyɛɡle.

¹⁰ N saro dɛ́ kpɔ kpo. O dɛ nyɛɡle kɛŋɔ bwaala nyɛɡla ken! Silɛɛ bɛlbwa aa n nɛra nɛɛ doe ba, dɛkalkɛ ba ta kaeh maa kah ba la ne n deŋnetɛra la ɔmɛ.

¹¹ N fee kere la wɛɛ nyɛɡle, ásɛ dɛ pa mun ɛ o ne toma. N saro kɛrɛdɛ wɛɛ nyɛɡle dɛ́ kpɔ do nɛn waa kpɔ kpoo nɛra la nɔn ta.

¹² Nɛwɛnyini bie, wi dɛɛ dooɡe lɔŋɔre, dɛkalkɛ n nɛra ne Israel koranar waa wɛɛ ba. Wɛɛ kpoo ba ne n nɛra kar bwaa. Kpɔ nɔɔra lɔ bambile á baɡle kɛŋɔ he hwɛɡa tonɔ.

¹³ N kpɔ ɡɛ waa nɔ daah ba, dɛ́ na kɛŋɔ dɛ ba ta ba liire charaa, ásɛ ɡɛ waa nɔ ba ba nɛ. Men Nemenɛ Korowiirii bola.

¹⁴ Nɛwɛnyini bie, bol waa aa dɛ ba bala n sɔn ta, dɛ́ lɔ kpaŋa sibeɡra ne. Gel kere la ŋwɛnɛ keraanɛ, ó ŋwɛnɛ keraatoro kwara. O ɛ kere waa do ɔma dɛ́ won kpo.

¹⁵ O ɡelɔ ɔmee le n nɛra nɛɛ kohona ba choɡli. N kpɔ kere waa dɛ nyɛɡle kɛŋɔ bwaala la, dɛɛ aah ba ba bwɛjena doonyoo, dɛɛ ba ba kpoora.

¹⁶ Kere haa nyɛɡa, mɔn ɡal ne diɡ bwa. Mɔn bobɛlbwa haa berɛ!

¹⁷ N ɡe ɛɛ lɔ kpaŋaa, ásɛ n bandia la nyoa sɔɔh. Men Korowiirii bola.’ ”

¹⁸ Korowii bol waa men Ɛsekeɛl be ŋɔ,

¹⁹ “Nɛwɛnyini bie, bil ŋwɛnɛre anɛ ásɛ Babelɔn kooro kpɔ o kere kpɔ a ta ba. A ɛ ŋwɛnɛre aa le harɛ beŋkpoŋ ta, dɛ́ pa daa o baɡle bela ŋwɛnɛre anɛ la aa pera kaa.

²⁰ Ŋwɛnɛ la beŋkpoŋ ɛɛ chaɡle kooro la ŋwɛnɛ waa kpɔ o ta dɛ kaa Amɔn tena bwɛjen Raba la ta, ásɛ bɛl ɡe kaa Juda harɛ, Jerusalam bwɛjen baa ma danjwɛɛ baro la ta.

²¹ Babelɔn kooro cheɡɛ ŋwɛnɛ chɛchɛre la ta, dɛ kpɔ o hɛma bil daa, dɛ́ jemɛ ŋwɛnɛ waa kpɔ o ta. O kpɔ o voɡa bil dɛ kpɔ kondɛɛre waa kpoa pwɛ dɛɛ nyiŋi o ta.

²² O kpoŋe hɛm o nɔndiɡ ta dɛɛ ba tae do Jerusalam. A dɛ chaɡle kɛŋɔ o dɛ ba dajaŋa kpɔe ba teɡli doonyojena la ta, dɛ do laa lɔŋɔ, dɛ kwi sɔɔhbɔra bɔɔne, dɛ ma kon baa che o ta dɛ́ jo bwɛɛ la ta dɛ́ kpoo ba.

²³ Jerusalam tena noɔ waa baa yarada, fɔo ba ne kooro la aa fɔwa la wa. Kɛ aa ɡeloo ba lii ba wechɔɡa baa ɛa, ásɛ ba laɡ ba laa ta.

²⁴ Anomanta, men Nemenɛ Korowii ŋɔ, ‘He wechɔɡa haa ɛa bwa chɔ baŋ. Nomɛlbwa naa dɛ na ɡɛ haa bera do ɡe bwa. Ba pa heyaa bolchɔɡe wobɛlbwa ta. Baa lawɛ heyaa laa taa dɛ́ kaa he ne.

²⁵ Kooro haa dɛ nyiŋi Israel nɛɛ dɛ ɛ nyubinikpeɡ te kohona, he tɔpere baa tɛr he deŋne la telo tonɛ.

²⁶ Men Nemenɛ Korowii dɛ ŋɔ he be ŋɔ hé laa he kooɡbɛrɛ la pili dɛ́ laa yal haa kpɔa vɔwɛ nyu la kpɔ. Wobɛlbwa aa ɡɛ aa doa laanee do kpa. Dansaara ɛɛ di koraa, ásɛ koranar berɛ dansaara.

²⁷ Mɛɛ chɔɡ bwɛjen laanee, dɛ́ chɔɡo chɔɡa ɡbaɡba! Kɛ wɛɛ do lee ka tel kɛŋɔ nɛn maa leo ŋɔ ó ba tɛr o bini nɛra deŋne aa ba, mɔɔ ń kpɔɔ do o nɔn ta.’ ”

²⁸ Anomanta, Nemenɛ Korowii ŋɔ men Ɛsekeɛl be ŋɔ, “Nɛwɛnyini bie, bol waa aa dɛ ba Amɔn tena baa dɛ chɛɡre Israel tena nɛɛ bala dɛ́ ŋɔ, ‘Ba pamɛ kere dɛ́ ba kpoo nɛra. Ba saro, ásɛ o do nyɛɡre dɛɛ nyɛɡle kɛŋɔ bwaala ken.

²⁹ Amɔn tena, he wepila haa dɛ naa, ne waa haa ŋɔa aa bao la bwa ɛ nyosone. He ɛ nɛnchɔɡa, he nyu bini kpeɡri. He tɔpere telo, he deŋnetɛra tɔpere la telo tonɛ.

³⁰ Hé berɛ kpɔ kere la su o tɔɔ ta. Hé berɛ kaa harɛ baa lolɛ o ta he naawa bwɛ, belaa mɛɛ ba he deŋne tɛra.

³¹ Mɛɛ kpɔ n banfuih ba ta he nɛ, dɛ́ kpɔ heyaa do nyubinikpeɡ tena baa won kwaa chɔɡa kohona nɔn ta.

³² Niinii mɛɛ ba kpɔe fuh heya. He ɡbaɡba harɛ taa hɛɛ ba serewa, baa wola he waa lii kpa. Men Korowiirii bola.’ ”