Ɛsekeɛl 20 - mzwDBL

Israel tena deŋnekpeɡ wa

¹ Gɛ saŋ baa lawɛ yaa laa ta kaa Babelɔn bene anuanɛ, korobie anue tɔpera fi ta la, Israel nomonome la bane balɔ, dɛ ba so men Ɛsekeɛl sie dɛɛ nyin dɛ́ jemɛ waa aa le Korowii be.

² Belaa Korowii bol waa n be ŋɔ,

³ “Nɛwɛnyini bie, ŋɔ Israel nomonome la be kɛŋɔ men Nemenɛ Korowii ŋɔ, ‘He balɔ dɛ́ ba bɔɔ dɛ́ na waa aa le n be kɛɛ? N ŋwɛɛrɔ kɛŋɔ maa lole saŋ bɛlbwa nɔ, maa ɡel he pɛɛ mɛ wobɛlbwa. Men Nemenɛ Korowiirii bola.’

⁴ Nɛwɛnyini bie, he dɛ nyin kɛ he pa ba bolchɔɡe kɛɛ? Ate, lii ba ba naawa kii waa baa ɛa la wa

⁵ dɛ́ ŋɔ Israel tena be ŋɔ men Nemenɛ Korowii bolɔ ŋɔ, ‘Awola maa le Israel tena tɛ n te la, n ir nɔn dɛ ŋwɛɛ baɡle Jekɔb naanar, dɛ kpɔ n te baɡ ba Ijipt harɛ ta kɛ menee Korowii baa dɛ tom mɛ la.

⁶ N berɔ ŋwɛɛ baɡ ba kɛŋɔ mɛɛ kpɔ baa le Ijipt harɛ ta ba harɛ maa nyina cheɡ ba ta, o ɛ harɛpare ondɛɛɡe ɡwaa harɛre bwa.

⁷ N ŋɔ bá pa ba voɡa maa kia la ta, ba bɛ Ijipt harɛ ta voɡa nɛɛ teŋɛ, dɛ́ kpɔ doŋa kah ba te. Menee Korowii baa dɛ tom mɛ.’

⁸ Kɛ Israel tena ɛɛ mɛ deŋnekpeɡ, baa n waa no, ba ta voɡa la pae ta, ba ta Ijipt tena voɡare maa kia la ɡe ta leɛ. Anomanta, n ŋɔ mɛɛ kpɔ n bandiaa ba ta ba nɛɛ Ijipt harɛ ta.

⁹ Gɛ aa ɛ ásɛ harɛre baa soɡe a ta nɛra bɛ n sɔnchɔɡe yerɛ ŋɔ n bolɔ ŋɔ, mɛɛ lawɛ Israel tenaa le Ijipt harɛ ta nomanta, n ta ɡɛ ɛɛ.

¹⁰ Ate, n tɔ ba sie dɛ le ba ne Ijipt harɛ ta, dɛ ba bane pua hɛŋle ɡbo harɛ ta.

¹¹ N kpɔ n waa tɛɛ ba dɛ baɡ ba me Mmarare, ásɛ nomɛlbwa waa teŋɛ a ta la, ó dɔ mkpa.

¹² N ŋɔ baa di Ona Tɔpera la a ɛ fɔo dɛ́ chɔ n ne ba baah, dɛ́ lii kɛŋɔ men Korowiirii ɛɛ ba ba do ɡoroŋ.

¹³ Kɛ ane a bwa, ba ɛɛ mɛ deŋnekpeɡ pua hɛŋle ɡbo harɛ ta bela. Ba ta n waa ta teŋɛ, dɛ vɛh me Mmarare nomɛlbwa fe aa teŋɛ a ta ásɛ dɛ fe dɔ mkpa la. Ba chɔɡ Ona Tɔpera la. Anomanta, n ŋɔ mɛɛ kpɔ n bandia ba ta ba nɛɛ kohona, dɛ́ chɔɡ ba bwa pua hɛŋle ɡbo harɛ ta bela.

¹⁴ Kɛ maa dɛ nyin n sɔndɛɛɡe nomanta, n ɡelɔ ásɛ harɛre ta nɛra baa lɔ bela dɛ na kɛŋɔ, n laɡ ba le Ijipt harɛ ta la bɛ n sɔnchɔɡe yerɛ.

¹⁵ N berɔ ir nɔn pua hɛŋle ɡbo harɛ ta bela, dɛ ŋwɛɛ baɡ ba kɛŋɔ, maa ban kpɔ ba harɛ maa kpɔa tɛɛ ba la ta, harɛpare ondɛɛɡe dɛ ɡwaa harɛ bɛlbwa,

¹⁶ dɛkalkɛŋɔ, ba vɛh me Mmarare, ba ta n waa ta teŋɛ, dɛ chɔɡ Ona Tɔpera la. Ba liire bwa lɔ ba voɡare ta.

¹⁷ N na ba sum, n ta ban chɔɡɛ kɛɛ dɛ kpoo ba pua hɛŋle ɡbo harɛ ta bela.

¹⁸ N bol ba bii be pua hɛŋle ɡbo harɛ ta bela ŋɔ, ‘Hé nyiŋi kɛrɛdɛ dɛ bɛ he naawa we-ɛɛla kɛɛ mmarare kɛɛ ba voɡa nɛɛ teŋɛ, dɛ́ kpɔ doŋa kah he te.

¹⁹ Menee Korowii haa dɛ tom mɛ la, hɛɛ teŋɛ n waa ne me Mmarare maa kpɔa tɛ heyaa la ta kɛrɛdɛ.

²⁰ Hɛ́ɛ di n Ona Tɔpera la, dɛ́ ɡel a do ɡoroŋ, ásɛ a ɛ waa dɛ chɔ n ne he baah ta. Anee dɛ́ ɡel he jemɛ kɛŋɔ menee Korowii haa dɛ tom mɛ la.’

²¹ Ba bii la ɡe ɛɛ mɛ deŋnekpeɡ. Bɛlbwa ta n waa ne me Mmarare la ta teŋɛ kɛrɛdɛ, a lole kɛŋɔ anee fe dɛ́ ɡel ba dɔ mkpa. Ba chɔɡ n Ona Tɔpera la. Asɛ n ŋɔ mɛɛ kpɔ n bandia kohonaa ba ta ba nɛ pua hɛŋle ɡbo harɛ ta bela, dɛ́ tɛr ba deŋne.

²² Ate, n berɛ lawɛ bambile, dɛkalkɛ aa chɔɡ n sɔnee harɛre nɛra baa naa n lawɛ Israel tena le Ijipt harɛ ta, ba siwi ta la.

²³ N berɔ ir nɔn, dɛ ŋwɛɛ baɡ ba pua hɛŋle ɡbo harɛ ta bela kɛŋɔ, mɛɛ lɔ baa peɡre harɛ nɔ ta bwa,

²⁴ dɛkalkɛ ba vɛh n wa, ne me Mmarare maa kpɔa tɛɛ ba la ta teŋa, dɛ chɔɡ n Ona Tɔpera la, dɛ tomɛ voɡa la tenten ba naawa aa toma la.

²⁵ N ɡelɔ baa ɛ waa aa wola ban cha, dɛ tɛɛ ba mmarare aa wola ɡel ba dɔ mkpa.

²⁶ N ɡelɔ ba kpɔ ba bibanloɡla ɛ sarahare dɛ kah doŋa, n ɛ ɡɛ dɛ kpɔ ɔmee kohona ta ba nɛɛ ba chel, ásɛ ba jemɛ kɛŋɔ menee Korowii.”

²⁷ Nemenɛ Korowii berɔ ŋɔ men Ɛsekeɛl be ŋɔ “Nɛwɛnyini bie, berɛ ŋɔ Israel tena be kɛŋɔ, anɔ ɡe taa ba naawa ɛɛ mɛ nɛnhɛlwa dɛ le n habɔɔ.

²⁸ N laɡ ba ba harɛ maa ŋwɛɛra ŋɔ mɛɛ kpɔɔ tɛɛ ba la ta. Ba baa na deŋɡarejaŋa ne dajena aa dɔ papooni kohona dɛ ka ɛ sarahare bela. N baah di daawiile baa fuah a sɔɔh do som, ne sen sarahare baa ɛa tɛ voɡa la ta.

²⁹ Ate, n bɔɔ ba ŋɔ, ‘Bɔkwaa he kaa ɛ deŋɡarejena nɔ ta bela ɔ?’ Ba dɛ yerɛ bela ‘Bama’ ba le fini.

³⁰ Nɛwɛnyini bie, bol Israel tena la be ŋɔ Men Nemenɛ Korowii ŋɔ, ‘He ɡee ɛ wechɔɡa he naawa aa ɛa, dɛ tomɛ voɡa maa kia, dɛ kpɔ doŋa kah ba te la anee kɛɛ?

³¹ Ba le fini, he ta lawɛ he bii kaa ɛ sarahare voɡa la ta baa fuuh ba, dɛ kpɔ doŋa dɛɛ kah he te. He ta teŋɔ dɛɛ nyin waa dɛ́ no le n be. N ŋwɛɛrɔ kɛŋɔ Men Nemenɛ Korowii taa lole nɔ, maa ɡel he pɛɛ wobɛlbwa le n be.

³² He ɛ he liire kɛŋɔ he fee do ɡɛ harɛre nɛra bane aa doa, dɛɛ tomɛ voɡa baa kpɔ daa ne bwea ɛa. Aa ɡɛɛ maɡre.

³³ Men Nemenɛ Korowii, n ŋwɛɛrɔ kɛŋɔ n taa lole nɔ, mɛɛ che n kpeɡri taa dɛ́ ir nɔn tɛr he deŋne n bandia ne,

³⁴ dɛ́ lawɛ heyaa le harɛre haa peɡra dɛ ka so a ta la ta, dɛ́ berɛ ba he ne.

³⁵ Mɛɛ ba he ne pua hɛŋle ɡbo harɛ harɛre aa baro la taa, n ne he sie ɡba dɔŋa, ń bol he waa dɛ́ tɛr he deŋne.

³⁶ Gɛ maa bol he naawa wa dɛ pa ba bole Sinai pua hɛŋle ɡbo harɛ ta la, ɡɛɛ mɛɛ ba heyaa ɛɛ. Men Nemenɛ Korowiirii bola.

³⁷ Mɛɛ do sie he bee kɛrɛdɛ, ásɛ hɛɛ teŋɛ fɔo waa chɔ n ne he baah ta la.

³⁸ Mɛɛ lawɛ deŋnekpeɡ tena baa lɔ he bini nɔɔ le bela baa soɡa taraken nɔ. Maa ɡel ba naa tire Israel harɛ. Ásɛ he jemɛ kɛŋɔ menee Korowii.’ ”

³⁹ Nemenɛ Korowii ŋɔ, “Israel tena, hé dɛ nyin kaala ka tomɛ he voɡare aa, hé kaa. Kɛ n dɛ ŋɔ he be ŋɔ a habɔɔ la, hɛɛ baa teŋɛ n waa taa dɛ́ ɡel sarahare ka ɛɛ he voɡare ta, dɛɛ chɔɡ n sɔn waa do ɡoroŋ, dɛɛ duu mɛ.

⁴⁰ Saayɔn Bwejen waa do ɡoroŋ dɛ do Jerusalam la taa he Israel tena la bwa ɛɛ ba men toma. Belaa mɛɛ ba he saraha kwaa aa do ɡoroŋ, ne anɔ la aa le he bambile ta he kpɔ dɛɛ ba ba tɛ mɛ la lɛɛ. Men Korowiirii bola.

⁴¹ Mɛɛ lɛ heyaa kɛŋɔ daawiile a sɔɔh aa soma he yon kpɔ ɛ saraha dɛɛ tɛ mɛ la, mɛɛ boa he nyoa le harɛre haa peɡra kaa a ta la, ásɛ harɛre nɛra na kɛŋɔ n do ɡoroŋ.

⁴² Maa ba he ne Israel harɛ ta la, anee hɛɛ ba jema kɛŋɔ menee Korowii haa dɛ tom mɛ la, harɛ maa ir nɔn dɛ ŋwɛɛ ŋɔ mɛɛ kpɔɔ tɛ he naawa la.

⁴³ Belaa hɛɛ ba we-ɛɛla ne liire aa ɡela he kpɔ he te kah doŋa la nae, ásɛ he hah he ɡbaɡba kɛŋɔ haa ɛ a ɡɛ wedoŋa nɔ la.

⁴⁴ N koh n sɔndɛɛɡe waa dɛ ɛ waane aa, hɛɛ jemɔɔ kɛŋɔ menee Korowii, dɛkalkɛ maa heyaa ɛ ɡɛ aa chɛ kɛŋɔ bá ɛ wechɔɡ-ɛɛra. Men Nemenɛ Korowiirii bola dɛɛ baɡle he Israel tena bwa.”

Korowii bol weekaŋle harɛbɔr tena chɔɡa wa

⁴⁵ Korowii berɔ ŋɔ men Ɛsekeɛl be ŋɔ,

⁴⁶ “Nɛwɛnyini bie, kpɔ sie pa weekaŋle harɛbɔr dɛ́ bol waa aa dɛ ba kɔr la ta bala.

⁴⁷ Bol kɔr la be ŋɔ men Nemenɛ Korowii ŋɔ, ‘Cheɡ deŋne dɛ no! N dɛ ba ɡela nii ba fuih, ásɛ dɛ chɔɡ he daa bwa, anɔ la aa hola ne anlwɛɛne bwa. Nomɛlbwa toole dɛ́ won dime nii la. Aa le weekaŋle harɛbɔree dɛ́ fuh ba kaa weekaŋle nyunduabɔr, ásɛ a nyaa nomɛlbwa.

⁴⁸ Nomɛlbwa ɛɛ nao kɛŋɔ men Korowiirii do nii la, bɛlbwa aa wola won dima bwa.’ ”

⁴⁹ Belaa men Ɛsekeɛl ŋɔ, “Nemenɛ Korowii, ba dɛ bol n waa ŋɔ baa waa maa dɛ bol nɔ mun no, a do kɛŋɔ molbie.”