Ɛsekeɛl 19 - mzwDBL

Suna dii yel

¹ Korowii ŋɔ men Ɛsekeɛl be ŋɔ, “Go suna dii yel nɔ tɛ Israel koranar banɛ

² dɛ ŋɔ, ‘Na ɡɛ he nya aa do kɛŋɔ nyujente nee! O dɛɛ o bii nyujentena ambala aa do ɔma baah.

³ O dɛɛ bii la bɛl o kpeɡ, dɛ baɡlo kpaahna, o lawɛ nɛra dɛɛ chwe.

⁴ Harɛre ta nɛra no o wa, dɛ harɔ bel a bɔɔ bini dɛ lawɔ. Ba doo kwaa kɛŋɔ ɡoŋa dɛ tɛɡro kaa Ijipt harɛ ta.

⁵ O nya la nyiŋu ŋwɛnɛ, o hwɛɡa bwa tonɛ. Ate, o berɛ dɛɛ bii la bɛl ja o kpeɡ dɛ do ɔma.

⁶ Waa baa kpeɡ la, o pu o bala o ne aa valɛ dɛ hweli kpaahna, dɛ ɡe lawɛ nɛra dɛɛ chwe.

⁷ O kuuɡi ba dekpeɡa dɛ chɔɡ ba bwɛɛre. O sio waa, dɛ ɔmee kohona chole harɛ la ta nɛra nɛ.

⁸ Belaa harɛre nɛra pɛ dɛ ba yoo. Nɛra le bobɛlbwa dɛ ta ba asauri baro dɛ lawɔ.

⁹ Ba kpɔ ɡoŋa lawɔ, dɛ doo buo bini ka tɛ Babelɔn kooro. Ba doo dea, baa o sii no Israel deŋɡarere ta kpa.

¹⁰ He nya fa do kɛŋɔ ɡrepo daa dɛ che nee nyoa. Nee aa lɔ bela kohona nomanta, o dɔ papooni kɛrɛdɛ dɛ won nɔna ɡe.

¹¹ O kpala kpeɡri dɛ do wer kɛ bá kpɔ ɛ kooro daŋɡbala. O kpeɡo tɛr kaa nyundua baama bini, nɛra na ɡɛ waa kpeɡa dɛ dɔ papooni kohona.

¹² Ba baah di o nɛɛ kohona, dɛ huɡru ɡo. Wee leebɔr peuwɔb tao dɛ ɡel o kpala la ne o nɔna la hol, nii fuh a bwa.

¹³ Taraken, pua hɛŋle ɡbo harɛ taa ba ka chɔɔro, harɛ waa hola nee aa wola toole o ta.

¹⁴ Nii le o kpale la bɛl ta dɛ fuh o ne o nɔna la bwa. Daa la kpale bɛlbwa toole dɛ do kpeɡri bá kpɔ ɛ koodaŋɡbala kpa.’ Wii aa chɛ kɛŋɔ bá wi laanee la.”