Ɛsekeɛl 18 - mzwDBL

Nɛn waa ɛ wechɔɡa laanee dɛ́ sewɛ

¹ Korowii ŋɔ men Ɛsekeɛl be ŋɔ,

² “Ɛrɛɛ hɛɛ lii sɛɡla haa dɛ sɛɡle Israel harɛ ta ŋɔ, ‘Nya ne mɛɛ di ɡrepo nɔnnyɛɡa, asɛ ba bii nyena nyɛɡ nɔɔ?’ ”

³ Nemenɛ Korowii ŋɔ, “N ŋwɛɛrɔ kɛŋɔ n taa lole nɔ, haa ɡɛ sɛɡla nɔɔ sɛɡle Israel harɛ ta kpa.

⁴ Nɛwɛnyina bwa nyu lɔ n nɔn ta, mɛɛ kɛɛ bie bwa nyu lɔ n nɔn ta. Naate waa ɛ wechɔɡa la, naatee dɛ́ sewɛ.

⁵ Dɛ nomɛl we-ɛɛla toɡrɔ wɛɛ ɛ waa aa dɔ kasinteŋ o waa do wer,

⁶ waa kwaa Israel tena aa kpoora dɛɛ tɛ ba voɡa bwejena dor la di, waa ba voɡa ɡe tomɛ, kɛɛ waa o dɔŋ haah lawɛ dɛɛ chɔ, waa haah waa le dahara nyin,

⁷ waa nomɛlbwa fiiɡi, o berɛ nomɛlbwa kon waa lɛa cheɡ mɔɔ dɛ kemɔ suuɡa la dɛɛ tɛo. Waa ŋwɛ, lɔr dɛ kpo nɛn aa, o dɛ tɛo kwaa wɛɛ di, nomɛlbwa waa wola yal dɔe la, o dɛ tɛo.

⁸ Waa suuɡa kemɛ dɛɛ lɛ a nee dɛɛ ja. Waa wechɔɡa ɛ, o dɛ bol kasinteŋ nɛn ne o dɔŋ baah waa ta.

⁹ Nɛn waa do ɡɛ nɔɔ dɛɛ teŋɛ me Mmarare ta kɛrɛdɛ. O waa toɡrɔ, wɛɛ dɔ o nyuu kɛrɛdɛ. Men Nemenɛ Korowiirii bola.

¹⁰ Dɛ nɛn o wa aa toɡra dɔ bichɔɡe wɛɛ kpoo nɛra, kɛɛ wɛɛ ɛ a ɡɛ waa nɔ bini bɛlbwa

¹¹ o mɛɛ aa wola ane ɛɛ ka, kɛ o te ɛɛ di kwaa baa kpoora voɡare ta bwejena dor, dɛ lawɛ o bala haahna dɛɛ chɔ,

¹² dɛɛ faah nyaara, dɛɛ ŋwɛ. O kemɛ nɛn suuɡa dɛ lɛ kon cheɡ naate ta kem la ba bɔe yaa. Waa naate kon kpɔe dɛɛ tɛo. O dɛ tomɛ voɡa maa kia la.

¹³ O kemɛ o dɔŋ suuɡa aa, o dɛ lɛ a nee aa ɡwaa. A chɛ kɛ a ɡɛ nɛn nɔ so harɛ nɔ ta naa? Akai! O dɛ ɛ waa baa kia nɔ bwa, a chɛ kɛŋɔ á ɡure o nyu ta, bá kpoo.

¹⁴ Dɛ a ɡɛ nɛnchɔɡe nɔ dɔ bie, o na wechɔɡa o mɛɛ aa dɛ ɛ bwa, dɛ ɔmɛ o ta ɡɛ ɛɛ.

¹⁵ Waa kwaa Israel tena aa dɛ kpoora dɛɛ tɛ ba voɡa bwejena dor la di, kɛɛ dɛɛ tomɛ voɡa. Waa o dɔŋ haah lawɛ dɛɛ chɔ,

¹⁶ kɛɛ waa nomɛlbwa fiiɡi, o kemɛ nɛn suuɡa aa waa kon lɛɛ dɛɛ cheɡ o buɡ ta. Waa ŋwɛ, o dɛ tɛ nɛn lɔr aa dɛ kpoo kondikwa, dɛɛ tɔ nɛn waa wola yal dɔe yal.

¹⁷ Waa wechɔɡa ɛ, o kemɛ nɛn suuɡa aa, waa a nee lɛ. O dɛ teŋɛ me Mmarare bwa ta. O mɛɛ wechɔɡa la aa won ɡel o dɔ seo, wɛɛ dɔ o nyuu kɛrɛdɛ.

¹⁸ O mɛɛ te, o ɛɡre o bala dɛ lɛ ba kwa, dɛ ɛ o nɛra wechɔɡa, wɛɛ sewɔɔ.

¹⁹ He dɛ bɔɔ ŋɔ, ‘Ɛrɛɛ aa wola chɛɛ kɛŋɔ bie dɔ deŋnetɛra o mɛɛ wechɔɡa waɔ?’ Bie la waa toɡrɔ dɛ do wer, o teŋɛ me Mmarare la ta kɛrɛdɛ ken, anomanta, wɛɛ dɔ o nyuu kɛrɛdɛ.

²⁰ Naate waa dɛ ɛ wechɔɡa laanee dɛɛ sewɛ. Bie ta chɛ kɛ ó na wa o mɛɛ wechɔɡa wa, mɛɛ ɡe ta chɛ kɛ ó na wa o bie wechɔɡa wa. Nomɛlbwa o waa aa toɡra wɛɛ ɛ wedɛɛɡa dɛ́ dɔ andɛɛɡa, nomɛlbwa waa dɛ ɛ wechɔɡa ɡe, wechɔɡaa dɛɛ teŋɛ o nɛ.

²¹ Kɛ dɛ wechɔɡ-ɛɛ ɡel wechɔɡa waa ɛa, dɛɛ teŋɛ me Mmarare bwa ta, dɛɛ ɛ anɔ la aa toɡra dɛ do wer aa, wɛɛ dɔ o nyuu kɛrɛdɛ, waa sewɛ.

²² Mɛɛ kpɔ naate wechɔɡa bwaa kɛo, maa an lii kpa, dɛkalkɛ o waa toɡrɔ. Wɛɛ so lee, waa sewa ba.

²³ He dɛ lii kɛ n sie dɛ lɛ wechɔɡ-ɛɛ seo ta kɛɛ? Akai, n sie aa a ta lɛ. Ó le o wechɔɡa ta, dɛ́ dɔ o nyuu mɛɛ nyin.

²⁴ Dɛ nɛn o wa aa toɡra le o wedɛɛɡa ɛɛ ta, dɛ ka ɛ wechɔɡa ne waa maa kia wechɔɡ-ɛɛra ɛɛ ɛa la aa, wɛɛ dɔ o nyuu yaa? Maa o wedɛɛɡa waa ɛa wubwa la bɛlbwaa lii. O kasinteŋ bɛ dɔe ne wechɔɡa waa ɛa la taa wɛɛ ba sewa.

²⁵ Kɛ he dɛ bol ŋɔ, men Korowii waa ta toɡrɛ. Israel tena, hé no, he dɛ lii kɛŋɔ men Korowii n waa ta toɡrɛ kɛɛ? He waa laa wola toɡraa?

²⁶ Dɛ nɛn o wa aa toɡra le wedɛɛɡa ɛɛ ta dɛ ka ɛ wechɔɡa aa, wɛɛ sewɔɔ. O wechɔɡa waa ɛa la waa wɛɛ ba sewa.

²⁷ Kɛ dɛ wechɔɡ-ɛɛ charɛ o liire le wechɔɡa waa ɛa ta, dɛɛ ɛ anɔ la aa wera dɛ toɡre aa, wɛɛ dɔ o nyuu.

²⁸ O na wechɔɡa waa ɛa dɛ le a ta, wɛɛ dɔ o nyuu kɛrɛdɛ, waa wola sewɛ.

²⁹ Kɛ he Israel tena dɛ bol ŋɔ, ‘Men Korowii ŋwɛnɛ ta toɡrɛ.’ He ŋwɛnɛree wola toɡrɛ.

³⁰ Anomanta, he Israel tena, mɛɛ bol he waa beŋkpoŋa beŋkpoŋaa ɡɛ haa ɛa. Hé charɛ he liire le he wechɔɡa bwa ta, dɛ bɛ naa a ta lɔ. Men Nemenɛ Korowiirii bola.

³¹ Hé laa he te kpɔ wechɔɡa bɛlbwa ta, dɛ́ dɔ bambidɛɛɡe ne liifala dɛɛ teŋɛ n waa ta. Israel tena, ɛrɛɛ hɛɛ nyin kɛ he serewe nɔɔ?

³² N sie aa lɛ kɛ nomɛlbwa sewɛ. Hé charɛ he liire, ásɛ dɛ dɔ he nyu! Men Nemenɛ Korowiirii bola.”