Ɛsekeɛl 17 - mzwDBL

Kee anɛ ne ɡrepo da sɛɡla wa

¹ Korowii ŋɔ men Ɛsekeɛl be ŋɔ,

² “Nɛwɛnyini bie, ka sɛɡle Israel tena

³ dɛ ɡel ba jemɛ kɛ men Nemenɛ Korowii ŋɔ, ‘Keejen bɛl o kena aa kpeɡa, o pona do jaŋne dɛ do wer iro ba Lɛbanɔn, dɛ ba lawɛ peleme daa kpale waa pama kaa nyundua

⁴ dɛ kuu, dɛ kpɔ kaa bonadiire harɛ ta dɛ ka chɔɔro o bwɛjen bɛl ta.

⁵ O kpɔ Israel harɛ ta konduuli bii ka du harɛdɛɛɡe bɛl ta. O duu kɛŋɔ nee nyoa da, bela nee aa lole kohona.

⁶ O leɔ dɛ pi harɛ kɛŋɔ ɡrepo da. O kpala la kaa nyundua dɛ chaɡɛ kee la nɛ, asɛ o lune te kaa harɛ bini. O ta kpala dɛ moɡɛ papooni.

⁷ Dɛ keejen bɛl ɡe lole o kena do kpeɡri, o pona jaŋne dɛ do wer. Grepo daa la lune tɛrɔ kpɔ harɛ bini kaa kee la be, dɛ berɛ tɛr o kpala ɡe kaa o be dɛɛ lii kɛŋɔ wɛɛ dɔ nee le o be.

⁸ Harɛdɛɛɡe taa ba duu, o che bela nee aa lole kohona, ó won ta kpala dɛ nɔnɛ dɛ́ do wer kɛrɛdɛ.’

⁹ Bɔɔ ba ŋɔ men Nemenɛ Korowii ŋɔ, ‘Grepo daa la ɛɛ won kpeɡ kɛrɛdɛ aa? Kee waa tɔ sie la aa on fuɡri ta, dɛ chaa o nɔna, dɛ kuuɡi o kpala o bwa hol aa? A ta bokpeɡa kohona kɛɛ nɛra baa wara hiaih mɔɔ dɛ fuɡru ta.

¹⁰ Hale ba fuɡru ka chɔɔ bofale aa, wɛɛ won kpeɡ dɛ́ do wer ja aa? Dɛ wee leebɔr peuwɔb tao waa, wɛɛ sewɔɔ dɛ den hol che harɛ la ta bela.’ ”

¹¹ Korowii ŋɔ men Ɛsekeɛl be ŋɔ,

¹² “Bɔɔ deŋnekpeɡ tena la ba baɡle sɛɡla la mun.” Ŋɔ ba be ŋɔ, “Babelɔn kooro la Jerusalam, dɛ ka lawɛ bela kooro ne o nomonjena, dɛ kaa ba ne Babelɔn.

¹³ O lawɛ koodem nɛra la bɛl o ne o fɔwɛ fɔo, asɛ Babelɔn kooro ŋwɛɛ baɡlo, dɛ berɛ lawɛ nomonome baa chɔ harɛ la nyoa ɡe ja kaa,

¹⁴ ɡɛ aa ɛ ásɛ harɛ la mule, dɛ bɛ won kaa sie kpa, ásɛ a che o ne o fɔo la ɡbo ta mɔɔ ó berɛ won che.

¹⁵ Kɛ Juda kooro la ɛ deŋnekpeɡ dɛ ŋɔ waa won do Babelɔn kooro lɔɡa, asɛ o tomɛ toroma Ijipt harɛ ba ka kpɔ jaɡre ne laa tena baa wara ba. Aa won maɡre tɛo waa? Wɛɛ won le a nyoa aa? Wɛɛ won chɔɡ o ne o baah fɔo la waa wola deŋnetɛraa dɔ aa?

¹⁶ Men Nemenɛ Korowii taa lole nɔ, n ŋwɛɛrɔ kɛŋɔ, Babelɔn belaa Jerusalam kooro Babelɔn kooro aa cheɡo kora ta la ɛɛ ba sewa. O ta ŋwɛɛra waa ŋwɛɛra la ne fɔo baa fɔwa la ta teŋɛ.

¹⁷ Ijipt kooro ne o laa tena baa wara dɛ do kpeɡri, dɛ jemɛ yoi kohona la aa won chao laa ta, ɡɛ saŋ o laa tena aa ba ma teera sawɛ bwɛjen la danjwɛɛre, dɛ́ che a ta kpoo nɛra kohona la.

¹⁸ Kooro la ŋwɛɛra waa ŋwɛɛra ne fɔo o ne Babelɔn kooro aa fɔwa la, o ta a ta teŋɛ. Anɔ waa ɛa nɔ bwa ɡelɔ waa won le a nyoa.”

¹⁹ Nemenɛ Korowii ŋɔ, “N ŋwɛɛrɔ kɛ n taa lole nɔ, mɛɛ tɛr o deŋnee, chɔɡa waa chɔɡ n ne o fɔo ne ŋwɛɛra waa ŋwɛɛra baɡ mɛ la wa.

²⁰ Mɛɛ harɔɔ belii dɛ́ lawɔ. Mɛɛ lawɔ kaa Babelɔn, dɛ́ tɛr o deŋne bela, dɛkalkɛ o le n habɔɔ.

²¹ Baa kpoo o laa tena baa chwaa dɛɛ kaa bwa laa taa, ba bini banɔ la baa ka la peɡre kaa bobɛlbwa. Asɛ he jemɛ kɛŋɔ men Korowiirii bola.”

²² Nemenɛ Korowii berɔ ŋɔ, “N ɡbabir ɛɛ ku peleme daa la kpale waa kaa nyunduaa ásɛ dɛ ka chɔɔro. O kpale waa pama dɛ do o nyundujaɡlaa mɛɛ ba kui ka chɔɔ bwejen doa.

²³ Israel bwejen doaa mɛɛ ba o chɔɔra. Wɛɛ ta kpalaa, dɛ́ do wer dɛ́ nɔnɛ. Jumbii bwa soo siwi ba sɔh a kɔne bela, dɛ́ so o chunchule ta.

²⁴ Daa aa lɔ harɛ la ta bwa ɛɛ jemɔɔ kɛŋɔ men Korowii, n ɡelɔ daa waa do jaŋne mule, dɛ ɡel daa waa mula do jaŋne. N ɡelɔ da-lwɛɛ hol, asɛ daa waa hola moɡɛ papooni dɛ do wer. Men Korowiirii bola, mɛɛ ɛo.”