Ɛsekeɛl 15 - mzwDBL

Grepo da bɛl sɛɡla wa

¹ Korowii bol waa men Ɛsekeɛl be ŋɔ,

² “Nɛwɛnyini bie, bɔkwaa ɡrepo da kpale kpɔ ɡwaa daa aa lɔ kɔr bini bɛlbwa kpale ɔ?

³ Baa wono kpɔ ɛ komɛl a maɡre aa? Hɛɛ wono kpɔ pa, dɛ́ kpɔ kwaa saɡɛ o ta naa?

⁴ Dɛ ba kpɔɔ do nii ta o nyoo la fuh, o kabora la ta fueh chiɡ aa, o wer tɛ waane ja aa?

⁵ O fa aa ɛ bir la, dɛ waa were tɛ komɛlbwa naa, bɔkwa tɔnɔɔ baa doo nii ta o nyoo la fuh, o kabora la ta fueh chiɡ la, ó berɛ dɔ jaɔ?”

⁶ Nemenɛ Korowii ŋɔ, “Gɛ maa kpɔ ɡrepo da le kɔr bini daa bwa bini do nii ta o fuh la, ɡɛɛ mɛɛ ba nɛra baa lɔ Jerusalam ɛɛ.

⁷ Mɛɛ tɛr ba deŋnee. Ba le nii ane nyoa te, nii la ɛɛ berɔ fuuh ba. Maa ba tɛr ba deŋne la, anee he jemɛ kɛŋɔ menee Korowii.

⁸ Mɛɛ ɡeloo harɛ la chɔ pɛɛ, dɛkalkɛ ba waa ta kasinteŋ dɔe tɛ mɛ. Men Nemenɛ Korowiirii bola.”