Ɛsekeɛl 11 - mzwDBL

Korowii pa Israel sitɔɔla bolchɔɡe

¹ Korowii Doma la ɡɔɔ men Ɛsekeɛl kaa nyundua, dɛ kpɔ mɛ ba Jerusalam Korowii Dea wee leebɔr doonyoa la ta. Belaa n na baala fifraanɛ dɛ banue, dɛ Asuur bibaa Jaasania, ne Bɛnaya bibaa Pɛlatea baa ɛ Israel harɛ nomonome ja ba nɛ.

² Ate, Korowii ŋɔ n be ŋɔ, “Nɛwɛnyini bie, baala nɔɔ dɔ liichɔɡa dɛɛ do nɛra baa ɛ wechɔɡa bwɛjen nɔ ta la.

³ Ba dɛ bol ŋɔ, ‘Saŋ aa chɛ kɛ ya do deene ta telaa? Bwɛjen nɔ do kɛŋɔ vii baa kpɔa dɛɛ daa kwa, asɛ ya ɡee ola aa lɔ o bini.’

⁴ Anomanta, Nɛwɛnyini bie, ból ba be, waa aa dɛ ba ba nɛɛ bala dɛ́ ba chɔɡ ba.”

⁵ Korowii Doma la baa so n nɛ, asɛ dɛ ŋɔ ń bol Israel tena be ŋɔ, “N jemɛ waa haa dɛ bol, ne anɔ la haa dɛ vɔrɔwe bwa ɡe.

⁶ He kpoo nɛra bwɛjen nɔ ta warɛ ɡa, ba lala perɛ fɔɡbaahna bobɛlbwa.

⁷ Anomanta, men Nemenɛ Korowii ŋɔ, ‘Nɛra haa kpoo ba perɛ bobɛlbwa laanee ola la, asɛ bwɛjen nɔ ɡee vii la. Kɛ mɛɛ doŋi heyaa le o ta.

⁸ He dɛ ɔmɛ laa, kɛ laalee mɛɛ ba kpɔe ba ta he nɛɛ bá kpoo heya.

⁹ Mɛɛ doŋi heyaa le bwɛjen nɔ ta, dɛ́ kpɔ heyaa do nɛŋhɔɔhra nɔn ta, dɛ́ tɛr he deŋne.

¹⁰ He ɡbaɡba harɛ taa baa ba heyaa kpoora laa ta, ásɛ nomɛlbwa jemɛ kɛŋɔ menee Korowii.

¹¹ Bwɛjen nɔ aa won lɛ heyaa kɛŋɔ ola lɔ vii bini aa, o yon tɔ a nɛɛ la. Israel harɛ nɔ ta bobɛlbwa haa ka do bwa, mɛɛ tɛr he deŋnee.

¹² Ásɛ he jemɛ kɛŋɔ menee Korowii, dɛkalkɛ he ta me Mmarare ne n waa ta teŋɛ, dɛ kaa teŋɛ harɛre aa bar heyaa cheme nɔ tena mmarare ta.’ ”

¹³ N nyoa taa lɔ waa aa dɛ ba ba nɛɛ bala ta mɛɛ bol la, Bɛnaya bibaa Pɛlatea den chole sewɛ. Belaa n kpɔ sie pi harɛ, dɛ do lɔŋɔ lokua ne kohona ŋɔ, “Nemenɛ Korowii, amɔ he dɛ ba nɛra baa ka Israel harɛ bwa chɔɡa kwaraa kɛɛ?”

¹⁴ Korowii berɔ bol waa n be ŋɔ,

¹⁵ “Nɛwɛnyini bie, nɛra baa soɡe Jerusalam dɛ bol he ne he bala Israel tena baa lawɛ heyaa laa ta kaa harɛfale ta la waa ŋɔ, ‘Nɛra baa laɡ ba kaa Babelɔn la ne men Korowii baah jaŋne kɛŋɔ ba won tom mɛ, dɛ ŋɔ banee Israel harɛ la ɛ ba kon.’ ”

Korowii baɡɛ Israel tena nyoa ŋɔ wɛɛ ba ba nee

¹⁶ Nemenɛ Korowii ŋɔ n be ŋɔ, “Bol he bala baa lawɛ he ne ban kaa harɛfala ta la be ŋɔ, ‘Menee ɡela ba laɡ ba kaa bojaŋa, ba lɔ peɡre harɛre ane ta la. Kɛ taraken nɔ, mɛɛ ja ba nɛɛ harɛre baa lɔ a ta la ta.’

¹⁷ Berɛ ŋɔ ba be ŋɔ, ‘Men Nemenɛ Korowii ɛɛ boa ba nyoa le harɛre maa lɔ ba peɡre a ta la taa, dɛ́ berɛ kpɔ Israel harɛ la tɛɛ ba ja.’

¹⁸ Baa berɔ ba, dɛ́ ba laa voɡdoŋa maa kia bwa kpɔ le harɛ la ta.

¹⁹ Mɛɛ ɡeloo ba bambile che bobeŋkpoŋ, dɛ́ tɛɛ ba liifala. Mɛɛ laa ba bambikpeɡ waa do kɛŋɔ bwe laanee kpɔ, dɛ́ tɛɛ ba bambile waa pwɛra.

²⁰ Ásɛ baa teŋɛ me Mmarare ne n waa ta kɛrɛdɛ. Mɛɛ kpɔ baa ɛ n nɛra, ásɛ n ɛ Korowii baa dɛɛ tom mɛ.

²¹ Kɛ banɔ la ba bambili taa lɔ kondoŋa ne voɡa maa kia ta la te, mɛɛ tɛr ba deŋne a waa. Men Nemenɛ Korowiirii bola.”

²² Kerobim la paɡri a kena dɛ ir, asɛ saaker nakpale la ja a nɛ, asɛ Korowii Israel tena aa dɛ tomɔ la jirima chaah kohona dɛ tɔ a nɛ.

²³ Korowii jirima le bwɛjen la ta, dɛ kaa bwejen bɛl waa lɔ o wee leebɔr doa.

²⁴ Wepila la ta la, Korowii Doma la kpɔ mɛ ir ba n bala baa laɡ ba kaa harɛfale ta Babelɔn la be. Belaa wepila la ba a jaɡa,

²⁵ asɛ n bol wobɛlbwa Korowii aa kpɔa baɡ mɛ la chaɡle n bala la.