Ɛsekeɛl 10 - mzwDBL

Korowii jirima le o Dea la ta

¹ Men Ɛsekeɛl nyiŋi kon waa bɔle Kerobim la doa, dɛ na komɛl kɛŋɔ kookara baa kpɔ bwedɛɛɡa ane aa ɛ burum baa yera safaaya ɛo.

² Belaa Korowii ŋɔ baa la waa tɔ yapoŋ la be ŋɔ, “La saaker nakpale aa lɔ Kerobim la lɔɡa la baah ta. Pa ninhɔla he nɔɔra su, dɛ́ kpɔ merɛ bwɛjen la ta.” N taa cheɡa dɛɛ nyiŋu la, o kaa jo.

³ Dɛ Kerobim la cheɡɛ Korowii Dea la weekaŋle harɛbɔr, asɛ baa la ka jo bela. Belaa bam ba tɔ Korowii Dea dembaah bela bwa.

⁴ Korowii jirima le Kerobim la ta, dɛ ba kaa Korowii Dea la doonyoa bela. Bam baa tɔ dembaah bela, asɛ Korowii jirima chaah bela bwa.

⁵ Kerobim la kena dɛ si, dɛ nɛn lɔ dembaah la baŋ kwaraa naa, o dɛ no sii la. A sii la do kɛŋɔ Korowii Waa Ɛ Kpeɡri Bwa Dɔɔ la taa ken.

⁶ Korowii aa do baa la aa tɔ yapoŋ la ŋɔ, ó ka pa ninhɔla le saaker nakpale aa lɔ Kerobim la lɔɡa baah ta la, o kaa jo dɛ che saaker nakpale la bɛl jwɛh.

⁷ Belaa Kerobim la bɛl tɛr nɔn, dɛ kpɔ nii aa lɔ a baah ta la ane do baa la aa tɔ yapoŋ la nɔn ta, asɛ o lɛ dɛ kpɔ le kaa.

⁸ Kerobim la bɛlbwa kena lɔɡre la, kwaane do kɛŋɔ nɛn nɔɔra ken.

⁹ Men Ɛsekeɛl berɔ nyiŋi dɛ na saaker nakpale anaarɛ. Beŋkpoŋ bɛlbwa cheɡɛ Kerobim la jwɛh, dɛɛ nyɛɡle kɛŋɔ bwedɛɛɡa ane baa dɛ yera kresolet ken.

¹⁰ He nyiŋi saaker nakpale la aa, anaarɛ la bwa le dɔŋa. A do kɛŋɔ bɛlbwa berɔ su o dɔŋ ta ken.

¹¹ Kerobim la dɛ kaa laa, a won baŋne anaarɛ a siebɔra la aa chaɡa la bɛlbwa kaala. Saaker nakpale la aa sie berɛ.

¹² Kerobim la bwara bwa, a habɔɔ ne nɔɔra dɛ a kena ta bwa dɔ sibie, ɡɛɛ a saaker nakpale anaarɛ la ɡe dɔ sibie.

¹³ N no taa bɛl wɛɛ yerɛ ŋɔ, “Saaker nakpale aa dɛ kile kɛŋɔ kawulewule.”

¹⁴ Kerobim la bɛlbwa dɔ siebɔra anaarɛ. Onla waa tɔ sie do kɛŋɔ nabal siebɔr, nɛɛte do kɛŋɔ nɛn siebɔr, toorote do kɛŋɔ nyujente siebɔr, naarɛte la ɡe do kɛŋɔ kee siebɔr.

¹⁵ Belaa Kerobim la ir kaa nyundua. Anee hweera kwaa n fa aa naa Keba Moo la bɔr la.

¹⁶ Kerobim la dɛ kaa laa, a ne saaker nakpale laanee dɛɛ kaa. A paɡri kena dɛɛ ba ira aa, a dɛ marɛ a nɛɛ a ne aa kaa.

¹⁷ Kerobim la cheɡɛ bobeŋkpoŋ aa, dɛ saaker nakpale la ɡe cheɡɔ, Kerobim la iro dɛɛ kaa nyundua aa, a ne anee dɛɛ ir, dɛkalkɛ hweera kwaa la doma lɔ a nakpale la ta.

¹⁸ Ate, Korowii jirima le o Dea doonyoa bela dɛ ba che Kerobim la nyundua.

¹⁹ Maa nyiŋa la, n nao kɛ Kerobim la paɡri kena dɛ ir kaa nyundua, a ne saaker nakpale la. A kaa che Korowii Dea wee leebɔr doonyoa la ta, asɛ Korowii Israel tena aa dɛ tomɔ la jirima tɔ a nɛ.

²⁰ A ɡɛ hweera kwaa nɔɔ n fa na Korowii Israel tena aa dɛ tomɔ jirima tɔ a nɛɛ Keba Moo la bɔr la. Anee ɡela n jemɛ kɛŋɔ a ɛ Kerobim.

²¹ Bɛlbwa dɔ siebɔra anaarɛ ne kena anaarɛ. A kena la bɛlbwa do kɛŋɔ nɛn nɔn aa lɔ o lɔɡa ken.

²² A siebɔra do kɛŋɔ anɔ la n fa aa naa Keba Moo la bɔr la. Bɛlbwa pa sie dɛɛ kaa, aa a te berɛ.