Ɛsekeɛl 1 - mzwDBL

Korowii jirima ne hweera kwaa ane wa

¹ Waa aa lɔ tɔn nɔ bini nɔ, Korowiirii pila baɡle men Busi bie sɔfo Ɛsekeɛl. Baa lawɛ n ne Juu tena laa ta kaa Babelɔn harɛ ta ka so Keba Moo nyoa, bene fifraatoro korobie anaarɛ tɔpenue taa a ɡɛ waa nɔ chiɡ.

² Korobie la tɔpenue weeree ɛ bene anue baa lawɛ Juda Kooro Jehoiachin laa ta kaa Babelɔn.

³ Keba Moo nyoa Babelɔn harɛ ta belaa Korowii bol waa men Ɛsekeɛl maa ɛ sɔfo be, n dɔ o kpeɡri dɛ na wepila.

⁴ N nao kɛŋɔ peukpeɡ bɛl aa taa dɛ kpɔ bam waa kana le weekaŋle nyunduabɔr, nii baro cheme, o bini ɛɛ nyɛɡle pelɔpelɔ ken. Waa dɛ nyɛɡle la, komɛl do kɛŋɔ ayaawa ken dɛ do o bini.

⁵ Maa nyiŋi nii la bini la, n na hweera kwaa anaarɛ a mar aa do kɛŋɔ nɛn bela,

⁶ bɛlbwa dɔ siebɔra anaarɛ ne kena anaarɛ.

⁷ A nakpale toɡrɔ, a napaala ɡe do kɛŋɔ nabale kwa, dɛɛ nyɛɡle kohona kɛŋɔ ayaawa baa looru ken.

⁸ A siebɔra anaarɛ ne kena anaarɛ la habɔɔ, bɛlbwa dɔ nɛn nɔn beŋkpoŋ keni bɛlbwa lɔɡa, a ɛ nɔɔra anaarɛ.

⁹ A bɛlbwa kena nyoo dɛ leɡe o dɔŋ kwa, a pɛ dɛɛ ir, aa a te berɛ.

¹⁰ Siebɔra hweera kwaa anaarɛ la aa dɔa la kokoɡrɔ. Gɛ aa doa teŋa nɔ. Nɛn siebɔr lɔ o sie, nyujente siebɔr do diɡ, nabal siebɔr do ɡal, asɛ kee siebɔr do habɔɔ.

¹¹ Dɛ ɡɛɛ a siebɔra do. A bɛlbwa dɔ kena anaarɛ, a paɡri anɛ kaa nyundua aa leɡe dɔŋa kwa, anɛ ɡe ɛɛ bɔle a bwara.

¹² Bobɛlbwa Korowii Doma la aa dɛ kaa ane la, kaalaa aa kaa, aa sie berɛ.

¹³ Hweera kwaa la dɛ nyɛɡle kɛŋɔ ninhɔla kɛɛ kapɛle ken. Asɛ nii do a baahna ta, dɛ la sie dɛɛ ba, dɛɛ chaah dɛɛ nyɛɡle kɛŋɔ bwaala.

¹⁴ Hweera kwaa la laŋɔ dɛɛ ba wɔrɔbe nɛɛ kɛŋɔ bwaala aa dɛ nyɛɡle la.

¹⁵ Maa dɛ nyiŋi hweera kwaa la, n na kwaane a do kɛŋɔ saaker nakpale anaarɛ a che harɛ a bɛlbwa jwɛh.

¹⁶ Saaker nakpale anaarɛ la dɛ nyɛɡle kɛŋɔ bwedɛɛɡa ane baa dɛ yera kresolet, a bwa ɛ siwi beŋkpoŋ. A do kɛŋɔ beŋkpoŋ su o dɔŋ ta ken.

¹⁷ Bobɛlbwa hweera kwaa la aa dɛ kaa la, kaalaa aa kaa, saaker nakpale la aa menɛ dɛɛ kaa bobɛlbwa.

¹⁸ Kwaa aa do kɛŋɔ saaker nakpale la kan, dɛ do ɔma kohona sibie su a bwa bar.

¹⁹ Hweera kwaa la dɛ kaa laa, saaker nakpale la ne anee dɛɛ kaa. A iro ɡe aa, a dɛ marɛ anɛ ane aa kaa.

²⁰ Bobɛlbwa a doma aa dɛ kaa a ne la, o ne saaker nakpale laanee dɛɛ kaa, dɛkalkɛŋɔ a doma la lɔ saaker nakpale la ta.

²¹ Hweera kwaa la dɛ kaa laa, a ne saaker nakpale laanee dɛɛ kaa, a cheɡɔ aa, dɛ a ɡe cheɡɔ. A iro aa, saaker nakpale la yon marɛ a nɛ, dɛkalkɛ hweera kwaa la doma lɔ saaker nakpale la ta.

²² N na komɛl aa bɔle hweera kwa la nyundua dɛ do ɔma kohona, dɛɛ nyɛɡle kɛŋɔ dombwea ken.

²³ Kon la aa bɔle a nyundua la lɔɡa la, a paɡri a kena anɛ a leɡe dɔŋa, dɛ kpɔ anɛ ɡe tɔ a bwara.

²⁴ Hweera kwaa la dɛ kaa laa, n dɛ no a kena sii kɛŋɔ chuubu aa dɛ si la ken, a berɛ do kɛŋɔ Korowii Waa Ɛ Kpeɡri Bwa Dɔɔ la taa, kɛɛ laa tena aa wara ɡbɔɡa ken. A cheɡɛ bobeŋkpoŋ aa, dɛ a fɔɔ a kena la.

²⁵ N berɔ no taa bɛl le kon waa bɔle hweera kwaa la nyundua ɡɛ saŋ aa baa che dɛ fɔɔ a kena la.

²⁶ Kon waa bɔle hweera kwaa la nyundua la, n na komɛl waa do kɛŋɔ kookara, ba kpɔ bwedɛɛɡa ane aa ɛ burum baa yera safaaya ɛ o doa, asɛ a do kɛŋɔ nɛn soɡe kookara la ta ken.

²⁷ N nao kɛŋɔ nɛn waa soɡe kookara la ta la, le o chara ta dɛ kaa nyundua do kɛŋɔ buni baa doo nii ta wɛɛ nyɛɡle, dɛ́ berɛ le o chara ta dɛ́ ba harɛ la ɡe do kɛŋɔ nii, asɛ nii waa chaahna kohona baro cheme.

²⁸ Gɛ bwaala deŋɡare yon le baama ta bɔr chaah la, ɡɛɛ bɔr waa chaahna bar kookara la do. A dɛ baɡle ɡɛ Korowii jirima aa doa. Maa nao la, n cholo dɛ kpɔ sie pi harɛ, asɛ dɛ no taa bɛl.