Ɛsta 8 - mzwDBL

Ba do Juu tena ŋɔ bá ka yo

¹ Awola tenten baa saɡɛ Heeman la, Kooro Sɛksɛs kpɔ Heeman waa ɛ Juu tena dɔm la dem ne o kondɔɔh te bwa do o haah Ɛsta nɔn ta. Dɛ Ɛsta fa ŋɔ o be ŋɔ Mɔdekae ɛ o lole tenten. Anomanta, le ɡɛ saŋ, Mɔdekae dɔ ŋwɛnɛ kɛ ó jo koodem dɛɛ la kooro sie, saŋ bɛlbwa.

² Kooro laa o noniseɡ waa kpɔa dɛɛ ɛɡre tɔne ta aa ɛ mmarare o faa kpɔ tɛ Heeman la foo, dɛ kpɔ tɛ Mɔdekae. O haah Ɛsta kpɔ Heeman kondɔɔh la bwa ɡe do Mɔdekae nɔn ta.

³ Kooro haah Ɛsta berɔ ba kooro sie, dɛ ba ɡuŋu harɛ siniire ne, dɛ soŋo ŋɔ, ó ɡel ba teŋe liichɔɡa Aɡaɡ naa Heeman aa liira kɛ ba kpoo Juu tena bwa la ta.

⁴ Ate, kooro tɛr o suuɡaswɛm daŋɡbala la pa Ɛsta nɛɛ ja, asɛ o ir che o sie.

⁵ Belaa Ɛsta ŋɔ, “N naa kooro, dɛ hɛɛ sɛoh, dɛ he sie lɛ n nɛ, n wesoŋa nɔ toɡrɔ aa, ɡel he karakere chwerɛ tɔne kɛŋɔ, Hamedata bibaa Heeman tɔne waa chwera kɛŋɔ, bá kpoo Juu tena baa lɔ he harɛre bwa ta la bɛ toma ɛ kpa.

⁶ Ɛrɛɛ mɛɛ ba wona so nyiŋi, ásɛ wechɔɡa nɔ bwa dɔŋa chiɡ n nɛra Juu tena nɛɔ? Maa won so nyiŋi bá kpoo n dem nɛra.”

⁷ Belaa Kooro Sɛksɛs chaŋe o haah ne Juu te Mɔdekae ŋɔ, “Vɔrɔwa Heeman aa vɔrɔwa ŋɔ bá kpoo Juu tena bwa la nomanta, n kpɔ o kondɔɔh bwa tɛ Ɛsta, dɛ ɡel ba ka saɡɔ.

⁸ Taraken nɔ, n tɛ heyaa ŋwɛnɛ kɛ hé kpɔ n sɔn, dɛ́ chwerɛ mmarafale ja ka tɛ nɛra baa lɔ n harɛre la bwa ta, dɛ́ tɔ Juu tena kpoora la ŋwɛnɛ. Hé chwerɔ ɡɛ bɛlbwa haa dɛ nyin. Hé chwerɔ tonaa, hé kpɔ n noniseɡ ɛɡre a ta, dɛkalkɛŋɔ tɔne baa chwerɛ n sɔn ta dɛ kpɔ n noniseɡ ɛɡre a ta la, nomɛlbwa aa won tire a ta.”

⁹ Sevan korobie tɔpera fifraanɛ dɛ atoro ta la, Mɔdekae yerɛ kooro nomonome la bwa cheme, dɛ ɡel ba chwerɛ mmara tɔne ka tɛ Juu tena ne koranar, ne nomonome baa chɔ harɛre bwa nyoa, ne nomonjena dɛ le harɛre lafa fifraanɛ dɛ anuanɛ la bwa ta, dɛ le India harɛ kpoŋe kaa Itiopia harɛ ta. Ba chwerɔ ka tɛ wobobele aa lɔ harɛre la bwa ta, ne ɡɛ a bɛlbwa chwera aa doa, hale Juu tena bwa jao.

¹⁰ Kooro Sɛksɛs kpeɡri taa Mɔdekae che dɛ ɡel ba chwerɛ tɔne la, asɛ dɛ kpɔ noniseɡ la ɛɡre a ta, dɛ kpɔa tɛ nɛra ba so kooro jaɡre aa won chwae ta, dɛ kpɔ tɔne la ka bɔne tɛ nɛra baa soɡe o harɛre la bwa ta.

¹¹ Kooro waa la tɛ Juu tena baa lɔ bwɛjena bwa ta la kpeɡri kɛŋɔ, bá cheme dɛ́ won yo lɛ ba nyu. Ba dɔ ŋwɛnɛ kɛ bá kpoo laa tena baa le wobol bɛlbwa ne harɛ bɛlbwa ta, dɛɛ ba dɛ́ ba yo ba ne ba haahna ne bii la, dɛ́ kpɔ ba kondɔɔh.

¹² Tɔpere Mɔdekae aa lea tɛ Juu tena ŋɔ bá kpɔ ɛ ɡɛ waa la Kooro Sɛksɛs harɛre la bwa ta laanee Adar korobie, tɔpere fi dɛ atoro ta.

¹³ A chɛ kɛ tɔne la mmarafale la aa lɔ a ta la tel wobol te bɛlbwa tena baa lɔ Kooro Sɛksɛs harɛre la bwa ta la be, ásɛ ba jemɛ a wa, ɡɛ aa ɛ ásɛ Juu tena la won kpɔ ba te kɛrɛdɛ, dɛ́ won yo ba dɔma bɔ kem.

¹⁴ Kooro aa do mmara la nomanta, o toroma la soɡe o jaɡre la ta kaa wɔrɔbe nɛ. Bane kpɔ waa la perɛ koobwɛɛ Susa ɡe bwa ta.

¹⁵ Mɔdekae aa le kooro sie bela dɛ kaa la, dɛ o do laalapoŋa ne laalaburum, dɛ berɛ do batakaare baa kpɔ yapondɛɛɡe ɛo dawɛ kɛŋɔ koolaala ken, dɛ pi suuɡaswɛm ɡbɛrɛdɛɛɡe bɛl. Asɛ Susa bwɛɛ tena la bwa ɡe ɛɛ moo silɛɛ ne.

¹⁶ Dɛ a ɛ silɛɛ ne hɛɡra dɛ tɛ Juu tena la, baa duu ba bobɛlbwa.

¹⁷ Harɛ bɛlbwa ne bwɛɛ bɛlbwa ta toroma la aa la mmarafale nɔ ne la, Juu tena baa lɔ bela la bwa sie dɛ lɛ baa hɛɡre, dɛ so di kwaa dɛɛ lɛ ba sie. Nɛra baa wola Juu tena ɛɛ la bini bane ɔmɔ, dɛ kpɔ ba te berɛ Juu tena, dɛkalkɛ ba we-ɛɛla la ɡelɔ ɔmee laɡ ba.