Ɛsta 7 - mzwDBL

Ba saɡɛ Heeman

¹ Kooro Sɛksɛs ne Heeman dɛ kooro haah Ɛsta bwa pɛo di kwaa la.

² Baa dɛ nyɔ sen ba kondikonjena nɛɛtena dii ta la, kooro bɔɔ o haah Ɛsta ja ŋɔ, “Ɛsta, bɔkwaa hɛɛ nyin ɔ? Hale harɛ maa dɛ di kora o ta nɔ peraa hɛɛ nyin kwaraa naa, mɛɛ tɛɛ.”

³ Anee Ɛsta chaŋe ŋɔ, “N naa kooro, n wesoŋa bwaa kɛŋɔ dɛ n waa su he siwi hɛɛ nyin kɛ he cha mɛ naa, lɛ n nyu dɛ lɛ n nɛra ɡe nyu.

⁴ Ba yoɡ yaa tɛ ŋɔ bá kpoo yaa, dɛ́ he yaa kwaraa. Dɛ yoɡaa ba yoɡ yaa kɛŋɔ yoma kwaraa naa, n fe ta waane dɔe dɛ́ bol dɛɛ hae.”

⁵ Kooro Sɛksɛs bɔɔ Ɛsta ŋɔ, “Ume baahnee sua o won ɛ ɡɛ waa nɔɔ? Naate sɛ?”

⁶ Anee Ɛsta chaŋo ŋɔ, “Nɛnchɔɡe Heeman nɔɔ ya dɔm waa do yaa ɡɛ wahala nɔ ta.” Belaa ɔmee chole Heeman nɛɛ kohona kooro ne o haah Ɛsta sie.

⁷ Kooro baah diu kɛrɛdɛ o ir ɡel sen waa dɛ nyɔ la, dɛ le buse ka jo koodem bodɛɛɡe bobɛl baa du daa ane la. Heeman nao kɛŋɔ kooro dɔɔ kpɔ liire ɡɛ waa dɛ ba o deŋne tɛra. Anomanta, o soɡo dɛɛ soŋe kooro haah Ɛsta ŋɔ ó lɛo ta.

⁸ Kooro aa bera dɛɛ jo koodem la, dɛ Heeman marɛ o haah karajaŋ waa yale o ta la ta, dɛɛ soŋo sibeɡra ne, anee kooro nyɛɡ ŋɔ, “Ei! Baa nɔ dɛ nyin kɛ ó paɡɛ n haah n siwi ta koodem bonɔ kwara!” Kooro nyoa ne chiɡa dɛ o bonɔɔna baa fɔɡɛ ba lure la kpɔ yal bɔle Heeman sie.

⁹ Kooro bonɔɔna la bini bɛl baa dɛ yerɔ Haabona waa lɔ o jwɛɛh ŋɔ o be ŋɔ, “N naa kooro, Heeman pa da o jaŋne aa ɛ naɡale fifraanuanɛ dɛ anue dɛ kaa nyundua o dem. O ɛo kɛŋɔ bá fee saɡɛ Mɔdekae waa lɛ he nyu ta la o ta.” Belaa kooro la do ba ŋɔ, “Hé ka saɡɛ Heeman o ta.”

¹⁰ Gɛɛ a do ba saɡɛ Heeman daa waa paa dɛɛ ba Mɔdekae o ta saɡa la, asɛ kooro baah sɔɔh tama.