Ɛsta 6 - mzwDBL

Kooro ɡɔɔ Mɔdekae sɔn

¹ Awola tɔpere la jwaana, kooro ta wone chɔ dom. Anomanta, o ɡelɔ ba ba tɔne o kora dii waa aa lɔ a bini la ne bá kure tɛo.

² Ba kuro ka tel bela Mɔdekae aa ɡela kooro dɔ o nyu la, Biɡtana ne Tɛrɛs, koodem bonɔɔna ba fa aa dɛ daah kooro dem doonyoa la vɔrɔwa ba fe aa vɔrɔwa ŋɔ, bá kpo kooro la.

³ Kooro bɔɔro ŋɔ, “Webesoo ń ɛ tɛo ɡɛ waa nɔ ta nɔ? Kembɔr besoo ń tɛo wɔ?” Anee o bonɔɔna la ŋɔ, “He ta wobɛlbwa ɛɛ tɛo.”

⁴ O berɔ bɔɔ ŋɔ, “N nomonjena la bane lɔ dem bonɔ naa?” Gɛ saŋ dɛ Heeman ɡe deno ba jo koodem baah bela, dɛ́ ba soŋe ŋwɛnɛ kooro be ŋɔ, bá ka saɡɛ Mɔdekae daa waa pao la ta.

⁵ Kooro bonɔɔna la chaŋe kooro ŋɔ, “N naa, Heeman lɔ bonɔ.” Asɛ kooro ŋɔ, “Hé yerɔ ba!”

⁶ Waa bala la, kooro bɔɔro ŋɔ, “Sɔn besoo ń tɛ nɛn n bambile aa lawɔ, o waa su n siwi ɔ?” Belaa Heeman lii o nyu bini ŋɔ, “Nomɛl lole kooro ɛɛ nyin kɛ ó duuru dɛ ɡwaa mɛ naa?”

⁷ Anee Heeman chaŋe kooro ŋɔ, “N naa, dɛ he bambile lawɛ nɛn o waa aa su he siwi kɛ he tɛo sɔn aa, kenii chɛ kɛ he ɛ.

⁸ Ŋɔ he bonɔɔna la be bá kpɔ he ɡbaɡba laala haa dɛ doa la ane ba, dɛ́ berɛ kpɔ jaɡre haa dɛ so a ta la bɛl ɡe ba. Gel bá kpɔ kondɛɛɡe haa kpɔa dɛɛ dawɛ he jaaɡɔ nyu ta, aa baɡle kɛŋɔ he jaaɡɔɔ la ba dawɛ ɡɛ jaaɡɔ la nyu ta.

⁹ Ásɛ dɛ ɡel he nomonjena tenten la bɛl kpɔ koolaala la do naate, ó so jaaɡɔ la ta, ásɛ nomoa la tɔ o sie, dɛ́ kpɔɔ ɡaaɡe bwɛɛ nɔ fɔɡbaahna, dɛ́ kpɔ takpeɡ dɛɛ ŋɔ, ‘Kenii kooro ɛɛ tɛ ɡɛ nɛn nɔ sɔn.’ ”

¹⁰ Kooro do Heeman ŋɔ, “Ɛ warane ka kpɔ koolaala la ne jaaɡɔ la, dɛ́ ka ɛ ɡɛ haa bola nɔ bwa tɛ Mɔdekae, Juu te la. Bɛ a bini bɛlbwa ɡel. Hɛɛ nao kɛ waa soɡe koodem doonyoa bela.”

¹¹ Anomanta, Heeman lɛ koolaala la ne jaaɡɔ la kaa Mɔdekae be, dɛ ka kpɔ laala la doo, asɛ Mɔdekae teeh so jaaɡɔ la ta. Heeman kpɔɔ kpɔ bwɛɛ la fɔɡbaahna, o nyoa che chiŋ wɛɛ ŋɔ, “Hé na ɡɛ kooro aa ɛ nɛn o bambile aa lawɔ kɛ ó tɛo sɔn!”

¹² Baa tona la, Mɔdekae berɔ ka so koodem doonyoa la ta. Heeman ɡe kpɔ sihiih ne baŋaɡola dɛ le bela kaa o dem warane.

¹³ Waa kaa jo dem la, o baɡle waa aa puu la bwa o haah ne o daamanar la be. Asɛ ba jao ŋɔ, “Haa dena pa mun di sihiih Mɔdekae sie nɔ, o lɔɡaa hɛɛ ba doe, ásɛ o pɔ he nɛ, dɛkalkɛŋɔ o ɛ Juu te.”

¹⁴ Ba ta aa soɡa dɛɛ bol waa la, kooro bonɔɔna baa fɔɡɛ ba lure la baa kpɔ Heeman kaa kooro haah Ɛsta be kondikonjena waa ɛa ŋɔ bá ba di la mun warane.