Ɛsta 5 - mzwDBL

Ɛsta ta nɔn yerɛ Kooro

¹ Baa vɔwɛ ba nyoa tɔpetooro wee tonɛ la, Ɛsta kpɔ laala aa baɡla kɛ o ɛ kooro haah la do, dɛ ka che koodem baah bela kooro dea doonyoa aa chaɡa, dɛ kooro soɡe o kookara ta o sie chaɡɛ doonyoa.

² Waa na o haah Ɛsta bela la, o sie lɛ o nɛ, dɛ tɛr o suuɡaswɛm daŋɡbala waa kpoŋa la pa Ɛsta nɛ, asɛ o suuh tel o be dɛ kpɔ o nɔn leɡe suuɡaswɛm daŋɡbala la nyoa.

³ Kooro bɔɔro ŋɔ, “N haah Ɛsta, a som tenaa? Bɔkwaa hɛɛ nyin ɔ? Wobɛlbwa haa dɛ nyin la, mɛɛ ɛo tɛɛ. Hale harɛ maa dɛ di kora o ta nɔ peraa hɛɛ nyin kwaaraa naa, mɛɛ tɛɛ.”

⁴ Belaa Ɛsta chaŋo ŋɔ, “N naa kooro, dɛ hɛɛ sɛoh waa, he ne Heeman ba fini dɛ́ ba di kondikonjena maa daala tɛɛ la.”

⁵ Ate, kooro tomɛ o bonɔɔ Heeman be ŋɔ ó ba warane, ásɛ ba la o haah Ɛsta be. Asɛ ba bwa pɛ la ka di kondikonjena la.

⁶ Baa dɛ nyɔ sen la, kooro bɔɔ o haah Ɛsta ja ŋɔ, “Bɔkwaa hɛɛ nyin kɛ ń ɛ tɛɛ nɔ? Hale harɛ maa dɛ di kora o ta nɔ peraa hɛɛ nyin kwaraa naa, mɛɛ tɛɛ.”

⁷ Asɛ o chaŋo ŋɔ, “Kon maa dɛ nyin laanee kɛŋɔ,

⁸ Dɛ n waa su he siwi hɛɛ nyin kɛ he cha mɛ naa, kere he ne Heeman ba n be dɛ́ ba di kondikonjena maa dɛ ba daala tɛɛ ja. Gɛ saŋee mɛɛ ba kon maa dɛ nyin baɡla.”

Heeman vɔrɔwɔ dɛ́ kpo Mɔdekae

⁹ Heeman iro le bela, o sie lɛ kohona. Kɛ waa na Mɔdekae o so koodem doonyoa bela, waa wola ire che dɛ kpɔ duure tɛo o ba kaa la, o baah berɔ di kohona.

¹⁰ Kɛ ane abwa, o lawɛ bambile dɛ kaa o dem, dɛ ka tomɛ nɛn ŋɔ ó ka yerɛ o daamanar ne o haah Seres tɛo.

¹¹ Ba bwa aa baa cheme la, o kpɔ o kondɔɔh aa kana ne o bibaala wara baa wara dɛ ta nyoa. Dɛ berɛ baɡle ŋwɛnɛ kooro aa cheɡɛ o ta dɛ tɛo jirima, ne nomonome waa tɛo o ɡwaa o dɔŋa nomonjena ne banɔ la baa dɛ ɛ toma koodem la bwa.

¹² O berɔ ŋɔ ba be ŋɔ, “N ɡboo kooro haah yerɛ ka ja kooro nɛɛ ya pɛ di kondikonjena. Kɛ a ɡbo laa, o berɔ dɛɛ yerɛ n ne kooro bwa kere ɡe ja.

¹³ Ane abwa, n ta sie na ɡɛ Juu te Mɔdekae aa soɡe koodem doonyoa bela la aa, anɔ bɛlbwa aa n siwi su kpa.”

¹⁴ Heeman daamanar ne o haah la ŋɔ o be ŋɔ, “Gel ba pa daa o jaŋne aa ɛ naɡale fifraanuanɛ dɛ anue kaa nyundua, ásɛ he ŋɔ kooro be ŋɔ, ó ɡel ba saɡɛ Mɔdekae o ta kere chɔɔ. A ba ɡɛ naa, he ne kooro ɛɛ won berɛ la kondikonjena la bɔr, ásɛ he sie lɛ.” Ba wobol la wer tɛ Heeman kɛrɛdɛ, anomanta, o sɛoh dɛ ɡel ba pa daa la.