Ɛsta 4 - mzwDBL

Mɔdekae soŋe Esta ŋɔ ó chao

¹ Mɔdekae aa na waa baa ɛa la, o kɛɛ o laala dɛ kpɔ lweyal tɔ, dɛ ɛ tɔɔ do o nyu ta, a baɡle kɛŋɔ o tea bini chɔɡɔ. O valɛ bwɛjen Susa fɔɡbaahna dɛ dooɡe lɔŋɔre dɛɛ wi kohona.

² Koodem doonyoa ɡboo o jaɡɛ, dɛkalkɛŋɔ nomɛlbwa waa tɔ lweyal la ta ŋwɛnɛ dɔe kɛ ó jo bela.

³ Harɛre la bɛlbwa ta kooro mmara la aa tela la, Juu tena baa lɔ bela la tea bini chɔɡɔ baa dooɡe lɔŋɔre dɛɛ wi kohona. Ba vɔwɛ nyoa dɛ kpɔ lweyale tɔ, dɛ ɛ tɔɔ merɛ harɛ dɛ chɔ a ta. A baɡle kɛ ba lɔ sibeɡra ta.

⁴ Kooro haah Ɛsta toli ne baala baa fɔɡɛ ba lure baa nyiŋi o nɛɛ la aa kaa bol Mɔdekae waa o be la, a we o nɛɛ kɛrɛdɛ. O kpɔ laala tɛɛ ba ŋɔ, bá kpɔ ka tɛo ó do, dɛ́ foo lweyal la bil, asɛ o vɛh, o ta laala la lɛɛ.

⁵ Kooro haah berɔ yerɛ baa bɛl baa fɔɡɛ o lur baa yerɔ Hatak, kooro aa leo wɛɛ nyiŋi o nɛɛ la, dɛ doo ŋɔ ó ka bɔɔ Mɔdekae waa aa bala wɛɛ wi.

⁶ Anomanta, Hatak leɔ dɛ ka na Mɔdekae kɛ waa soɡe bwɛɛ la cheremibɔr, waa lɔ koodem doonyoa la sie.

⁷ Mɔdekae baɡle waa aa chiɡa la bwa, dɛ berɛ baɡle suuɡa Heeman aa baɡɛ nyoa ŋɔ, wɛɛ bɔɔ do kooro kara mun, ásɛ ba kpoo Juu tena bwa la.

⁸ O kpɔ tɔn baa chwera, asɛ ba bol o bini waa Susa la bɛl tɛ Hatak ŋɔ, ó kpɔ ka tɛ Ɛsta dɛ́ baɡle o bini waa o be, ásɛ o la kooro be, dɛ́ ka soŋo ŋɔ ó na o ne o nɛra bwa sum.

⁹ Hatak kaa bol waa Mɔdekae aa bola la bwa kooro haah Ɛsta be.

¹⁰ O berɔ tomɛ Hatak Mɔdekae be ŋɔ,

¹¹ “Nɛra baa dɛ ɛ toma koodem bela, ne nɛra baa lɔ harɛre la ta bwa jemɛ mmara la kɛŋɔ, baa kɛɛ haah aa won la kooro be kooloŋ ta, nemenɛ kooro yerɔ mɔɔ. Dɛ ɡɛ laa aa, kpoe chɛ kɛ bá kpoo, nemenɛ kooro tɛr o suuɡaswɛm daŋɡbala la tɛo dɛ́ lɛ o nyu.” Dɛ berɛ ŋɔ, “Kooro aa yer mɛ n la o be, tɔpera fifraatoroo nɔ.”

¹² Hatak aa kaa bol waa Ɛsta aa bola nɔ Mɔdekae be la,

¹³ Mɔdekae berɔ chaŋo ŋɔ, “Kooro haah, bɛ lii kɛŋɔ haa lɔ koodem bela nomanta, dɛ ba kpoo Juu tena bwa naa, hɛɛ dɔ he nyuu.

¹⁴ He tɔ nyoa he ta waane bolɛ taraken nɔ naa, Juu tena ɛɛ dɔ nomɛlee ó cha ba, kɛ he te ne he mɛɛ nɛra bwa ɛɛ serewoo. Dɛ ɡɛ waa nɔ waa he ɛ kooro haah taraken nɔ naa, he jemaa?”

¹⁵ Ɛsta berɔ ŋɔ bá ka ŋɔ Mɔdekae be ŋɔ,

¹⁶ “Kaa dɛ́ ka yerɛ Juu tena baa soɡe bwɛjen Susa nɔ ta bwa cheme, ásɛ he vɔwɛ nyoa dɛ soŋe Korowii tɛ mɛ. He bɛ kwaa di, dɛ bɛ nee ɡe nyɔ tɔpera atoro chɔɔ ne jwaana. N ne n toli ɡe ɛɛ ɛ ɡɛɛ, a lole kɛŋɔ kooro ta nɛn yerɛ aa waa o sie la, kɛ mɛɛ lao. Hale seo kwaraa yaa, ń sewɛ.”

¹⁷ Ate, Mɔdekae la dɛ ka ɛ ɡɛ kooro haah Ɛsta aa doo ŋɔ ó ka ɛ la bwa.