Ɛsta 3 - mzwDBL

Heeman vɔrɔwe Juu tena kpoora vɔrɔwa

¹ Aa baa tel saŋ bɛl la, Koojen Sɛksɛs kpɔ nomonome tɛ Hamedata bibaa Heeman o nabaa aa ɛ Aɡaɡ, o ɛ nomonjen ɡwaa harɛ la nomonome bwa.

² Koojen do nɛra baa lɔ koodem bela dɛɛ ɛ toma la bwa ŋɔ, báa ɡuŋi Heeman harɛ, dɛ́ɛ duuru saŋ bɛlbwa. Ba bwa dɛ ɛ ɡɛ, kɛ dɛ Mɔdekae te aa on ɡɛ ɛ.

³ Belaa Mɔdekae nomondɔŋa baa lɔ koodem la bɔɔro ŋɔ, “Ɛrɛɛ kooro do yaa ŋɔ yáa duu Heeman, he te aa wola a ta teŋɛ nɔɔ?”

⁴ Tɔpere bɛlbwaa ba teŋɛ dɛɛ bol waa la o be, kɛ o ta ba be noɛ. O ŋɔ, “Juu tee men. Maa won ɡuŋi Heeman.” Anomanta, ba bol Heeman be, dɛ na kɛ o sie ɛɛ lɛ Mɔdekae waa la taa.

⁵ Heeman ɡbabir aa naa kɛŋɔ Mɔdekae aa on harɛ ɡuŋi dɛɛ duuru la, o baah diu kɛrɛdɛ.

⁶ Waa naa kɛ Mɔdekae ɛ Juu te la, o ɛ o liire kɛ waa o ɡboo kpo, dɛ vɔrɔwe kɛŋɔ wɛɛ kpoo o ne Juu tena baa lɔ Kooro Sɛksɛs harɛ ta la bwaa.

⁷ Kooro Sɛksɛs kora dii bene fi dɛ anɛ Nisan korobie ta la, Heeman ɡelɔ ba bil daa o sie, dɛ́ lawɛ korobie ne tɔpere waa wera tɛo, ó kpɔ ɛ waa waa vɔrɔwa la. Korobie baa lawɔ laanee Nisan korobie.

⁸ Belaa Heeman la ka ŋɔ Kooro Sɛksɛs be ŋɔ, “N naa kooro, nɛra bane perɛ he kora harɛre la ta bobɛlbwa. Ba we-ɛɛla korɛ nɛra bwa we-ɛɛla ta. Baa he kora mmarare ɡe ta teŋɛ, anomanta, dɛ he le ba ne naa, a fe wer.

⁹ Dɛ hɛɛ sɛoh waa, do mmara, ásɛ ya kpoo ba. A ba ɡɛ naa, mɛɛ bɔ suuɡapoŋa a tɔɡre aa ɛ kilore kaɡboŋa lafraatoro fifraanaarɛɛ do he kara mun tɛ nɛra baa kpoo a ɡɛ nɛra la.”

¹⁰ Belaa kooro sɛh, dɛ foo o noniseɡ waa kpɔa dɛɛ ɛɡɛ tɔn ta la, dɛ ɛ mmara la, dɛ kpɔ tɛ Hamedata bibaa Heeman waa hah Juu tena kohona la.

¹¹ Kooro ŋɔ Heeman be ŋɔ, “Gel suuɡa la do he be, ásɛ dɛ ka ɛ nɛra la ɡɛ bɛlbwa haa dɛ nyin.”

¹² Korobiloɡle tɔpera fi dɛ atoro ta la, Heeman yerɛ kooro nomonome bwa cheme. O ɡelɔ ba chwerɛ ɡɛ waa bol Juu tena waa la wobol bwa soo siwi aa lɔ harɛre la bɛlbwa ta, ne ɡɛ ba chwera aa doa, dɛ kpɔ ka tɛ koranar ne nomonome baa chɔ harɛ bɛlbwa nyoa, ne ba nomonjena bwa. Kooro sɔn taa ba chwera, dɛ kpɔ o noniseɡ ɛɡɛ a ta, asɛ a ɛ mmara, dɛ chɔ le saŋ bɛlbwa.

¹³ Ba le toroma bá kpɔ tɔne la kaa harɛre kooro aa di kora a ta la bwa ta. A bini waa dɛ chaɡle kɛ bá kpoo Juu tena bwa. Toli ne bonɔɔna ne nomonome, dɛ haahna ne bechale, bɛlbwa bɛ ka, bá ɛa tɔpebeŋkpoŋ. Adar korobie o tɔpera fi dɛ atoro weeree aa ba chiɡa, ásɛ ba pa ba laala ɡe bwa.

¹⁴ Toroma la laŋaa, bá tɛ nomonome baa chɔ harɛre nyoo la bɛlbwa mmarafale tɔn la bɛl, ásɛ ba ɡel nɛra bwa soo siwi baa lɔ ba harɛre ta jemɛ a wa, dɛ́ kpɔ ba te dɛɛ kpa tɔpere la.

¹⁵ Kooro aa do mmara la nomanta, toroma la ɛ warane dɛ kaa, asɛ bane kpɔ waa la perɛ koobwɛɛ Susa ta. Dɛ kooro ne Heeman soɡo dɛɛ nyɔ sen, asɛ bwɛɛ la bwa ɛɛ vuuɡi.