Ɛsta 2 - mzwDBL

Ɛsta baa ɛ kooro haah

¹ A habɔɔ, Kooro Sɛksɛs baah sɔɔhnɔ tama, asɛ o lii Vasti wa, ne waa waa ɛa la, ne ɡɛ waa koh o waa do mmara la.

² Anomanta, kooro ɡbaɡba bonɔɔna baa lɔ o jwɛɛh la ba liire ne ŋɔ, “N Naa kooro, ɡel bá nyiŋi harɛre la bwa ta, dɛ́ nyin toli baa wera, baa wola baa jemɛ bwa tɛɛ.

³ Hɛɛ won ɡel nɛra baa dɛ nyiŋi harɛre haa dɛ di kora a ta la bwa, kpɔ toli baa wera ba koodem haahna dobɔr koobwɛɛ Susa nɔ ta, ásɛ dɛ kpɔ ba do Heɡai baa fɔɡɔ o lur, o do koodem haahna dobɔr dɛɛ nyiŋi kooro haahna nɛɛ la nɔn ta, wɛ́ɛ di ba toli.

⁴ Ba bini bɛlbwa he sie aa lɛ o nɛɛ la, kpɔɔ ɛ he haah chiɡ Vasti naa ta.” Kooro aa no ɡɛ baa jao la, o sie lɛ a ta, dɛ ɡel ba ɛa ɡɛ.

⁵ Ate, Susa bwɛjen ta bela, dɛ Juu te bɛl lole baa yerɔ Mɔdekae. Bɛnjamen dea o le. O mɛɛ sɔne Jɛɛ, asɛ Jɛɛ ɡe mɛɛ sɔne Simee, asɛ Simee mɛɛ sɔne Kes.

⁶ Babelɔn Kooro Nebukadnesa lawɛ Juda Kooro Jehoiachin ne nɛra bane le Jerusalam kaa o harɛ ta, dɛ Mɔdekae ja ba nɛ.

⁷ Dɛ Mɔdekae mɛnjen bie bɛl sɔne Ɛsta. O sɔn bɛl ɡee Hadasa, Hibru tena wobol ta. O siebɔr ne o mar wer kɛrɛdɛ. Ɛsta nya ne o mɛɛ aa sewa la, Mɔdekae kpɔɔ berɛ o ɡbaɡba bie dɛɛ nyiŋu.

⁸ Kooro Sɛksɛs aa ŋɔa bá ɡaaɡe toldɛɛɡa bɔr la, ba dɔ bane dɛ kpɔ ba kaa koobwɛɛ Susa koodem haahna dobɔr ka tɛ Heɡai ŋɔ wɛ́ɛ nyiŋi ba nɛ. Dɛ Ɛsta ɡe ja bɛl.

⁹ Heɡai sie lɛ Ɛsta nɛɛ kɛrɛdɛ o waa su o siwi, anomanta, o do sie nyiŋu ɡɛ aa chɛa. Buɡ la ta, o tɛo kwaa waa kpɔ dɛɛ di toli, ne kondikondɛɛɡa wɛ́ɛ di, dɛ berɛ tɛo haahna banuanɛ dɛ le koodem bela báa tomɔ, dɛ kpɔ ba ka do haahna dobɔr bela waa wera kɛrɛdɛ.

¹⁰ Dɛ Mɔdekae fa kah Ɛsta ŋɔ ó bɛ ɡel ba jemɛ o nɛnsoo, anomanta, o ta baɡlɛ kɛŋɔ o ɛ Juu te.

¹¹ Tɔpere bɛlbwaa Mɔdekae yon le o dem dɛ́ la haahna dobɔr la sie bela, dɛ́ ka valɛ la sie dɛɛ ba habɔɔ kɛŋɔ o ken ɛɛ na Ɛsta dembaah belaa ɡɛ waa doa.

¹² Mɔɔ toli la bɛlbwa dɔ bɔr la kooro be o ne ó chɔ la, korobie fi dɛ anɛɛ o kpɔ dɛɛ kwaa o te. Korobie anumɛlee o kpɔ dɛɛ fɔɡle nosɔɔhsoma baa dɛ yera korobo la, dɛ́ berɛ fɔɡle konsɔɔhsoma aa dɛ kwaa bwara ɡe korobie anumɛl.

¹³ Awola tɔpere toli la bɛlbwa aa le haahna dobɔr bela dɛɛ la kooro be la, komɛlbwa waa dɛ nyin la, ba kpɔɔ dɛɛ tɛo.

¹⁴ Jɔmɔraa wɛɛ la o be dɛ́ ka chɔ. Tɔɔ perɔ aa, baa kpɔɔ la sɛnanar denɛɛte ta, dɛ́ ka do kooro bonɔɔ Saasɡas baa fɔɡɛ o lur, wɛɛ nyiŋi kooro haahna nɛɛ la nɔn ta. Waa kooro bee la kpa, nemenɛ kooro sie lɛ o nɛɛ ó baɡle o sɔn ŋɔ bá yerɔ tɛo ja.

¹⁵ Aa tela kɛ Mɔdekae mɛnjen Abihel bie Ɛsta waa kpɔɔ berɛ o ɡbaɡba bie la kooro be la, o ta laala ne komɛlbwa soŋɛ ka ja anɔ la Heɡai waa dɛ nyiŋi kooro haahna nɛɛ la aa ŋɔa ŋɔ a wer tɛo la. Nomɛlbwa ɡe waa na Ɛsta la, dɛ o dɛ nyin o wa.

¹⁶ Kooro Sɛksɛs kora dii bene anuanɛ Tɛbɛt korobie taa a tel kɛŋɔ Ɛsta la kooro be o koodem.

¹⁷ Ɛsta aa la o be la, kooro sie lɛ o nɛɛ kohona, o waa su o siwi dɛ ɡwaa o haahna ne toli la bwa. Asɛ o kpɔ ɡbɛrɛ waa baɡla kɛŋɔ ó ɛ o haah la piu. O kpɔɔ ɛ o haah chiɡ Vasti naa ta.

¹⁸ Kooro ɡelɔ ba ɛ kondikonjena a warɛ kohona tɛ Ɛsta waa ɛo o haah la. O yerɛ o nomonjena ne nɛra baa dɛ tomɔ la bwa, ba ba di kwaa dɛ lɛ ba sie. Dɛ ɛ awola tɔpere la ona tɔpere, dɛ kɛ nɛra kwaa kohona aa baɡle kan waa doa.

Mɔdekae lɛ Kooro mkpa

¹⁹ Ba berɔ ba toli la ne koodem bela nɛɛtena, dɛ Mɔdekae dɔ nomonome dɛ so koodem doonyoa bela.

²⁰ Mɔdekae aa ŋɔ Ɛsta be ŋɔ o bɛ ɡel ba jemɛ o nɛnsoo kɛŋɔ o ɛ Juu te la, o noɔ tɛo ɡɛ waa dɛ no o waa le o bechale saŋ bwa la.

²¹ Gɛ saŋ Mɔdekae aa lɔ toma ta koodem doonyoa la, dɛ bonɔɔna baa dɛ daah kooro dea doonyoa la bini banɛ baa dɛ yer ba Biɡtana ne Tɛrɛs la baah diu baa vɔrɔwe kɛ baa kpo kooroo.

²² Mɔdekae no waa la, dɛ ka taa baɡle kooro haah Ɛsta. Asɛ o ɡe kpɔ ka taa kooro be kɛŋɔ, ɡɛɛ Mɔdekae no dɛ ba bol o be.

²³ Kooro ɡelɔ ba nyiŋi waa la bini, asɛ dɛ na kɛŋɔ a ɛ kasinteŋ, dɛ ɡel ba saɡɛ ɡɛ nɛra banɛ la. O ɡelɔ ba chwerɛ ɡɛ waa la do Koojen Sɛksɛs harɛ waa dɛ di kora o ta la waa tɔn bini.