Ɛsta 1 - mzwDBL

Kooro Sɛksɛs vɛh o haah Vasti

¹ Waa aa chiɡ Koojen Sɛksɛs bere saŋ, ɡɛ saŋ waa di kora Pɛɛsea harɛ ta laanee nɔ. Dɛ o dɛ nyiŋi harɛre lafa fifraanɛ dɛ anuanɛ ta, le India harɛ dɛ́ kpoŋe ba kaa Itiopia harɛ ta.

² Dɛ o soɡe Susa waa ɛ Pɛɛsea koobwɛɛ ta.

³ Waa di kora bentooro te ta la, o yerɛ o nomonjena ne o nomonome bwa ba cheme, asɛ ba di kondikonjena dɛ lɛ ba sie. Pɛɛsea harɛ ne Midia harɛ laa nomonome, ne nomonome baa chɔ o harɛre bwa nyoo ne nomonjena balɔ.

⁴ O kpɔ kondɔɔh aa lɔ kara la mun bwa le asɛ nɛra ba naa, dɛ na ɡɛ o kondɔɔh ne o kora kan aa doa. O ɛ ɡɛ korobie anumɛl bwa.

⁵ Anɔ bwa habɔɔ la, Kooro Sɛksɛs berɔ ɛ kondikonjena la ane ja, dɛ yerɛ o koobwɛɛ Susa tena bwa, hale dɛ́ le nomonjena nɛɛ dɛ́ kaa dansaara bwa nɛ. Ba di kwaa la koodem bela, bodɛɛɡe bɛl baa du dadɛɛɡa ane lɔɡre tɔpera anuanɛ.

⁶ Bela baa di kwaa la, ba paaɡe pilare baa kpɔ bwedɛɛɡa ane soo siwi maa bar, asɛ dɛ kpɔ pateesanpoŋa ne pateesanburumre saɡre a ta bar. Ba berɔ pɛrɛ jisepoŋ ne jisekɔl pɛ, dɛ kpɔ do pateesanre la ta, dɛ lawɛ vɔwɛ suuɡapoŋa noniseɡa baa kpɔa paaɡe pilare la ta kaa. Ba kpɔ suuɡaswɛm ne suuɡapoŋa, dɛ ɛ bobɛl o ir nyundua. Ba kpɔ bwedɛɛɡa a yoɡ aa kpeɡa ampoŋa ne answɛɛma, ne anɔ la aa dɛ nyɛɡle, dɛ anɔ la aa ɛ burum bwa, dɛ kwaa bela harɛ o do wer.

⁷ Kooro la ɡelɔ ba do sen tɛ nɛra suuɡaswɛm numoli bini ba nyɔ. Numoli la koɡrɔ, asɛ sen la warɛ kohona a baɡle kooro bonya waa dɔa tɛ nɛra la.

⁸ O ŋɔ nɛra baa cheme bela la bɛlbwa nyɔ sen la ɡɛ del waa won nyɔ. O ŋɔ o bonɔɔna la be ŋɔ bá do nomɛlbwa ɡɛ del waa dɛ nyin.

⁹ Dɛ Kooro Sɛksɛs haah sɔne Vasti. O ɡe ɛ kondikonjena la ane, dɛ yerɛ haahna baa lɔ koodem bela la ba ba di.

¹⁰ Tɔpenuanɛ wee kooro aa nyɔ sen dɛ dɛɛ la, o yerɛ o bonɔɔna baa fɔɡɛ ba lure baa tomɔ la cheme. Banee, Mehuman ne Bista ne Haabona, ne Biɡta ne Abaɡta ne Sɛta, dɛ Kaakas.

¹¹ O ŋɔ bá lawɛ o haah Vasti ó kpɔ o ɡbɛrɛ waa dɛ baɡle kɛŋɔ o ɛ kooro haah la pi, dɛ́ kpɔɔ ba o sie. Vasti wer kɛrɛdɛ, anomanta, kooro la dɛ nyin kɛ Vasti kpɔ o te ba baɡle nomonjena, ne nɛra baa cheme bela la bwa, ásɛ ba na o wer waa doa.

¹² Kooro bonɔɔna aa la o haah Vasti be la, o vɛh bala. Kooro aa noa la, o baah diu kɛrɛdɛ.

¹³ Dɛ kooro dɛ nyin nɛra chao waane ta naa, o kpɔɔ dɛɛ bil wejerema baa jemɛ mmarare ne bela waa bini sie, ásɛ ba yon jao. Anomanta, o tao tɛ wejerema baa won waa bini baɡla,

¹⁴ dɛ dɔ dibɔra kooloŋ ta bela. Banee, Kaasena ne Sɛta ne Admata, ne Taases ne Meres ne Maasena, dɛ Mɛmokan. Gɛ nomonjena banuanɛ nɔ le Pɛɛsea ne Midia harɛre ta, dɛ ɛ nomonjena ɡwaa nomonome baa lɔ o kora bini bwa.

¹⁵ Ate, kooro ŋɔ o nomonome la be ŋɔ, “Vasti vɛh yera men Kooro Sɛksɛs aa tomɛ n bonɔɔna ŋɔ bá yerɔ ó ba la. Ɛrɛɛ mmara ɛɛ baɡle kɛ ń ɛo wɔ?”

¹⁶ Asɛ Mɛmokan che kooro ne o nomonjena la bwa sie dɛ chaŋe ŋɔ, “N naa kooro, dɛ he haah Vasti ɛ ɡɛ tenaa, o ɛ wechɔɡa. He ɡbo sie laa o lawɛ teɡɛ harɛ. Nomonjena ne nɛra baa lɔ harɛre nɔ bwa ta ɡe jao.

¹⁷ He haah waa waa ɛa nɔ, haahna noɔ waa, baa che a taa ba siwi sa ba jaranar, dɛɛ bol ŋɔ, ‘Kooro Sɛksɛs kwaraa aa do o bonɔɔna ŋɔ bá ka yerɛ o haah la, o vɛoh.’

¹⁸ Fini tɔpere nɔ, dɛ Pɛɛsea ne Midia harɛre nomonjena haahna no he haah waa waa ɛa nɔ naa, ba ɡee dɛɛ ɛ yaa ɡɛɛ. Haahna bwa aa yaa bu kpa, ásɛ ya baala ɡe baah ɛɛ di ba nɛ saŋ bɛlbwa.”

¹⁹ Mɛmokan ŋɔ, “N naa kooro, dɛ hɛɛ sɛoh waa, do mmarafale bá chwerɛ ja Pɛɛsea ne Midia harɛre mmarare ta, nomɛlbwa aa wola won beɡra bwa, kɛŋɔ Vasti bɛ hen Kooro Sɛksɛs sie tire kpa. O bɛ he haah ɡe ɛ kpa, bá nyin haah waa dɔ da dɛ ɡwaalo tɛɛ he moo.

²⁰ Dɛ ba ɡelɔ mmarafale nɔ kaa he kora harɛre aa do kan kohona nɔ bwa ta naa, anee dɛ́ ɡel haah te bɛlbwa ɛɛ duu o jaa, hale dɛ́ le nomonjena nɛ dɛ́ kaa dansaara nɛ.”

²¹ Kooro ne o nomonjena la sie lɛ Mɛmokan waa waa bola la ta, anomanta, o do mmara la.

²² O ɡelɔ ba kpɔ mmara la kaa harɛre waa dɛ di kora a ta la bwa ta. Ba chwerɔ tɛ harɛ bɛlbwa tena, ɡɛ ba chwera ne ba wobol aa doa, kɛŋɔ baa bɛlbwa ɛɛ di nomonome o dem.