Ɛfesos 6 - mzwDBL

Bechale ne ba nyare dɛ mɛɛnanar

¹ Bechale, hɛ́ɛ no he nyare ne he mɛɛnanar wa, dɛkalkɛŋɔ haa ɛ Kristo tena nɔ, anee chɛ kɛ hɛ́ɛ ɛ.

² Ba chwerɔ ŋɔ, “Duu he nya ne he mɛɛ,” dɛ berɛ chwerɛ nyobaɡa bɛl waa ja o ta, o ɛ Korowii Mmara waa tɔ sie baɡɛ nyoa ja o ta.

³ Kenii o ŋɔ, “Dɛ he dɛ ɛ ɡɛ naa, Korowii ɛɛ nyiŋi heyaa kɛrɛdɛ, dɛ́ tɛ heyaa mkpajaŋ harɛ nɔ ta.”

⁴ Mɛɛnanar, he bɛ he bii sibeɡra dɛ́ɛ do, ásɛ ba baah ɛɛ di. Hé kpoŋ ba kɛrɛdɛ dɛ́ɛ baɡ ba ŋwɛnɛre ne waa la bwa aa wera ya Dɔɔ be.

Bonɔɔna ne toli dɛ ba dɔɔranar

⁵ He banɔ la baa do heyaa bonɔɔna kɛɛ toli la, hɛ́ɛ no he dɔɔranar baa lɔ harɛ nɔ ta wa, dɛ́ɛ duu ba, dɛ́ ta tea dɛ́ɛ tom ba kɛŋɔ Yeesu Kristoo hɛɛ tomɛ.

⁶ He bɛ sɔn waa koh dɛ́ kpɔ bokpeɡa dɛ́ɛ ɛ toma nɛra sie ta, kɛ hɛ́ɛ ɛ toma kɛrɛdɛ ɡɛ aa chɛ kɛ Yeesu Kristo bonɔndɛɛɡa ne toldɛɛɡa aa dɛ ɛ, dɛ́ɛ ɛ toma he bambile bwa ne á su Korowii siwi.

⁷ Hé kpɔ silɛɛ dɛ́ɛ ɛ toma. Nɛn laa hɛɛ tomɛ. He Dɔɔ Yeesu Kristoo hɛɛ tomɛ.

⁸ Onee dɛɛ ba nomɛlbwa kem bɔe o tondɛɛɡa bwa waa ɛa ta. Dɛ bonɔɔ kɛɛ toloo ba doe noo, dɛ he nyuu hɛɛ di oo, he bwa dɛ ba tondɛɛɡa haa ɛa kembɔr dɔe Yeesu Kristo be.

⁹ Dɔɔranar, hɛ́ɛ ɛ he bonɔɔna ne toli ɡe kɛrɛdɛ, dɛ́ ɡel ba fiiɡa. He jemɔ kɛŋɔ he ne ba bwa Dɔɔ lɔ beŋkpoŋ nyundua. Waa bane nyine dɛɛ ɡwaa bane.

Korowii laa laala bwa kpɔe dɛ́ do wa

¹⁰ Anɔ la aa kaa laanee kɛŋɔ hé ɡel he ne ya Dɔɔ pɛ, ásɛ he won dɔ kpeɡri waa dɔa kohona la.

¹¹ Bɔnsam dɔ baradeɛre kɛrɛdɛ ɡa. Anomanta, hé kpɔ Korowii laa laala bwa do dɛ́ won yoo,

¹² dɛkalkɛŋɔ nɛn laa ya ne wɛɛ yo. Ya ne konchɔɡa aa bea yaa wola an na a dɔ kpeɡri harɛ nɔ ta nɛra baa wola Korowii tomɛ dɛ do biro ta la nɛ, ne konchɔɡa bwa soo siwi aa wara kohona laanee dɛɛ yo la.

¹³ Anomanta, a chɛ kɛŋɔ hé kpɔ Korowii laa laala bwa do kɛrɛdɛ, dɛ konchɔɡa la baa ŋɔ a yo heya aa, he won che kiŋkiŋ dɛ́ yo ka tonɛ dɛ́ ta won che.

¹⁴ Kenii hɛɛ ba ɛɛ dɛ won che. Hé kpɔ kasinteŋ ɛ kiriso, dɛ́ kpɔ waa aa toɡra ɛ laa batakaare,

¹⁵ dɛ́ kpɔ Amanesoma la aa dɛ baɡle nyopɛo dɔe la do he nakpale,

¹⁶ ásɛ dɛ kpɔ yarada tɔ he te ɡbemɡbe, dɛ́ won lɛ hɛma la Bɔnsam aa kpɔa su nii ta dɛɛ ta heyaa la bwa dɛɛ ta,

¹⁷ dɛ́ berɛ kpɔ lɛɛ Korowii aa lɛ heyaa la ɛ buni ɡbɛrɛ dɛ́ kpɔ pi, dɛ́ kpɔ o waa la aa ɛ o Domadɛɛɡe tokobii la kpoŋe.

¹⁸ Hɛ́ɛ soŋo harɛ bini soŋa nɔ bwa. Hé che Korowii Domadɛɛɡe la kpeɡri ta, dɛ́ɛ soŋo saŋ bɛlbwa. He bɛ dom dɛɛ chɔ. Hɛ́ɛ soŋe Korowii saŋ bɛlbwa dɛ́ɛ tɛ o nɛra la bwa.

¹⁹ Hɛ́ɛ soŋo dɛɛ tɛ n ɡe, ásɛ dɛ n dɛ ba waa bola aa, ń dɔ waa dɛɛ bol, dɛ́ dɔ bambile dɛ́ won pili o wesɔɔhla la le Amanesoma la bini.

²⁰ Maa ɛ Yeesu nachiɡe dɛɛ bol Amanesoma nɔ ba koh a waa do mɛ dea nɔ. Hɛ́ɛ soŋe Korowii ásɛ n ta dɔ bambile dɛɛ baɡla ɡɛ aa chɛ kɛ mɛɛ baɡla.

Kala aa ka mun

²¹ Tichikos waa ɛ ya dɔŋ yaa nyinu kohona wɛɛ ɛ ya Dɔɔ toma kasinteŋ ne la, onee dɛ́ ba baɡle n toma waa bwa ne ɡɛ maa doa.

²² A waa ɡela n tomɔ he be ásɛ o ba bol ya waa baɡle heya, dɛ́ do heyaa ɡbemba la.

²³ Ń Naa Korowii ne ya Dɔɔ Yeesu Kristo tɛ he ne yabala la bwa deŋnesɔɔhna, ne nɛnnyin ne yarada,

²⁴ dɛ́ sune he nɛ, dɛ́ cha he banɔ la bwa haa dɛ nyin ya Dɔɔ Yeesu Kristo bambile bwa ne aa wola jaɡa dɔe la.