Ɛfesos 5 - mzwDBL

Bochaah ta soɡa wa

¹ He ɛ Korowii bii waa dɛ nyin heya, anomanta, hé chaaro dɛ́ kpɔ o da.

² A wer kɛŋɔ he so dɔŋa nyina ne kɛŋɔ Yeesu Kristo aa nyin yaa dɛ sewɛ lɛ yaa a ɛ sarahadɛɛɡe dɛ tɛ Korowii la.

³ Kɛ jwamane ne wedoŋa ne sibeɡra dɔe dɔŋa kwaa ta te, he bɛ a waa dɛɛ bol á ba ɛ kɛŋɔ hɛɛ ɛa, dɛkalkɛŋɔ aa were tɛ Korowii nɛra.

⁴ Hɛ́ɛ nyiŋi kɛrɛdɛ he wobol bini, dɛ bɛ wobochɔɡa ne ɡɛnewobol ne wobosale dɛɛ bol. A ta chɛ kɛ hɛ́ɛ bola. Hé ɡel he wobol ɛ Korowii kpɛɛra wa.

⁵ Hé jemɛ kɛrɛdɛ kɛŋɔ nɛra baa dɛ bɔ jwamane, dɛɛ ɛ wedoŋa, ba sie ɛɛ beɡre kwaa ta la aa bɔr dɔe ba Yeesu Kristo ne Korowii Kora la bini. Sie beɡra kwaa ta do kɛŋɔ voɡ toma ken.

⁶ He bɛ ɡel nomɛlbwa kpɔ wepuu neɡre heya. A ɡɛ waa nɔ bwa waa Korowii baah di deŋnekpeɡ tena nɛɛ wɛɛ ba ba deŋne tɛra la.

⁷ Anomanta, he ne ɡɛ nɛra la bɛ wobɛlbwa ta pɛ.

⁸ He waa bwa fa ɛ biro bini wa, kɛ ya Dɔɔ Yeesu nomanta, he ɛ bochaah ta nɛra. Anomanta, hé ɡel he soɡa bini wobɛlbwa do kɛŋɔ bochaah ta nɛra.

⁹ Bochaah ta we-ɛɛlaa wedɛɛɡa ne wekaih dɛ kasinteŋ wa.

¹⁰ Anomanta, hé jemɛ waa haa ɛ aa lɛ Korowii sie,

¹¹ ásɛ dɛ ɡel biro bini waa ɛɛ. A ta tɔnɔ dɔe. Hé le a ne baŋ, ásɛ nɛra jemɛ ɡɛ aa doa.

¹² Waa ba yon sɔh dɛ́ɛ ɛ la aa were. A waa baɡla ɡba dɔ sihiih.

¹³ Ba le komɛlbwa ne bochaah ta naa, o kon soo siwi won nae kɛrɛdɛ.

¹⁴ Kon la bwa bɔr aa chaah o ta la, o ɡbaɡba dɛ baɡle o te. A waa ba yon ŋɔ, “He banɔ la haa sewa chɔ la, hé ir, ásɛ Kristo chaah he nɛɛ” la.

¹⁵ Anomanta, hɛ́ɛ nyiŋi he soɡa bini kɛrɛdɛ dɛ́ ɛ wejerema dɛ bɛ ɡɛn.

¹⁶ Wechɔɡa lole kɛrɛdɛ taraken. Anomanta, hé takapɔ dɛɛ ɛ wedɛɛɡa taraken nɔ haa dɔ bɔr dɛ́ ɛa nɔ.

¹⁷ Hé ɡel he nfɛrɛ nyae la, dɛ́ jemɛ waa Korowii aa dɛ nyin la kɛrɛdɛ.

¹⁸ He bɛ sen nyɔ kohona dɛɛ dɛɛ. Gɛ dɛ chɔɡ nɛn. Kɛ hé ɡel Korowii Domadɛɛɡe la so he nɛɛ kɛrɛdɛ,

¹⁹ ásɛ dɛ ɡel o wobol ne o yela do he bambile bini he bola dɛ́ɛ tɛ dɔŋa, dɛ́ɛ ɡo yela aa dɛ baɡle o waa la ne anɔ la aa dɛ kpɛɛro. Hé kpɔ silɛɛ dɛ́ɛ kpɛɛ he Dɔɔ he bambile bwa ne,

²⁰ dɛ́ɛ yerɛ ya Dɔɔ Yeesu Kristo sɔn, dɛ́ɛ jam N Naa Korowii waa bwa ta.

²¹ Hé bwa ɛɛ no dɔŋa be ɔma haa dɛ ɔmɛ Yeesu Kristo la nomanta.

Haahna ne ba jaranar

²² Haahna, hɛ́ɛ no he jaranar waa kɛŋɔ he Dɔɔ Yeesu Kristo waa hɛɛ no la,

²³ dɛkalkɛŋɔ baalee ɛ o haah nyu te, kɛŋɔ Yeesu Kristo aa ɛ asɔre tena bwa nyu te la. Banee ɛ o bwadabi wɛɛ lɛɛ ba.

²⁴ Anomanta, a chɛ kɛ haahna ɛɛ no ba jaranar waa wobɛlbwa ta kɛŋɔ asɔre tena aa dɛ no Yeesu Kristo waa la.

²⁵ Baala, hɛ́ɛ nyin he haahna kɛrɛdɛ kɛŋɔ ɡɛ Yeesu Kristo aa dɛ nyin asɔre tena dɛ koh ba waa sewɛ la.

²⁶ O sewɔ tɛɛ ba, dɛ́ ɡel ba won ɛ o nɛra, ásɛ ba doŋa bwa won le ba nɛ, o waa baa noa ne Korowii nee baa sɔ ba nomanta.

²⁷ O ɛ ɡɛ dɛ́ won kpɔ asɔre tena berɛ o handɛɛɡe, doŋa bɛlbwa aa wola toole o nɛ, waa wola kirihiah bɛlbwa dii, o bobɛlbwa aa wola jweremɛ, dɛ do wer ka tonɛ.

²⁸ Gɛɛ chɛ kɛ baala ɡee nyin ba haahna kɛŋɔ ɡɛ baa dɛ nyin ba ɡbabir bwadabii la. Baa bɛlbwa waa dɔ haah dɛɛ nyinu ɡɛ la, o ɡbabirii wɛɛ nyin la.

²⁹ Umee dɛ hah o ɡbabir ɔ? Nomɛlbwa dɛ nyiŋi o te kɛrɛdɛ dɛɛ nyiŋi o nyu ɡɛ Yeesu Kristo aa dɛ nyiŋi asɔre tena la.

³⁰ Ya bwa ɛ o bwadabii la pera.

³¹ Ba chwerɔ ŋɔ, “Gɛ nomanta, baa ɛɛ ɡel o nya ne o mɛɛ, ásɛ o ne o haah ka pɛ, ba nɛra banɛ la ɛ nɛmbeŋkpoŋ.”

³² A ɡɛ waa nɔ bini luŋri. N te be te, Yeesu Kristo ne asɔre tena waa ba baɡle ɡɛ la.

³³ Anomanta, he bɛlbwa takapɔ dɛ́ nyin o haah kɛŋɔ o ɡbaɡba, háah ɡe kpɔ duure dɛɛ tɛ o jaa.