Ɛfesos 1 - mzwDBL

¹ Men Pɔɔl aa too n tea asɛ o lee mɛ ŋɔ ń ɛ Yeesu Kristo torome la, menee chwerɛ tɔn nɔ. N chwerɔ dɛɛ tɛ Korowii nɛra ba wa aa toɡra dɛ do Ɛfesos, he ne Yeesu Kristo aa pɛa dɛɛ teŋɛ o waa ta kasinteŋ ne la.

² Ń Naa Korowii ne ya Dɔɔ Yeesu Kristo cha heya, dɛ́ tɛ heyaa bosɔɔhna.

Som nae aa le Yeesu Kristo domadɛɛɡe be pera

³ Hé ɡel ya kpɛɛ ya Dɔɔ Yeesu Kristo Mɛɛ Korowii, dɛkalkɛŋɔ o cha yaa wedɛɛɡa la bwa aa le o Domadɛɛɡe be la ta, asɛ yaa na som o be nyundua, pɛɛ ya ne Yeesu Kristo aa pɛa la wa.

⁴ Korowii felo dɛ le yaa tɛ o te saŋ la o fa aa wola harɛ ɡba tae la, dɛ ŋɔ o dɛ ba ɡela ya ne Yeesu Kristo pɛ yá won do kaih dɛ bɛ doŋa bɛlbwa dɔ o be.

⁵ O nyina waa dɛ nyin yaa waa o fel jemɛ ya waa cheɡ kɛŋɔ wɛɛ koh Yeesu Kristo waa dɛ́ kpɔ yaa ɛ o bii. O tetooraa o cheɡa ɡɛ.

⁶ O Binyini la waa o sune ya nɛɛ dɛ ta tea dɛ cha yaa ɡɛ, ásɛ nɛra won kpɛɛro ya sum waa dɛ na kohona la wa.

⁷ O Binyini laanee lɛ ya seo sewɛ. O chalee yawɛ yaa tɛ Korowii, asɛ o kpɔ ya wechɔɡa dɛɛ kɛ yaa. Anee dɛɛ baɡle suna waa sune ya nɛɛ kohona dɛɛ cha yaa la.

⁸ O ta dɛ cha yaa kɛrɛdɛ ya won dɔ wejema ne liire.

⁹ Gɛ bwa Korowii aa ɛ Yeesu Kristo waa cheɡ o tetoora ta a fa sɔh yaa la, o berɔ pili a bwa bini tɛ yaa ya won jemɛ ɡɛ aa su o siwi o cheɡa ɡɛ saŋ la,

¹⁰ asɛ a ɛ ɡɛ saŋ la waa liira la. O cheɡa kɛŋɔ wɛɛ ɡeloo nyundua ne harɛ ta komɛlbwa ɛ beŋkpoŋ, ásɛ Yeesu Kristo ɛ ba Dɔɔ.

¹¹ Ya ne Yeesu Kristo aa baa ɛ beŋkpoŋ la waa o le yaa tɛ o te. Korowii o yon dɛɛ cheɡ ɡɛ wobɛlbwa aa dɛ ba ɛɛ asɛ a yon ɛ ɡɛ waa dɛ nyin la, on fela le yaa tɛ o te

¹² ásɛ nɛra won nyiŋi ya banɔ la yaa fela dɔ hwɛɡa Yeesu Kristo waa ta la, dɛ́ kpɛɛro, dɛ́ tɛo jirima.

¹³ Baa baɡle heyaa kasinteŋ dɛ le Amanesoma la aa dɛ lɛ heyaa la ta la, he ɡba sɛoh dɛ ja beŋkpoŋri ya ne Yeesu Kristo aa ɛa la ta. Haa yarada Korowii dɛ kpɔ he te tɛo la, o kpɔ o Domadɛɛɡe tɛ heyaa ɡɛ waa baɡɛ heyaa nyoa la. O Domadɛɛɡe la lɔ ya nɛɛ dɛ ɛ nso kɛŋɔ ya ɛ Korowii nɛra.

¹⁴ O Domadɛɛɡe la taa a che ya jemɛ kɛŋɔ yaa dɔ kwaa Korowii aa baɡɛ o nɛra nyoa laanee. Anee baɡla kɛŋɔ Korowii ɛɛ lɛ o nɛra bwaa ta, dɛ́ lɛ sɔn ne jirima tɛ o te.

Pɔɔl wesoŋa

¹⁵ A waa ɡela maa no he yarada haa dɛ yarada ya Dɔɔ Yeesu Kristo dɛ kpɔ he te tɛo dɛɛ nyin Korowii nɛra ba wa aa toɡra bwa la,

¹⁶ n ta ɛɛ jam Korowii he waa saŋ bɛlbwa, dɛ soŋo dɛɛ tɛ heya.

¹⁷ Ásɛ n soŋe ya Dɔɔ Yeesu Kristo Mɛɛ Korowii waa dɔ jirima kɛrɛdɛ ɡa la, ó ja heyaa wejema, dɛ́ chaah he sie ásɛ he won dɛɛ jemɛ o waa saŋ bɛlbwa,

¹⁸ dɛ́ pili he sie, dɛ́ ɡel he won jemɛ hwɛɡa Korowii aa le heyaa he dɔ a do kan kohona la kɛrɛdɛ, dɛ́ jemɛ kɛŋɔ wedɛɛɡa waa baɡɛ o nɛra ba wa aa toɡra nyoa ŋɔ baa dɔɔ la kan taeh,

¹⁹ dɛ́ berɛ jemɛ kɛŋɔ kpeɡri Korowii aa dɔa dɛɛ cha ya banɔ la yaa yaradao la kan, a dɔŋa toole. Hé lii ɡɛ o fa aa cha Yeesu Kristo o kpeɡri ne la, dɛ́ jemɛ kɛŋɔ kpeɡri la tentenee ó kpɔ dɛɛ cha yaa.

²⁰ O ir Yeesu Kristo seo ta, dɛ kpɔɔ kaa o be ka so nomombɔr o be nyundua bela,

²¹ o dɔ kpeɡri kɛrɛdɛ ɡa, dɛ ɡwaa kpeɡri konchɔɡa aa bea yaa wola an na bwa soo siwi aa dɔa, dɛ dɔ sɔn ɡwaa komɛlbwa kɛɛ nomɛlbwa waa lole taraken ne nɛra baa dɛ ba bala tɔpere aa dɛ ba bala la ta.

²² Korowii kpɔ komɛlbwa ne nomɛlbwa bil Yeesu Kristo sie o tire ba nɛ, dɛ berɛ ɡel o ɛ asɔre tena bwa nyu,

²³ asɛ ba ɡe ɛ o bwadabi. Onee kana ɡa dɛ won su harɛ nɔ bwa, kɛ asɔre tena laanee ɡela o waa dɔ nyɛl ka tonɛ.