Daneɛl 8 - mzwDBL

Daneɛl pebal ne booh waa naa wepila ta wa

¹ Kooro Bɛlsasa aa di kora bene atoro ta la, men Daneɛl na wepila ja anɔ la n fa aa naa la habɔɔ.

² Wepila la ta la, n nao kɛŋɔ maa lɔ bwɛjen Susa baa ma danjwɛjen baro, o do Elam harɛ ta. Dɛ n cheɡɛ Ulai Moo nyoa,

³ asɛ n na pebal bɛl o dɔ nyeɡlejaŋa anɛ. A habɔɔ la, nyeɡle la bɛl berɔ ba kpeɡ dɛ do jaŋne ɡwaa o dɔŋ la.

⁴ N na pebal la kɛŋɔ waa chuɡri ola le wee cholibɔr ne weekaŋle nyunduabɔr dɛ weekaŋle harɛbɔr. Ol bɛlbwa ta wone che o sie kɛɛ dɛ won sɔɔh o kpeɡri nyoa. O ɛ ɡɛ a too o tea dɛ dɔ kpeɡri taeh.

⁵ N ta aa dɛ lii dɛ́ jemɛ ɡɛ waa nɔ mun la, dɛ booh bɛl le wee cholibɔr ba, dɛɛ chwa wɔrɔbe nɛɛ bobɛlbwa, kɛ dɛ o nakpale ɡe aa harɛ leɡe. O dɔ nyeɡlejen beŋkpoŋ o pa o sibie baah ta.

⁶ O ba pebal n fa aa nao o dɔ nyeɡlare anɛ dɛ che moo nyoa la be, dɛ ba chuɡru o bokpeɡa bwa ne.

⁷ N nao kɛŋɔ o kpɔ bandia kohona ka pu pebal la, asɛ dɛ chuɡo dɛ laa o nyeɡlare anɛ la kuuɡi. Pebal la sɔɔhnɔ o ta wone pu booh la yo, asɛ o chuɡo ɡo harɛ dɛ tiɡri o nɛ. Nomɛlbwa toole dɛ won lɛ pebal la.

⁸ Booh la baa dɔ kpeɡri kɛrɛdɛ, kɛ o ta aa dɛ di kpeɡri la, o nyeɡlejen la kuu asɛ nyeɡlare anaarɛ aa kana le paaɡe o buɡ ta. Bɛl chaɡɛ weekaŋle nyundua, bɛl chaɡɛ wee leebɔr, bɛl chaɡɛ weekaŋle harɛbɔr, asɛ bɛl chaɡɛ wee cholibɔr.

⁹ Nyeɡlejeɡa bɛl leɔ pa nyeɡlare la bɛl ta, dɛ di kpeɡri kohona chaɡɛ weekaŋle harɛbɔr ne wee leebɔr, dɛ kpoŋe kaa Israel Harɛdɛɛɡe la ta.

¹⁰ Nyeɡlejeɡa la wono kpeɡ kohona, dɛ ka tel nyundua laa kwaa aa wara dɛ ɛ weweela la be, asɛ dɛ taɡɛ a bini ane ta harɛ, dɛ tiɡri a nɛ.

¹¹ O ɛ o te nɛnjen kɛŋɔ Korowii dɔm baa wara kooro la ken, dɛ laa tɔpere bɛlbwa saraha baa ɛa dɛɛ tɛo la lɛ o be, dɛ ɡel doŋa kah Korowii Dea la.

¹² Nɛra fe aa kpoo kwaa dɛɛ ɛ sarahare tɔpere bɛlbwa la, wechɔɡaa ba berɛ dɛɛ ɛ. A che a ta Korowii waa aa dɔ kasinteŋ la nyoɡre. Wobɛlbwa nyeɡle la aa ɛa la chiɡu kɛrɛdɛ.

¹³ Asɛ n no kɛŋɔ nyundua torome bɛl aa dɛ bɔɔ o dɔŋ ŋɔ, “Saŋ besoo waa baa naa wepila la ta ɛɛ ba a jaɡa bala ɔ? Bɛweeree wechɔɡa aa do ɔma dɛ ba chiɡ tɔpere bɛlbwa sarahare naa ta nɔ ɛɛ ba ɡela ɔ? Saŋ besoo bá tiɡri Korowii dɔm baa wara ne Korowii Dea nɛɛ ka tel ɔ?”

¹⁴ Asɛ o chaŋe ŋɔ, “Aa ɛo ka tel chɔɔ ne jɔmɔre kaɡboŋa anɛ lafraatoro, baa wola won ɛ sarahare, a habɔɔ mɔɔ ba ɛ we-ɛɛla, dɛ́ laa doŋa bɛlbwa kpɔ Korowii Dea la ta, ó do ɡoroŋ tɛ Korowii.”

Wepila la mun baɡla

¹⁵ Men Daneɛl aa na wepila la dɛ ta ɛɛ nyin a mun dɛ jemɛ la, n den na komɛl o ba che n sie kɛŋɔ nɛn,

¹⁶ asɛ n no nomɛl taa Ulai Moo la nyoa o ŋɔ, “Gebreɛl, baɡle baa nɔ o wepila waa naa la mun.”

¹⁷ Ate, Gebreɛl ba che bɛne bela maa cheɡa la, asɛ n ɔmɛ kohona dɛ chole kpɔ sie pi harɛ. Anee o ŋɔ n be ŋɔ, “Nɛwɛnyini bie, n dɛ nyin he jemɛ kɛŋɔ wepila nɔ mun dɛ baɡle waa bwa jaɡa saŋ wa.”

¹⁸ O ta aa dɛ bol waa n be la, n sie bir mɛ n chole, asɛ o laɡ mɛ ir che chiŋ.

¹⁹ O ŋɔ n be ŋɔ, “N dɛ ba waa aa dɛ ba Korowii bandia kohona la habɔɔ bala he be bola. Wepila la dɛ baɡle waa bwa jaɡa saŋ wa.

²⁰ Pebal haa nao o dɔ nyeɡlare anɛ la cheɡɔ tɛ Midia ne Pɛɛsea koranar.

²¹ Asɛ booh la che tɛ Grik tena harɛ kooro. Nyeɡlejen waa pa o sie baah la cheɡɔ tɛ kooro waa tɔ sie.

²² O nyeɡle waa kua asɛ nyeɡlare anaarɛ le o buɡ ta la, dɛ baɡle kɛŋɔ harɛ la bini dɛ́ ba peɡra, ásɛ koranar banaarɛ ba di a kora, kɛ ba kora la aa won do kpeɡri kɛŋɔ sitɔ kora la.

²³ Koranar banaarɛ kora dii la aa dɛɛ ba a jaɡa la, baa ɛ deŋnekpeɡ kohonaa dɛ́ chɛ deŋnetɛra. Ásɛ kooro o nyu bini aa kpeɡa dɛɛ neɡre nɛra ba.

²⁴ Wɛɛ dɔ kpeɡrii taeh, kɛ o ɡbaɡba kpeɡri laa. Wɛɛ chɔɡ kwaa á ɛ nyokpoa, o wobɛlbwa waa ɛ do wer tɛo, dɛ́ chɔɡ nɛnjena ne Korowii nɛra bwa.

²⁵ Wɛɛ che kasinteŋ bɛ bola taa dɛ́ do wer. Wɛɛ dɛɛ liiruu kɛŋɔ o ɡwaa nomɛlbwa, dɛ che a ta chɔɡ nɛra ɡalɡa ɡɛ saŋ baa so dɛɛ lii kɛŋɔ deŋnesɔɔhna lole. Wɛɛ muɡli koranar bwa kooro baahnee, kɛ a bwa habɔɔ la, wɛɛ chɔɡoo dɛ nɛn kpeɡri ta laa.

²⁶ Chɔɔ ne jɔmɔre sarahare wepila baa baɡle a mun tɛɛ la ɛɛ ɛ kpelaa. Anomanta, marɛ wepila la nyoa, dɛkalkɛŋɔ aa la sie tama mɔɔ á chiɡ.”

²⁷ Men Daneɛl, dɛ n ɡwɛɡrɔ, n bwara wee mɛ la sie tama mɔɔ n ta won ba ir dɛ ɛ toma tɛ kooro. N ta wepila la mun noɛ, dɛ a ɡwaa n liire ta.