Daneɛl 6 - mzwDBL

Ba lawɛ Daneɛl do nyujentena bɔɔ bini

¹ Kooro Dareɔs aa baa di kora la, o liiro ŋɔ ó le nomonome lafa fifraanɛ bá chɔ harɛ bamperi nyoo, dɛɛ nyiŋi a ta, o harɛ la bwa ta,

² o le nomonjena batoro ɡe ba chɔ ba nyoa, dɛ́ nyiŋi na kɛŋɔ nomonome la dɛ ɛ wobɛlbwa aŋwɛnɛ ta, ásɛ wobɛlbwa won kaa ɡɛ kooro aa dɛ nyin. Daneɛl ne nɛra banɛ banee o le.

³ Daneɛl baɡlɔ kɛ o won toma ɛɛ dɛɛ ɡwaa o bala la, ne nɛra baa lee ba baa nyiŋi harɛ la bamperi ta la, asɛ o toma su kooro la siwi. A ɡɛ nomanta, kooro la liiro kɛŋɔ ó den kpɔ harɛ la waa bwa do o nɔn ta wɛɛ nyiŋi o ta.

⁴ Anee o bala nomonjena la ne nomonome baa lee ba baa nyiŋi harɛ la bamperi la, ɛɛ nyin Daneɛl bwara wechɔɡa dɛ́ le kora la be pera, kɛ ba ta wone. Ba ta o bwara wechɔɡe bɛlbwa nae, dɛkalkɛ o waa wer dɛ dɔ kasinteŋ.

⁵ Anee nomonome ne nomonjena la ŋɔ, “Yaa Daneɛl nɔ wechɔɡe bɛlbwaa dɔ, atane Korowii waa dɛ tomɔ la waa ta.”

⁶ Ate, ba bwa la Kooro Dareɔs be dɛ ka ŋɔ, “N naa kooro, Kórowii tɛɛ mkpajaŋ saŋ bɛlbwa dɛɛ la!

⁷ Ya nomonome bwa yaa dɛ nyiŋi Babelɔn harɛ nɔ ta, nomonome baa dɛ nyiŋi nɛra nɛ, ne nomonome baa chɔ harɛre nyoo, ne laa sitɔɔla dɛ nomonome baa jaa, sɛoh kɛŋɔ hen n naa kooro do mmara, dɛ nyiŋi na kɛŋɔ wɛɛ ɛ tomaa. Gel bɛlbwa jemɛ kɛŋɔ nomɛlbwa ta ŋwɛnɛ dɔe kɛŋɔ, ó ɡuŋi voɡ kɛɛ nɛn tɔpera fifraatoro nɔ baah ta, atane he ɡbo. Nomɛlbwa waa vɛh ɡɛ mmara nɔ la, bá lawɔ ka do nyujentena bɔɔ bini.

⁸ N naa kooro, do ɡɛ mmara la dɛ́ ɡel ba chwerɔ, ásɛ he kpɔ nɔn ɛɡɛ o ta, ásɛ nomɛlbwa bɛ won berɔ ɡɛ baa wola won Midia ne Pɛɛsea tena mmara berɛ la.”

⁹ Anomanta, Kooro Dareɔs ɡelɔ ba chwerɛ mmara la.

¹⁰ Daneɛl aa noa kɛ ba chwerɛ mmara la la, o la dem dɛ teeh kaa o abrɔsane doa dea bini. Dɛ dea la tokorore pilo dɛ chaɡɛ Jerusalam. O dɛ ɡuŋi dɛɛ soŋe Korowii keraatoro tɔpere bɛlbwa, dɛɛ kpɛɛro. Dɛ ɡɛɛ wɛɛ ɛ wubwa.

¹¹ Belaa nɛra baa la kooro be o do mmara la pɛ, dɛ la ka na kɛŋɔ Daneɛl ɡuŋo dɛɛ soŋe Korowii kɛŋɔ ó chao.

¹² Anomanta, ba la Kooro Dareɔs be dɛ ka ŋɔ, “He ta mmara doe ŋɔ tɔpera fifraatoro aa lɔ ya sie nɔ ta, nomɛlbwa waa ɡuŋi voɡ kɛɛ nɛn, dɛ he kooro laa o ba ɡuŋi dɛ́ soŋe la, bá lawɔ ka do nyujentena bɔɔ bini naa?” Ate, kooro chaŋe ŋɔ, “Mmara la ta chɔ le dɛ che kiŋkiŋ ɡɛ Midia ne Pɛɛsea tena mmara baa wola won berɔ la.”

¹³ Asɛ ba ŋɔ kooro be ŋɔ, “Daneɛl waa ja nɛra baa laɡ ba le Juda harɛ bojaŋ ba la aa hen duu, waa mmara haa doa la ɡe ta teŋɛ. O ta dɛ soŋe Korowii tɔpere bɛlbwa keraatoro.”

¹⁴ Kooro la aa no ɡɛ la, a we o nɛɛ kohona. Dɛ o siwi beɡrɔ wɛɛ nyin ŋwɛnɛ waa che o ta dɛ́ lɛ Daneɛl ta. O lii a waa ka tel kɛŋɔ wee aa joa.

¹⁵ Asɛ nɛra la berɛ pɛ dɛ la kooro be dɛ ka ŋɔ, “N naa kooro, lii kɛŋɔ Midia ne Pɛɛsea tena mmara bini la, dɛ kooro do mmara aa, baa won on berɛ.”

¹⁶ Ate, Kooro Dareɔs ɡel ba lawɛ Daneɛl ba, dɛ kpɔɔ ka ta nyujentena be a bɔɔ bini. Kooro la ŋɔ Daneɛl be ŋɔ, “Kórowii haa dɛ tomɔ tɔpere bɛlbwa la lɛɛ.”

¹⁷ Ba kpɔ bwe bɛl ba tɔ bɔɔ la nyoa, asɛ kooro la kpɔ o noniseɡ ne o nomonjena la noniseɡa ka pɛl bwe la ta, ɡɛ aa ɛ nomɛlbwa bɛ won ka lɛ Daneɛl ta.

¹⁸ Kooro la berɔ kaa o dem, o ta wone di kondikwaa jwaana la bwa, o sie ta lɛɛ kɛŋɔ ba ɛ silɛɛ waane bɛlbwa o dem ɡe. O ta wone chɔ dom.

¹⁹ Tɔ aa pera chɔmbibi la, kooro la iro dɛ ɛ warane la nyujentena bɔɔ la ta.

²⁰ Waa dɛ bɛne bɔɔ la la, o bambile chɔɡɔ o kpɔ takpeɡ dɛ yerɛ Daneɛl ŋɔ, “Daneɛl, Korowii waa lole saŋ bɛlbwa la bonɔɔ, Korowii haa dɛ tomɔ kasinteŋ ne tɔpere bɛlbwa la wono ba lɛɛ le nyujentena la be naa?”

²¹ Anee Daneɛl ŋɔ, “N naa kooro, Kórowii tɛɛ mkpajaŋ saŋ bɛlbwa dɛɛ la.

²² Korowii maa dɛ tomɔ la ɡelɔ o torome ba dɛ ba tɔ nyujentena la nyoo. A ta wone do mɛ bol, dɛkalkɛ Korowii nao kɛŋɔ n di bole, asɛ hen n naa kooro ɡe, n ta hen wechɔɡa bɛlbwa ɛɛ.”

²³ Kooro sie lɛo kohona, o ŋɔ bá ka lawɛ Daneɛl le bɔɔ la bini. Asɛ ba la ka lawɔ le bɔɔ la bini, dɛ komɛlbwa ta o bobɛlbwa ɛɛ, dɛkalkɛ o yarada Korowii waa dɛ tomɔ.

²⁴ Ate, Kooro Dareɔs ɡel ba ka kpɔ nɛra baa haŋɛ Daneɛl nyoa la ba tɛo, asɛ o ɡel ba kpɔ ba ne ba haahna, ne bii bwa ka do nyujentena bɔɔ la bini. Baa wola bɔɔ la mun ta tele mɔɔ kwara la, dɛ nyujentena la toɡri ba bini, dɛ paɡre ba hoɡa bwa.

²⁵ Asɛ Kooro Dareɔs chwerɛ tɔne ka tɛ wobol te bɛlbwa nɛra baa lɔ harɛre ne o harɛ ta bwa. O ŋɔ, “N dɛ na he bwa!

²⁶ N do mmara harɛ maa dɛ di kora o ta la kɛŋɔ, nomɛlbwa ɛɛ ɔmɛ dɛɛ duu Korowii Daneɛl aa dɛ tomɔ la. O ɛ Korowii waa lole saŋ bɛlbwa, o lole saŋ bɛlbwa dɛɛ la. O kora aa ɡu bwa, o kpeɡri waa dɔa ta jaɡa dɔe.

²⁷ Onee dɛɛ lɛ nɛn dɛ ɡel o dɔ o nyu dɛɛ di, dɛɛ ɛ nyokpowa, o we-ɛɛla ɡe do kan nyundua ne harɛ bwa. Onee lɛ Daneɛl nyujentena nɔn ta aa wola on kpoe.”

²⁸ Daneɛl wobɛlbwa wer tɛo ɡɛ saŋ Koojen Dareɔs aa soɡe kora ta, ne ɡɛ saŋ Pɛɛsea Kooro Saeros aa di kora.