Daneɛl 5 - mzwDBL

Nɔn waa chwerɛ danjwɛɛ ta wa

¹ Awola jwaana bɛl, Kooro Bɛlsasa ɡelɔ ba ɛ kondikonjena, o ta nɔn yerɛ o nomonjena nɛra kaɡboŋ, asɛ o ne baa di kwaa la dɛɛ nyɔ sen.

² Ba ta aa dɛ nyɔ sen la, Kooro Bɛlsasa tomɛ o bonɔɔna ŋɔ bá ka kpɔ suuɡaswɛm ne suuɡapoŋa numoli o mɛɛ Kooro Nebukadnesa fa aa paa le Korowii Dea waa lɔ Jerusalam la ba, ásɛ o ne o nomonjena ne o haahna dɛ o sɛnanar kpɔ nyɔ sen.

³ Ate, ba ka pa a ɡɛ suuɡaswɛm ne suuɡapoŋa numoli la le Korowii Dea Jerusalam ba, asɛ Kooro Bɛlsasa ne o nomonjena ne o haahna dɛ o sɛnanar kpɔ dɛɛ nyɔ sen.

⁴ Baa dɛ nyɔ sen la, dɛ ba dɛ kpɛɛ voɡa baa kpɔ suuɡaswɛm, ne suuɡapoŋa, ne bune, ne ayaawa, ne daa dɛ bwea ɛa la.

⁵ Buɡ la ta, dɛ nɛn nɔn ba dɛ chwerɛ koodem danjwɛɛ baa maalo ta, dɛ kandea cheɡɛ bela dɛɛ chaah. Asɛ Kooro Bɛlsasa ɛɛ nyiŋi ɡɛ nɔn la aa doa dɛɛ chwerɛ la.

⁶ O siebɔr ɡwaŋɔ, o liire chɔɡ, asɛ ɔmee lawɔ kohona o natuune ɛɛ sa dɛɛ lɔ dɔŋa.

⁷ Ate, kooro kpɔ takpeɡ ŋɔ bá ka yerɛ nɛra baa dɛ ɛ sɔmwe-ɛɛla, ne wejerema baa jemɛ weweela wa dɛ voɡra, ŋɔ bá ba. Baa bala la, Kooro la ŋɔ ba be ŋɔ, “Dɛ bɛlbwa wono kure kwaa baa chwera nɔ, dɛ baɡ mɛ a mun aa, mɛɛ ɡeloo bá tɔɔ yakɔl, dɛ́ kpɔ suuɡaswɛm jɔɡrɔre do o baŋa, ásɛ n habɔɔ ó ɛ nɛn waa teŋa tooro, dɛ dɔ kpeɡri kohona n kora harɛ nɔ ta.”

⁸ Ate, kooro wejerema la bwa laŋɔ, kɛ ba ta wone kure kwaa baa chwera la, á ba ɛ kɛŋɔ baa wonoo baɡle a mun.

⁹ Anomanta, ɔmee kohona lawɛ Kooro Bɛlsasa, o siebɔr ɡe foo kohona. O nomonjena liire chɔɡɔ, ba ta ɡɛ baa ɛ nae.

¹⁰ Kooro nya aa no kooro ne o nomonjena ɡbɔɡa la, asɛ o ir la dea baa di kondikonjena o ta la, dɛ ka ŋɔ, “N naa kooro, Korowii tɛɛ mkpajaŋ saŋ bɛlbwa! Bɛ ɡel a hae ásɛ he siebɔr foo ɡɛ!

¹¹ Baa bɛl lɔ he harɛ nɔ ta voɡa aa wola nɛwɛnyina ɛɛ tɛo kpeɡri ane. He mɛɛ kora dii saŋ la, o nao kɛŋɔ o ɛ wejereme, dɛ jemɛ waa kɛŋɔ voɡa ken. He mɛɛ Kooro Nebukadnesa ɡbaɡba kpɔɔ ɛ dobodobo tena, ne nɛra baa dɛ ɛ sɔmwe-ɛɛla, ne wejerema baa jemɛ weweela waa dɛ voɡra bwa nomoa.

¹² Gɛ baa la sɔne Daneɛl, dɛ he mɛɛ dɛ yerɔ Bɛltesasa. He mɛɛ nao kɛŋɔ o liire wer o dɔ wejema dɛɛ no waa mun, dɛ won deera mun baɡla. O won waa aa kpeɡa ne sɛɡla ɡe bwa mun baɡla. Gel ba la ka yerɛ Daneɛl, ásɛ o ba baɡle a mun.”

¹³ Anomanta, ba laŋɔ ka kpɔ Daneɛl ba kooro sie, asɛ o pɛɛro ŋɔ, “Henee Daneɛl, haa ja nɛra n mɛɛ Kooro Nebukadnesa aa laɡ ba le Juda harɛ ta dɛ ba Babelɔn nɛɛ la aa?

¹⁴ N noɔ kɛŋɔ voɡa aa wola nɛwɛnyina ɛɛ tɛɛ kpeɡri ane, he dɔ wejema dɛ dɔ liire ɡa.

¹⁵ Ba ba nɛra baa dɔ wejema ne nɛra baa dɛ ɛ sɔmwe-ɛɛla ne n be ŋɔ, bá kure kwaa baa chwera dawɛ bonɔ nɔ, dɛ́ baɡ mɛ a mun, kɛ ba ta wone baɡle a mun.

¹⁶ Taraken, n noɔ kɛŋɔ he won waa mun baɡla, waa a mun noe aa kpeɡa ɡe la, he won a mun baɡla. Dɛ he wono kure kwaa baa chwera nɔ dɛ baɡ mɛ a mun aa, mɛɛ tɔe yakɔlee, dɛ́ kpɔ suuɡaswɛm jɔɡrɔre do he baŋa, ásɛ n habɔɔ henee dɛ́ teŋɛ tooro, dɛ́ dɔ kpeɡri n kora ta harɛ nɔ ta.”

¹⁷ Anee Daneɛl chaŋe ŋɔ, “N naa kooro, ɡel koŋkɛɛla la do he be, kɛɛ kpɔ tɛ nomɛl. Ane a bwa, mɛɛ kure kwaa baa chwera dawɛ nɔɔ tɛɛ, dɛ́ baɡle a mun.

¹⁸ N naa kooro, Nemenɛ Korowii ɛ he mɛɛ Kooro Nebukadnesa koojen, dɛ tɛo jirima ne nyanyini dɛ kpeɡri kohona.

¹⁹ Kpeɡri waa tɛo nomanta, dɛ nomɛlbwa ne harɛre ta nɛra ne wobol bɛlbwa tena dɛ ɔmɔ dɛɛ chel. Nɛra waa dɛ nyin ba kpoora la, o kpoo ba. Banɔ la waa wola ba kpoora nyin la, o ɡel ba. Nomɛlbwa waa dɛ nyin o ɡɔɔ o sɔn la, o dɛ ɛo ɡɛ. Nomɛlbwa waa dɛ nyin o ba o ne harɛ ɡe la, o dɛ ɛo ɡɛ.

²⁰ Kɛ waa baa ɛ deŋnekpeɡ o nyu bini do kpeɡri wɛɛ ɛ mbarafo la, Korowii iru kora ta, jirima waa dɔa la paŋɔ.

²¹ Korowii doŋu le nɛra bini asɛ o liire do kɛŋɔ ol liire ken. O ne kpɔɡ bini keeɡore kaa so, wɛɛ chwe kpɔɡa kɛŋɔ nao ken. Mɛn ta o nɛɛ o bwara pweh, ka tel kɛŋɔ waa baa na kɛŋɔ Nemenɛ Korowiirii dɔ kora nɛwɛnyina aa dɛ di la kpeɡri, dɛɛ kpɔ nɛn waa dɛ nyin.

²² Kɛ hen, n naa Kooro Bɛlsasa, haa ɛ n naa Kooro Nebukadnesa bibaa la, he jemɛ ɡɛ waa nɔ bwa, kɛ he ta he te pwɛrɛ.

²³ He ɛ deŋnekpeɡ Korowii waa dɛ di kora nyundua nɛ, dɛ ka kpɔ numoli aa lɔ o Dea he ne he nomonjena, ne he haahna dɛ he sɛnanar kpɔ nyɔ sen. He kpɛɛ voɡa baa kpɔ suuɡapoŋa, ne suuɡaswɛm, ne ayaawa, ne bune, ne daa dɛ bwea ɛa aa wola na, aa wola waa no kɛɛ dɛɛ no waa mun la. Kɛ Korowii he mkpa ne he wobɛlbwa aa lɔ o nɔn ta la te, he ta duure kpɔe tɛo.

²⁴ A waa Korowii ɡel nɔn la ba chwerɛ danjwɛɛ la ta la.

²⁵ Waa waa chwera laanee teŋa nɔ, mene, mene, tekel, parsen.

²⁶ Mene munii kɛŋɔ, Korowii kure he tɔpera haa di he kora ta, dɛ ba a ne a jaɡa.

²⁷ Tekel munii kɛŋɔ, ba kpɔe chɔŋɛ kon baa kpɔa dɛɛ maɡɛ kwaa ta, dɛ na kɛ haa tɔɡɛ.

²⁸ Pɛrɛs ɡe munii kɛŋɔ, ba bɔne he kora bini tɛ Midia ne Pɛɛsea tena.”

²⁹ Ate, buɡ la ta, Kooro Bɛlsasa ɡel ba ka kpɔ yakɔl ba tɔ Daneɛl, dɛ kpɔ suuɡaswɛm jɔɡrɔre do o baŋa, asɛ dɛ ɛo nɛntoorote waa dɔ kpeɡri o kora ta harɛ la ta.

³⁰ Awola jwaana la tentenee ba kpo Babelɔn Kooro Bɛlsasa,

³¹ asɛ Midia te baa dɛ yerɔ Dareɔs lɛ kora la di, dɛ o di bene fifraanumɛl dɛ anɛ.