Daneɛl 4 - mzwDBL

Kooro Nebukadnesa nɛɛtena deera

¹ Kooro Nebukadnesa chwerɛ tɔn kaa harɛ bɛlbwa ta ka tɛ wobol bɛlbwa nɛra. O ŋɔ, “N dɛ na heya!

² N sie lɛo kohona kɛŋɔ ń bol nyokpowaa ne we-ɛɛla Nemenɛ Korowii aa ɛa tɛ mɛ.

³ Korowii nyokpowe-ɛɛla waa ɛa tɛ yaa ta nyoa dɔe. O waa waa dɛ ɛ ɡe kan taeh. O kora ta jaɡa dɔe, wɛɛ di koraa saŋ bɛlbwaa dɛɛ la.

⁴ Dɛ men Kooro Nebukadnesa soɡe n dem deŋnesɔɔhna ta, dɛ dɔ kondɔɔh kohona, n bwara sɔɔh mɛ koodem.

⁵ N deero asɛ dɛ na waane ɔmee laɡ mɛ. Maa chɔa la n na wepila, asɛ koŋkwaa ane soo siwi ɡale n sie ta a ɡel mɛɛ ɔmɛ kohona.

⁶ Anomanta, n ɡelɔ ba yerɛ Babelɔn harɛ ta wejerema bwa ŋɔ bá ba cheme n sie, dɛ́ baɡ mɛ deera la mun.

⁷ Ate, dobodobo tena, ne nɛra baa dɛ ɛ sɔmwe-ɛɛla, ne wejerema baa jemɛ weweela wa, dɛ voɡra bwa ba, asɛ n bol deera la baɡ ba, kɛ ba ta wone baɡ mɛ a mun.

⁸ A habɔɔ la, Daneɛl baa bera dɛɛ yerɔ Bɛltesasa maa kpɔ n voɡ sɔn pao la, ba n be. Voɡa aa wola nɛwɛnyina ɛɛ tɛo kpeɡri ane, anomanta, n bol n deera la o be.

⁹ Asɛ n ŋɔ Bɛltesasa waa ɛ dobodobo tena bwa nomoa la be ŋɔ, ‘N jemɔ kɛ voɡa aa wola nɛwɛnyina ɛɛ ane tɛɛ kpeɡri, asɛ wesɔɔhla bɛlbwa toole dɛ do kpeɡri tɛɛ. N deera maa deera laanee la. Baɡ mɛ a mun.

¹⁰ Wepila ane maa chɔa dɛ na laanee nɔ. N na daa bɛl, asɛ o che harɛ bɛl baah ta. Dɛ o kpeɡo kɛrɛdɛ.

¹¹ Dɛ daa la dɛ kpeɡ dɛɛ do kan kohona, dɛ kpeɡ kaa leɡe nyundua. Nɛn cheɡɛ harɛ jaɡa bobɛlbwa naa, o dɛ nao.

¹² O papooni wer, o nɔna warɛ harɛ nɔ ta nɛra bwa dɔ dɛɛ di. O chunchule taa kpɔɡ bini ola ɛɛ chɔ, jumbii ɛɛ sɔh a kɔne o kpala ta. Belaa kontaale bɛlbwa dɔ kwaa dɛɛ di.

¹³ N ta aa chɔa dɛɛ lii deera nɔ waa la, n nyiŋo dɛ na nyundua torome bɛl waa do ɡoroŋ, o tu le Korowii be nyundua dɛɛ ba.

¹⁴ O kpɔ takpeɡ ŋɔ, “Hé teŋe daa la ta dɛ́ choo o kpala, dɛ́ nɛɛ o papooni le o kpala la ta, dɛ́ nɔr o nɔna la merɛ. Hé doŋi kpɔɡ bini ola la le o chunchule ta, ásɛ dɛ doŋi jumbii la ɡe le o kpala ta.

¹⁵ Hé ɡel o muŋkpul la che, dɛ kpɔ buni jɔɡrɔre ne ayaawa vɔwɔ ó che kpɔɡ bini bela. Hé ɡel mɛn lee o nɛ, ásɛ o ne kpɔɡ bini ola so kpɔɡ bini, harɛ nɔ ta.

¹⁶ Hé ɡel o liire charɛ ó kpɔ ol liire, o bɛ nɛn liire dɔ ka tel kɛŋɔ bene anuanɛ aa baa kaa.

¹⁷ Nyundua torome la ne o bala baa ja o nɛɛ dɛ do ɡoroŋ la bee ɡɛ deŋnetɛra waa nɔ le. Anee dɛ́ ɡel nomɛlbwa waa soɡe le jemɛ kɛŋɔ, Nemenɛ Korowiirii dɛɛ di harɛre kora bwa kpeɡri, dɛ kpɔ dɛɛ tɛ nɛn waa dɛ nyin, hale dɛ kpɔ tɛ nɛra baa do pwɛre dɛɛ so kora ta.”

¹⁸ Deera men Kooro Nebukadnesa aa deera laanee nɔ. Bɛltesasa, baɡ mɛ a mun, dɛkalkɛ wejereme bɛlbwa toole n harɛ nɔ ta, dɛ́ won baɡ mɛ a mun. He te, voɡa aa wola nɛwɛnyina ɛɛ aa tɛɛ kpeɡri ane nɔ, hɛɛ wonoo baɡle.’ ”

Daneɛl deera mun baɡla

¹⁹ Ate, Daneɛl baa bera dɛɛ yerɔ Bɛltesasa la bwara yɔr kohona, o wili waa waa dɛ lii ta. Anomanta, kooro la ŋɔ, “Bɛltesasa, bɛ ɡel deera la kɛɛ a mun baɡla dɔe ɔmee.” Ate, Bɛltesasa chaŋe ŋɔ, “N naa kooro, n dɛ nyin kɛ deera nɔ ne a mun fe bɛ he waa ɛ, dɛ fee ɛ he dɔma wa.

²⁰ Daa haa deera nao o do kan dɛ do kpeɡri, dɛ kpeɡ kaa leɡe nyundua baa nao harɛ bɛlbwa ta,

²¹ o papooni do wer, o nɔna warɛ nomɛlbwa dɔ ane dɛɛ di, kpɔɡ bini ola chɔ o chunchule ta, asɛ jumbii sɔh a kɔne o kpala ta la,

²² n naa kooro, henee daa waa kpeɡa dɛ do kpeɡri la che tɛ. He kpeɡo dɛ kaa leɡe nyundua, asɛ dɛɛ di kpeɡri harɛre bwa ta.

²³ N naa kooro, he na nyundua torome waa do ɡoroŋ o le nyundua dɛɛ tu, dɛɛ ŋɔ, ‘Hé teŋe daa la ta, dɛ́ chɔɡo, hé ɡel o muŋkpul la che, dɛ́ kpɔ buni jɔɡrɔre ne ayaawa vɔwɔ, o ne o lune che kpɔɡ bini. Hé ɡel mɛn le nyundua lee o muŋkpul nɔ nɛ, ásɛ o ne kpɔɡ bini ola so kpɔɡ bini bene anuanɛ.’

²⁴ N naa kooro, deera la munii la. Gɛɛ Nemenɛ Korowii ŋɔ aa chiɡ he nɛɛ.

²⁵ Baa doŋii le nɛra bini he ne kpɔɡ bini ola ka so. Hɛɛ chwe kpɔɡaa kɛŋɔ nao, ásɛ mɛn ta he nɛɛ bene anuanɛ, dɛ́ ka tel kɛŋɔ haa ba jemɛ kɛŋɔ Nemenɛ Korowiirii dɛɛ di kpeɡri harɛre kora bwa ta. Korowii ɡboo dɛɛ le nɛn waa dɛ nyin, dɛ́ kpɔɔ so kora ta.

²⁶ Daa la muŋkpul ne o lune la nyundua torome la aa ŋɔa ó che la munii kɛŋɔ, dɛ he baa jemɛ kɛŋɔ Korowiirii dɔ kpeɡri harɛ nɔ bwa ta naa, he kora ɛɛ berɔɔ che.

²⁷ Anomanta, n naa kooro, no waa maa dɛ jae a ta nɔ. Gel wechɔɡa ɛɛ, dɛɛ ɛ anɔ la aa toɡra, dɛ́ ɡel he nyubinikpeɡ la, dɛɛ na nɛra baa dɛ fiɡ ba sum. He wobɛlbwa ɛɛ do werii dɛɛ la.”

Deera la baa ɛ ɡɛ

²⁸ A ɡɛ waa la bwa chiɡ Kooro Nebukadnesa nɛ.

²⁹ Korobie fi dɛ anɛ habɔɔ, dɛ Kooro Nebukadnesa dɛ valɛ Babelɔn koodem saldoa.

³⁰ O ŋɔ, “Bwɛjen Babelɔn waa do kan ken nɔ, menee doo o ɛ n koobwɛ, dɛ́ kpɔ baɡle n kpeɡri kohona ne n jirima maa dɔa.”

³¹ O nyoa ta lee, dɛ taa bɛl le nyundua dɛ ŋɔ, “Kooro Nebukadnesa, dɛɛ no, kpeɡri haa dɔa he kora ta la le he nɔn ta.

³² Baa doŋii le nɛra bini he ne kpɔɡ bini ola ka so. Hɛɛ chwe kpɔɡaa kɛŋɔ nao bene anuanɛ, dɛ́ ka tel kɛŋɔ haa ba jemɛ kɛŋɔ Nemenɛ Korowiirii dɛɛ di kpeɡri harɛre kora bwa ta. Korowii ɡboo dɛɛ le nɛn waa dɛ nyin, dɛ́ kpɔɔ so kora ta.”

³³ Waa nyundua torome la aa ŋɔa aa chiɡ Kooro Nebukadnesa nɛɛ la ɛ kpela. A chiɡ o nɛɛ buɡ la ta, asɛ ba doŋu le nɛra bini, asɛ o chwe kpɔɡa kɛŋɔ nao ken. Mɛn ta o nɛ, o nyumpona do kɛŋɔ kee kena ken, o nonie ɡe kpeɡ kɛŋɔ jumbie nanie ken.

³⁴ Kooro Nebukadnesa ŋɔ, “Bene anuanɛ la aa baa kaa la, n ha sie nyiŋi nyundua, ate dɛ n sie chole harɛ, asɛ n kpɛɛ Nemenɛ Korowii, dɛ kpɛɛro dɛ tɛo jirima kɛŋɔ onee lole saŋ bɛlbwa dɛɛ la. Wɛɛ di kora saŋ bɛlbwaa dɛɛ la, o kora ɛɛ cheo saŋ te bɛlbwa.

³⁵ Nɛra baa lɔ harɛ nɔ ta waa ta komɛlbwa ɛɛ o be. Gɛ waa dɛ nyin laanee wɛɛ ɛ kwaa aa lɔ nyundua ne harɛ nɛra nɛ. Nomɛlbwa aa won tɔŋlo kɛɛ dɛ́ bɔɔro waa waa ɛa.

³⁶ Gɛ saŋ n sie aa chole harɛ la. Korowii berɔ tɛ mɛ duure ne jirima n kora kan waa doa la wa. Nɛra baa dɛ ja mɛ ne n nomonome nyin n bɔr, dɛ berɛ kpɔ mɛ cheɡ kora ta, asɛ n berɛ dɔ kpeɡri waa ɡwaa wubwa kon la.

³⁷ Name, men Kooro Nebukadnesa, n dɛ kpɛɛ Korowii waa dɛ di kora nyundua, dɛɛ tɛo sɔn ne jirima dɛkalkɛŋɔ, o waa toɡrɔ o wobɛlbwa ɡe do wer. Nomɛlbwa waa dɛ ɡɔɔ o te la, o won naate ne harɛ bala.”