Daneɛl 3 - mzwDBL

Kooro Nebukadnesa suuɡaswɛm voɡ

¹ A habɔɔ la, Kooro Nebukadnesa ɡelɔ ba kpɔ suuɡaswɛm kwaa voɡ, o jaŋne dɛ́ kaa nyundua lɔ naɡale fifraanuanaarɛ, asɛ o paɡri lɔ naɡale anuanaarɛ. Asɛ dɛ ka cheɡo Babelɔn deŋɡarere dor harɛ ta bobɛl waa chɔa kaa baa yerɛ bela Dura.

² Asɛ dɛ yerɛ harɛ la ta nomonome ŋɔ bá cheme, koranar ne nomonome baa chɔ harɛre nyoo, ne laa sitɔɔla ne nɛra baa dɛ nyiŋi suuɡare ta, ne nomonome baa dɛ bol waa kɔɔto, dɛ nomonome baa kaa dɛ do harɛ la ta bwa ŋɔ bá ba cheme, ásɛ dɛ pili voɡ la.

³ Nomonome la bwa aa laŋa dɛ́ ka pili voɡ la, ba kaa che o sie.

⁴ Ate, kooro keame bɛl ir che dɛ kpɔ takpeɡ ŋɔ, “Harɛre nɛra bwa ne wobol bɛlbwa nɛra haa le he harɛre ta ba, waa kooro aa dɛ do heyaa a ta laanee kɛŋɔ,

⁵ dɛ he ba dɛ no bɛle, ne kalipere, ne janjelare, dɛ kwaa bwa soo siwi baa kpɔa dɛɛ lɔ yela sii aa, a chɛ kɛ he ɡuŋi, dɛ́ duu voɡ Kooro Nebukadnesa aa kpɔ suuɡaswɛm ɛo dɛ cheɡo la.

⁶ Nomɛlbwa waa vɛh ɡuŋa dɛ́ duu voɡ la la, baa kpɔɔ ka do nii aa lɔ fononoo binii.”

⁷ Anomanta, harɛre nɛra bwa ne wobol bɛlbwa nɛra baa le harɛre ta ba aa no bɛle, ne kalipere, ne janjelare dɛ kwaa bwa soo siwi baa kpɔa dɛɛ lɔ yela sii la, ba den ɡuŋi dɛ duu suuɡaswɛm voɡ Kooro Nebukadnesa aa cheɡo la.

⁸ A ɡɛ saŋee, Babelɔn harɛ wejerema bane baa jemɛ weweela waa la Kooro Nebukadnesa be, dɛ ka chɔɡ Juu tena tɛo.

⁹ Ba kaa ŋɔ o be ŋɔ, “N naa kooro, Korowii tɛɛ mkpajaŋ!

¹⁰ N naa kooro, he do mmara ŋɔ nomɛlbwa waa no bɛle, ne kalipere, ne janjelare dɛ kwaa bwa soo siwi baa kpɔa dɛɛ lɔ yela la, ó ɡuŋi dɛ́ duu suuɡaswɛm voɡ la.

¹¹ Dɛ berɛ ŋɔ nomɛlbwa waa wola ɡuŋe dɛ duuru la, bá kpɔɔ do nii aa lɔ fononoo bini.

¹² Sadrak ne Mesak dɛ Abɛdnɛɡo baa ɛ Juu tena he kpɔ ba chɔ Babelɔn harɛ nɔ waa nyoa la, ba vɛh he waa la. Baa he voɡa tomɛ, dɛ vɛh suuɡaswɛm voɡ haa kpɔa cheɡ la ɡe ɡuŋa.”

¹³ Ate, Kooro Nebukadnesa baah di kohona, asɛ o ɡel ba ka yerɛ Sadrak ne Mesak dɛ Abɛdnɛɡo, dɛ ba ba ne o sie.

¹⁴ Anee Kooro Nebukadnesa bɔɔ ba ŋɔ, “A ɛ kpela kɛŋɔ he vɛh n voɡa la ne suuɡaswɛm voɡ maa cheɡo la toma aa?

¹⁵ Dɛ he baa no bɛle, ne kalipere, ne janjelare dɛ kwaa bwa soo siwi baa kpɔa dɛɛ lɔ yela sii, dɛ ɡuŋi suuɡaswɛm voɡ la aa, dɛ a wer. Kɛ dɛ he vɛh ɡuŋa aa, baa denoo kpɔ heyaa ka do fononoo nijena aa dɛ hɔ kohona la bini. Dɛ voɡ besoo dɛ́ won lɛ heyaa le n nɔn ta jaɔ?”

¹⁶ Asɛ Sadrak ne Mesak dɛ Abɛdnɛɡo chaŋe ŋɔ, “N naa kooro, a ta hiaih kɛŋɔ ya won lɛ ya te he sie waa nɔ ta.

¹⁷ Dɛ ba kpɔ yaa ka do fononoo nijena aa dɛ hɔ kohona bini naa, Korowii yaa dɛ tomɔ la ɛɛ won lɛ yaa le o ta, dɛ́ won lɛ yaa he nɔn ta ɡe.

¹⁸ N naa kooro, hale dɛ Korowii ta yaa ba lɛɛ kwaraa naa, yaa he voɡa kɛɛ kon haa kpɔ suuɡaswɛm kwaaro laanee tomɛ.”

¹⁹ Ate kwaraa Kooro Nebukadnesa baah di Sadrak, ne Mesak dɛ Abɛdnɛɡo nɛɛ kohona, o ŋɔ ba kwaa fononoo nii la do a ɡwaa ɡɛ aa doa la keraanuanɛ,

²⁰ dɛ ŋɔ o laa tena ba bwara aa kpeɡa la bini bane be ŋɔ, bá vɔrɔwe Sadrak ne Mesak dɛ Abɛdnɛɡo, dɛ́ kpɔ ba ka do fononoo nijena aa dɛ hɔ la bini.

²¹ Ate, ba vɔrɔwe nɛra batoro la, dɛ ba ta do batakaarejaŋa ne yapejaŋa, dɛ yapondɛɛɡa baa kpɔa vɔrɔwe nyuune bwa ne laala baa doa bwa, dɛ kpɔ ba ka ta fononoo nijena la bini.

²² Gɛ kooro waa la aa hiah, ne ɡɛ nii laa dɛ hɔ a nyoa do kpeɡri kohona nomanta, nii la nyaa laa tena la baa kpɔ Sadrak ne Mesak dɛ Abɛdnɛɡo ka ta nii la ta la, ba serewe,

²³ asɛ Sadrak ne Mesak dɛ Abɛdnɛɡo baa vɔɡ ba la ka le nijena la baah ta.

²⁴ Buɡ la ta, Kooro Nebukadnesa den jah boyɔra ne, asɛ o bɔɔ o nomonome ŋɔ, “Nɛra batoro laa ba vɔrɔwe dɛ kpɔ ba ta nijena nɔ ta la aa?” Ba chaŋe ŋɔ, “N naa kooro, ɡɛɛ.”

²⁵ Asɛ kooro ŋɔ o nomonome la be ŋɔ, “Hé nyiŋi na. N dɛ na nɛra banaarɛ baa valɛ nii la ta, ba ta ban vɔrɔwɛ, ba ta fueh ɡe. Onɔ la waa jaa naarɛ la dɛ le nyundua torome.”

²⁶ Ate, Kooro Nebukadnesa ka che bɛne fononoo nijena la nyoa bɔr, dɛ kpɔ takpeɡ yerɛ ŋɔ, “Nemenɛ Korowii bonɔɔna Sadrak ne Mesak dɛ Abɛdnɛɡo, hé le nii la ta ba!” Buɡ la ta, ba den le ba che.

²⁷ Asɛ koobii ne nomonome baa chɔ harɛ nyoo, ne laa sitɔɔla dɛ nomonome baa kaa dɛ do harɛ la ta bwa ba bar nɛra batoro la cheme dɛɛ nyiŋ ba. Ba nao kɛŋɔ nii la ta ba bwadabii fueh, á ba ɛ kɛŋɔ ba nyumpona ɛɛ nyaaroo, ba laala baa doa ɡe ta fueh. Nii sɔɔh ɡe ta ba nɛɛ tɔe.

²⁸ Kooro Nebukadnesa ŋɔ, “Hé kpɛɛ Korowii Sadrak, ne Mesak dɛ Abɛdnɛɡo aa dɛ tomɔ la. O ɡelɔ o nyundua torome ba, dɛ ba lɛ o bonɔɔna. Ba kpɔ ba te tɛo, dɛ vɛh waa maa do ba a ta, dɛ sɛh kɛŋɔ ba sewɔ bɔ ba be kɛŋɔ ba ɡuŋi kɛɛ dɛ tomɛ voɡ bɛlbwa, atane Nemenɛ Korowii baa dɛ tomɔ ɡbo.

²⁹ Taraken n dɛ do mmara kɛŋɔ, harɛ bɛlbwa nɛn kɛɛ nomɛlbwa kɛɛ wobol bɛlbwa nɛra bol waa yaɡɛ Korowii Sadrak, ne Mesak dɛ Abɛdnɛɡo aa dɛ tomɔ la aa, bá teŋni naate bini, ásɛ o dem berɛ dimɡbia. Dɛkalkɛŋɔ voɡ bɛlbwa toole, dɛ́ won lɛ nɛn waa aa do ken nɔ ta.”

³⁰ Ate, kooro la berɛ ɛ Sadrak, ne Mesak dɛ Abɛdnɛɡo nomonjena Babelɔn harɛ bwa ta.