Daneɛl 12 - mzwDBL

Waa bwa jaɡa saŋ

¹ Nyundua torome waa do laalapoŋa la ŋɔ, “A ɡɛ saŋ la, nyundua toroma nomoa Maekel waa dɛ daah he nɛra la ɛɛ leo ba. Gɛ saŋ ɛɛ ɛ wahala saŋee, le harɛ nɔ mumpar ba le fini a dɔŋa ta balɛ bwa. Gɛ saŋ la, he harɛ ta nɛra baa chwerɛ ba sɔna do Korowii tɔn bini la, ɛɛ dɔ lɛɛlee.

² Nɛra ɡalɡa baa serewa ɛɛ berɔ ir, ásɛ bane kaa mkpa aa wola jaɡa dɔe bwa ta, bane ɡe kaa weweele aa wola jaɡa dɔe bwa ne sihiih ta.

³ Nomonome baa ɛ wejerema la ɛɛ chaahnoo kɛŋɔ nyundua, ásɛ banɔ la baa baɡle nɛra bane waa a che a ta ba waa toɡre la, baa doo kɛŋɔ weweela dɛɛ chaah saŋ bɛlbwa.”

⁴ Ate, nyundua torome la ŋɔ n be ŋɔ, “Daneɛl, laa tɔn la tɔ dɛ́ kpɔ kwaa marɛ o nyoa ka tel waa bwa jaɡa saŋ. Nɛra ɛɛ warɔɔ dɛ́ la dɛɛ ba, dɛɛ nyin Korowii waa la dɛ́ jemɛ, ásɛ wejema warɛ taeh.”

⁵ Asɛ men Daneɛl nyiŋi dɛ na baala banɛ ba che nee bɛl nyoa, bɛl lɔ o baŋ le, bɛl ɡe do o baŋ bonɔ.

⁶ Ate, bɛl pɛɛ nyundua torome waa do laalapoŋa la, dɛ o cheɡɛ nee la nyunduabɔr dɛ ŋɔ, “Dɛ́ ka tel saŋ besoo ɡɛ nyokpowaa nɔ ɛɛ ba ɛɛ yɔ?”

⁷ Nyundua torome la ir nɔɔra anɛ bwa nyundua, asɛ n no ɡɛ waa ŋwɛɛ Korowii Waa Lole Saŋ Bɛlbwa sɔn ta ŋɔ, “Aa ɛ bene atoro ne faah. Gɛ saŋ nɛra baa teŋɛ Korowii nɛɛ bonyɛɡa aa ba a jaɡa la, dɛ waa nɔ bwa ɡe chiɡo.”

⁸ N no waa waa bola, kɛ n ta a mun noɛ. Anomanta, n bɔɔrɔ ŋɔ, “N dɔɔ, ɛrɛɛ waa nɔ ɛɛ ba chiɡa ka tonɛ ɔ?”

⁹ O ŋɔ, “Daneɛl, kaa taraken, dɛkalkɛ a ɡɛ waa nɔ ɛ waa aa chɛ kɛ ba laa tɔ, dɛ marɛ o nyoa ka tel waa bwa jaɡa saŋ.

¹⁰ Baa laa doŋaa kpɔ nɛra ɡalɡa nɛɛ bá waa toɡre wechɔɡa aa ba nɛɛ do, kɛ nyubinikpeɡ tena ɛɛ teŋɔɔ dɛɛ ɛ nyubinikpeɡ. Nyubinikpeɡ te bɛlbwa aa a munii no, kɛ wejerema te ɛɛ no a munii.

¹¹ Le ɡɛ saŋ baa ɡel tɔpere bɛlbwa sarahare ɛɛ, dɛ́ kpɔ konchɔɡechɔɡe waa dɛ paɡre bwɛɛ la pa la ɛɛ ɛ tɔpera kaɡboŋ lafraanɛ fifraanuanaarɛɛ.

¹² Nɛra baa so kasinteŋ ne, dɛ́ kpa ka tel tɔpera kaɡboŋ lafraatoro fifraatoro dɛ anue aa ba kaa la, ba na som.

¹³ Kɛ hen Daneɛl, he te kaa, di kasinteŋ ka tel waa bwa jaɡa saŋ. Hɛɛ sewɔɔ kɛ hɛɛ iruu, dɛ́ dɔ he kembɔr waa bwa jaɡa saŋ.”