Daneɛl 11 - mzwDBL

¹ Midia Kooro Dareɔs kora dii benanyoa beŋkpoŋ ta la, n cheɡɛ o habɔɔ dɛ chao.

Ijipt ne Siiria harɛre kora wa

² Nyundua torome Maekel waa dɛ daah Israel harɛ la ŋɔ, “Namee mɛɛ ba kasinteŋ la he be bola. Koranar batoro ɛɛ ir Pɛɛsea harɛ taa, ásɛ naarɛte ɡe ba dɛ́ ba dɔ suuɡa ɡwaa banɔ la bwa. O baa dɔ kpeɡri dɛ le o kondɔɔh la ta naa, wɛɛ di nomɛlbwa liiree ba yo Grik tena harɛ kooro.

³ Ásɛ kooro bɛl ɡe waa do kpeɡri ba ir, dɛɛ di kora kpeɡri ne ɡɛ waa dɛ nyin.

⁴ Gɛ kooro la balaa, o harɛre waa dɛ di kora a ta la dɛ ba peɡra, dɛ bɔne bɔre anaarɛ. O naanar aa koraa dɔ di. Gɛ kooro la aa kpeɡrii dɔ kpa, dɛkalkɛ o kora la ɛɛ ɡuu, dɛ́ berɛ bane kon.

⁵ Ijipt kooro ɛɛ do kpeɡrii, kɛ o laa sitɔɔ bɛl ɛɛ do kpeɡrii ɡwaalo, dɛ́ di o kora kpeɡri kohona ne.

⁶ Aa ba la sie la, Ijipt kooro ne Siiria kooro ɛɛ fɔwɛ fɔwee, ásɛ Ijipt kooro kpɔ o bihaah tɛo ó mo. Kɛ ba darame la aa biɡri, ásɛ haah la ne o jaa, ne o bie, dɛ toli baa teŋɛ o nɛɛ kaa la, bá kpoo ba bwa.

⁷ Aa biɡri bɛlbwa ásɛ Ijipt kooro bihaah la lole bɛl ba iru, dɛ́ ba so o buɡ ta. Wɛɛ kpɔ laa tenaa ka yo Siiria kooro, dɛ́ jo o koodem dekpeɡ bini, dɛ́ pɔ ba nɛ.

⁸ Wɛɛ pa ba voɡa baa loɡa, ne suuɡaswɛm dɛ suuɡapoŋa koŋkwaa a yoɡ aa kpeɡa, dɛ́ kaa a bwa ne Ijipt harɛ. A habɔɔ deŋnesɔɔhna aa ba tama la,

⁹ Siiria kooro ɛɛ kpɔ o laa tenaa ka lɔ tɔ Ijipt kooro ne o nɛra nɛ, kɛ waa won, dɛ́ berɛ kaa o harɛ ta.

¹⁰ Siiria kooro la bii ɛɛ boa laa tena damanta nyoa, dɛ́ kpɔ ba te, dɛ́ ka yoo ba. Baa su harɛ la ta bobɛlbwaa kɛŋɔ nee yon su dɛ́ palɛ dɛɛ kpɔ bobɛlbwa la, dɛ́ yo ka tel dekpeɡ waa lɔ ba dɔma bwɛjen doonyoa.

¹¹ Ijipt kooro ɛɛ kpɔ bandiaa kpɔ o laa tena, dɛ́ ka yo Siiria kooro, dɛ́ pɔ o ne o laa tena damanta la nɛ.

¹² Ijipt kooro la ɛɛ maŋkura o te pɔe waa pɔ ba nɛɛ la waa, ne laa tena waa kpoo ba warɛ la, kɛ waa won teŋɛ dɛɛ pɔ o dɔma nɛɛ ɡɛ.

¹³ Siiria kooro la ɛɛ berɛ habɔɔ ka kpɔ laa tena baa ɡwaa wubwa tena la, ásɛ tɔpedɛɛɡe ta la, ó kpɔ laa tena baa dɔ dɔmkwaa warɛ ka yo Ijipt kooro.

¹⁴ A ɡɛ saŋ la, nɛra ɡalɡa ɛɛ ɛ Ijipt kooro deŋnekpeɡii, ásɛ hen Daneɛl, he harɛ ta nɛra bane baa ɛ naɡrenyine ɡe ɛ deŋnekpeɡ wepila baa naa la wa, kɛ baa horɔɔ.

¹⁵ Anomanta, Siiria kooro ɛɛ kpɔ o laa tenaa ba chɔ bar bwɛjen baa ma danjwɛjen baro la, dɛ́ pɔ o nɛra nɛ. A ba ɡɛ naa, Ijipt laa tena aa won yo kpa, hale ba laa tena baa jemɛ yoi aa bokpeɡaa dɔ, dɛ́ won che a nyoa.

¹⁶ Siiria kooro waa ka lɔ tɔ ba nɛɛ la, wɛɛ ɛɛ baa ɡɛ waa dɛ nyin, nomɛlbwa aa wola won tɔɔ ŋwɛnɛ. Wɛɛ ka che Israel Harɛdɛɛɡe la taa, ásɛ dɛɛ di kpeɡri o ta.

¹⁷ Siiria kooro ɛɛ dɛɛ nyinuu kɛ o kpɔ o harɛ ta laa tena bwa ba. Waa dɛ nyin o chɔɡ o dɔma harɛ nomanta, o ne Ijipt kooro la ɛɛ fɔwɛ fɔwee, ásɛ o kpɔ o bihaah tɛo ó mo, kɛ ane a bwa, aa on cha.

¹⁸ A habɔɔ la, wɛɛ berɔ kpɔ sie chaɡɛ mpo nyoa harɛre nɛra nɛ. Wɛɛ yoo baa, dɛ́ pɔ ba ɡalɡa nɛ, kɛ laa nomoa bɛl ɛɛ le harɛfale bɛl taa, dɛ́ ba pɔ o nɛɛ dɛ́ sɔɔh o nyoa, ásɛ maŋkurae waa dɛ maŋkura o te la ɡure o nyu ta.

¹⁹ Anɔ ɡe habɔɔ, wɛɛ berɔ kaa o ɡbaɡba harɛ dekpeɡa taa, kɛ baa pɔ o nɛɛ, o waa bwa ba a jaɡa.

²⁰ Kooro waa ba chiɡ o naa ta la ɛɛ tomɛ nɛnee ó ɛɡre nɛra lɛ toɔ, dɛ́ ɡel suuɡa ba o kara mun. Kɛ a ba dɛ la sie naa, baa kpo kooro laanee, nɛra baah ta laa, laa ɡe ta laa.”

²¹ Nyundua torome la berɔ ŋɔ, “Nɛmpɛɛ bɛl waa wola kora la ta jae ɛɛ ba chiɡ Siiria kooro naa taa, dɛ́ di kora. Wɛɛ kpɔ laalee ba ta harɛ la ta nɛra nɛ, ɡɛ saŋ baa dɛɛ lii kɛŋɔ deŋnesɔɔhna lole. Ásɛ dɛ che neɡra ŋwɛnɛ ta dɛɛ di kpeɡri.

²² Nomɛlbwa waa tɔŋlo la, hale dɛ Sɔfonomoa Korowii aa leo yoo, wɛɛ chɔɡoo.

²³ Kooro la ne harɛre ane nɛra ɛɛ fɔwɛ fɔwee, dɛ́ che a ta neɡre harɛre ane nɛra dɛɛ di kpeɡri kohona, a lole kɛŋɔ o harɛ aa kanɛ.

²⁴ Wɛɛ kpɔ laalee lɔ ka tɔ nɛra baa soɡe harɛ waa wera dɛ won kondikwaa ɛɛ nɛ a piɡ ba, dɛ ɛ waa o naawa bɛlbwa aa wola ane ɛɛ bwa. Ásɛ dɛ bɔne laala baa paa laa taa tɛ o nɛra baa teŋɛ o nɛɛ la. Wɛɛ dɛɛ vɔrɔwoo kɛŋɔ ó ka yo bwɛɛre aa dɔ dekpeɡa, kɛ aa biɡri bɛlbwa o waa la ba a jaɡa.

²⁵ Siiria kooro ɛɛ lɔ bambilee, dɛ́ kpɔ laa tena baa wara bá ba yo Ijipt kooro, ásɛ o ɡe kpɔ laa tena baa wara dɛ do kpeɡri, dɛ́ ba yoo laa. Kɛ baa neɡre Ijipt kooroo, dɛ́ le o habɔɔ o yo kahonɛ.

²⁶ O ɡbabir nɛra baa dɛ jao laanee dɛɛ ba o chɔɡa. Baa kpoo o laa tena ɡalɡaa, ásɛ ba bwa tonɛ.

²⁷ Gɛ koranar banɛ baa dɔ liichɔɡa tɛ dɔŋa nɔ ɛɛ pɛo so tiɡ ta dɛɛ neɡre dɔŋa, kɛ aa tɔnɔ bɛlbwaa dɔ tɛɛ ba, dɛkalkɛ saŋ baa lea cheɡ la ta dɛ ba.

²⁸ Siiria kooro ɛɛ kpɔ laala waa paa laa ta la bwaa kaa o harɛ ta, dɛ́ kpɔ sibeɡra dɛɛ nyin o chɔɡ Korowii ne o nɛra fɔo waa do ɡoroŋ la. Wɛɛ ɛ ɡɛ bɛlbwa waa dɛ nyinii, ásɛ dɛ berɛ kaa o ɡbaɡba harɛ ta.

²⁹ A habɔɔ la, wɛɛ ba yo Ijipt harɛ tenaa, kɛ ate ɛɛ korɛ wubwa yoi la taa waa won pɔ ba nɛ.

³⁰ Rom tena ɛɛ kpɔ stiimaeree le mpo nyoa wee cholibɔr harɛre taa, dɛ́ ba yoo, ásɛ o bambile chɔɡ. Wɛɛ berɔ kpɔ bandia dɛɛ nyin dɛ́ chɔɡ Korowii fɔo waa do ɡoroŋ la. Wɛɛ dɛɛ teŋɛ nɛra baa wola fɔo la ta teŋɛ la nɛɛ.

³¹ Wɛɛ ɡeloo o laa tena kpɔ doŋa kah Korowii Dea dekpeɡ la, dɛ́ ɡel ba ɡel sarahare baa dɛ ɛa tɔpere bɛlbwa la, ásɛ dɛ kpɔ konchɔɡechɔɡe waa dɛ paɡre bwɛɛ la pa.

³² Siiria kooro la ɛɛ neɡre nɛra baa koni fɔo baa fɔwa laanee, kɛ banɔ la baa jemɛ Korowii baa dɛ tomɔ la ɛɛ cheo kiŋkiŋ, dɛ́ yoo.

³³ Nomonome baa jemɛ waa la ɛɛ ɡeloo nɛra ɡalɡa jemɛ wa, kɛ aa biɡri ba kpoo bane keri ne, kɛɛ dɛ́ fuh bane, dɛ́ lawɛ bane laa ta, kɛɛ dɛ́ pa ba laala laa ta kaa.

³⁴ Baa dɛɛ kpoo wejerema la ɡɛ la, Korowii nɛra ɛɛ dɔ nɛraa ba cha ba tama, ásɛ nɛra ba wa aa wola kasinteŋ dɔe la ɡe ba ja ba nɛɛ kwaane baa dɔ le a ta la wa.

³⁵ Baa kpoo ba bini wejerema la banee, ásɛ a che a ta Korowii laa doŋa kpɔ ba nɛɛ dɛ́ lɛɛ ba, ka tel waa bwa jaɡa saŋ waa lea cheɡ ŋɔ wɛɛ bao la.

Kooro waa dɛ ɡɔɔ o te wa

³⁶ Siiria kooro la ɛɛ ɛ ɡɛ waa dɛ nyinii, dɛɛ ɛ mbarafo, dɛɛ ɡɔɔ o te ŋɔ o ɡwaa voɡ bɛlbwa, hale Nemenɛ Korowii waa kana la. Wɛɛ ɛ ɡɛ waa nɔ bwaa ka tel saŋ Korowii aa tɛr o deŋne. Korowii ɛɛ ɛ waa waa bola ŋɔ wɛɛ ɛo laanee.

³⁷ Kooro la aa duuree kpɔ tɛ voɡa o naawa aa toma la, ne onɔ la haahna aa dɛ nyinu la. Kasinteŋ, waa voɡ bɛlbwaa duu, dɛkalkɛ wɛɛ maŋkura o tenee ŋɔ o ɡwaa komɛlbwa.

³⁸ Wɛɛ kpɔ duuree tɛ voɡ waa dɛ nyiŋi dekpeɡa ta, ne voɡ o naawa aa wola on jemɛ la. Wɛɛ kpɔ suuɡaswɛm, ne suuɡapoŋa, ne bwedɛɛɡa dɛ kwaa a yoɡ aa kpeɡa bwaa tɛo.

³⁹ Wɛɛ kpɔ nɛra baa dɛ tomɛ voɡhɔɔh baa nyiŋi o dekpeɡa ta. Wɛɛ kpɔ duuree tɛ banɔ la baa sɛah kɛ o ɛ kooro la, dɛ́ tɛɛ ba sobɔrjena báa nyiŋi nɛndamanta nɛ, dɛ́ bɔne harɛ tɛɛ ba ó ɛ ba kembɔr.

⁴⁰ Aa ba ka tama Siiria kooro waa ba a jaɡa la, Ijipt kooro ɛɛ ba yoo laalee, ásɛ Siiria kooro la kpɔ kwaa aa do kɛ torɔɡore, ne laa tena baa soɡe jaɡre ta, ne stiimaere aa wara, o kpeɡri bwa ne dɛ́ ka puu yo. Wɛɛ lɔɔ ka tɔ harɛre ɡalɡa nɛra nɛɛ kɛŋɔ nee yon su dɛɛ kpɔ bobɛlbwa la ken, dɛ́ ba lɛ harɛre dɔɔh.

⁴¹ Wɛɛ ba Israel Harɛdɛɛɡe la taa, harɛre ta nɛra ɛɛ serewoo, kɛ Edom ne Moab harɛre ta nɛra dɛ Amɔn harɛ ta nomonome te ɛɛ le a nyoaa.

⁴² Wɛɛ che o kpeɡri taa dɛ́ lɛ harɛre la, hale baa Ijipt harɛ ɡba ɡela ba.

⁴³ Wɛɛ pa Ijipt suuɡaswɛm ne suuɡapoŋa koŋkwaare dɛ kondɔɔh bɛlbwaa, dɛ́ le bela ka yo Lebya ne Itiopia harɛre tena, dɛ́ pɔ ba nɛ.

⁴⁴ Kɛ wɛɛ ba no waa aa chiɡ wee leebɔr ne weekaŋle nyunduabɔr nɔɔ, ásɛ o jum jah, á ɡel o ir kpɔ sibeɡra kohona ka yo dɛ́ kpoo nɛra warɛ.

⁴⁵ A habɔɔ la, wɛɛ baŋre tɛnte dedɛɛɡa aa kana á ɛ o koodem, Mɛdetereenea Mpo ne bwejen bela Korowii Dea aa cheɡa la baah ta. Kɛ wɛɛ ba sewɔɔ, dɛ nomɛlbwa toole bela dɛ́ chao.”