Daneɛl 10 - mzwDBL

Daneɛl wepila waa naa Tiɡris Mojen nyoa

¹ Kooro Saeros aa di kora Pɛɛsea harɛ bentooro te ta la, Korowii pili waane bini baɡle Daneɛl, baa bera dɛ yerɔ Bɛltesasa. Dɛ waa la ɛ kpela dɛ ɛ laajen wa. Wepila la taa o che dɛ no waa la mun.

² Gɛ saŋ la, men Daneɛl, n tea bini chɔɡɔ yawanyoa atoro.

³ N ta kondikonsoma dii, ol kɛɛ sen ta n nyoa joɛ. N ta noo bɛlbwa ɡe fɔɡlɛ ka tel kɛŋɔ yawanyoa atoro la aa ba a jaɡa.

⁴ A ɡɛ bena la korobiloɡle tɔpera fifraanɛ dɛ anaarɛ ta, dɛ men Daneɛl, n cheɡɛ Tiɡris Mojen nyoa.

⁵ N ha sie nyiŋi, dɛ na baa bɛl waa do laalapoŋa, asɛ kiriso baa kpɔ suuɡaswɛm tenten ɛo vɔwɛ o chara.

⁶ O bwara do kɛŋɔ bwedɛɛɡa ane aa dɛ nyɛɡle baa yera kresolɛt, o siebɔr do kɛŋɔ bwaala aa dɛ nyɛɡle ken, o sibie do kɛŋɔ kapɛle aa dɛ hɔ, o nɔɔra ne nakpale do kɛŋɔ ayaawa baa looru ken, asɛ o taa do kɛŋɔ nɛnlaa aa bol waa dɛɛ nyɛɡ ken.

⁷ Men Daneɛl ɡboo na wepila la, dɛ baala bane ja n nɛ, ba te ta kon la nae, kɛ ɔmee laɡ ba kohona asɛ ba chwa ka sɔh.

⁸ Anomanta, a ka n ɡbo mɛɛ nyiŋi ɡɛ nyokpowaa nɔ, dɛ n ta bokpeɡa dɔe kpa, n siebɔr beɡre kɛŋɔ lale sie maa wola won ɛ wobɛlbwa.

⁹ N noɔ kɛŋɔ baa la dɛ bol wa, asɛ mɛɛ no, n sie den bir mɛ, n chole kpɔ sie pi harɛ.

¹⁰ Ate, nɔn bɛl laɡ mɛ ir, asɛ n pi n nɔɔra ne natuune ta, n bwara bwa ɛɛ sa.

¹¹ Baa la ŋɔ n be ŋɔ, “Daneɛl, Korowii dɛ nyin he waa taeh. Ir che dɛ́ no waa maa dɛ ba he be bola nɔ kɛrɛdɛ. He bee ba tom mɛ.” Waa bol waa la n be la, n iro che dɛ n bwara ta dɛ sa.

¹² Ate, o ŋɔ n be ŋɔ, “Daneɛl, dɛɛ berɛ ɔma, le awola haa ɛ he liire kɛ he pwɛr he te tɛ Korowii haa dɛ tomɔ, dɛ no waa nɔ mun la taa o no he wa. N balɔ dɛ́ ba chae he wesoŋa la wa.

¹³ Asɛ nyundua torome waa dɛ di Pɛɛsea harɛ kpeɡri la ba tɔ mɛ ŋwɛnɛ tɔpera fifraanɛ dɛ beŋkpoŋ. Ate, Maekel waa ɛ nyundua toroma nomonome la bini bɛl ba cha mɛ, lawa baa laɡ mɛ n so Pɛɛsea harɛ ta la wa.

¹⁴ Taraken, n balɔ dɛ́ ɡel he jemɛ waa aa dɛ ba he harɛ ta nɛra nɛɛ chiɡa kerekere, dɛkalkɛ ɡɛ wepila nɔ cheɡɔ tɛ waane a ta aa dɛ ba saŋ bɛl.”

¹⁵ O ta aa dɛ bol waa n be la, n kpɔ sie pi harɛ dɛ bol waa kahonɛ.

¹⁶ Asɛ nyundua torome waa do kɛŋɔ nɛn kpɔ nɔn ba leɡe n nyoa, mɔɔ n pa mun pili nyoa dɛ bol wa. N ŋɔ o be ŋɔ, “Nomoa, n na weweele taeh wepila nɔ ta, asɛ a ɡel n bwara yɔr.

¹⁷ Nomoa, ɛrɛɛ men maa ɛ he bonɔɔ nɔ ne hɛɛ ba wona bol waɔ? N bokpeɡa bwa tonɔ maa wola won hwee kɛrɛdɛ.”

¹⁸ Ate, o berɛ kwaa leɡ mɛ, asɛ n dɔ bokpeɡa.

¹⁹ O ŋɔ n be ŋɔ, “Korowii dɛ nyini, anomanta, dɛɛ berɛ ɔma, bɛ ɡel wobɛlbwa hae ɡe.” Waa bol waa nɔ n be la, n berɔ dɔ bokpeɡa, asɛ n ŋɔ o be ŋɔ, “Nomoa, bol waa bwa haa dɛ nyin kɛ he bol, taraken te he ɡelɔ n dɔ bokpeɡa.”

²⁰ Anee o bɔɔ mɛ ŋɔ, “He jemɛ waa aa ba n ne he be nɔ naa? Aa biɡri ń berɛ ba kaa nyundua torome waa dɛ di kpeɡri Pɛɛsea harɛ dɛ́ ka yoo laa, a habɔɔ mɔɔ nyundua torome waa dɛ di kpeɡri Grik tena harɛ ɡe ba,

²¹ kɛ anɔ la aa tɔ sie la, mɛɛ baɡle waa aa lɔ Kasinteŋ Tɔn la binii. Nomɛlbwa toole dɛ́ che n habɔɔ n ne o yo, atane nyundua torome Maekel waa dɛ di kpeɡri Israel harɛ la ɡbo.”