Daneɛl 1 - mzwDBL

Daneɛl ne o daamanar batoro

¹ Kooro Jehoiakim aa di kora Juda harɛ ta bentooro te ta la, Babelɔn Kooro Nebukadnesa kpɔ o laa tena la ka chɔ bar bwɛjen Jerusalam dɛ yo bwɛɛ la tena.

² Korowii ɡelɔ o pɔ Juda Kooro Jehoiakim nɛ, dɛ pa laala baa kpɔa cheɡ Korowii Dea la ane kaa Babelɔn harɛ ka cheɡ o voɡ dea bini, bela baa dɛ cheɡ laala a yoɡ aa kpeɡa.

³ Ate, Kooro Nebukadnesa ŋɔ Aspenas waa chɔ o koodem nomonome nyoa be ŋɔ, ó kpɔ Israel koodem bonɔɔna bane baa laɡ ba laa ta kaa Babelɔn, ne banɔ la baa le nomonjena deremi ta ba.

⁴ Ba bini bonɔɔna baa wola kirihiah dii dɛ do wer, dɛ́ dɔ bambile hweli komɛlbwa waa hweli, dɛ dɔ lem dɛ́ won dɛɛ no waa mun warane, dɛ chɛ kɛŋɔ bá won ɛ toma koodem. Ásɛ Aspenas baɡ ba Babelɔn tena wobol ne o chwera.

⁵ Babelɔn kooro ŋɔ báa tɛɛ ba o kondikwaa ne sen waa dɛ nyɔ tɔpere bɛlbwa la dɔŋa. Dɛ ŋɔ bá baɡ ba waa la bene atoro, ásɛ mɔɔ ba baa ɛ toma koodem bela.

⁶ Nɛra baa kaa lee ba le Juda dea tena bini la banee, Daneɛl ne Hanania ne Mesael dɛ Asaria.

⁷ Babelɔn koodem nomoa la tɛɛ ba sɔnfala. Daneɛl sɔne Bɛltesasa, Hanania sɔne Sadrak, Mesael sɔne Mesak, asɛ Asaria ɡe sɔne Abɛdnɛɡo.

⁸ Kooro kondikwaa ne sen waa ŋɔa ba kpɔ dɛɛ tɛɛ ba la, Daneɛl ɛ o liire kɛŋɔ waa ɡɛ kondikwaa la ne sen laanee nyɔ, ásɛ dɛ kpɔ o te kah doŋa. Asɛ dɛ soŋe Aspenas waa ɛ koodem nomoa la a wa, dɛ bɛ doŋa kah.

⁹ Korowii ɡelɔ koodem nomoa la na Daneɛl sum dɛ chao,

¹⁰ kɛ Aspenas ŋɔ Daneɛl be ŋɔ, “N dɛ ɔmɛ n dɔɔ kooro waa ŋɔa ń tɛ heyaa kondikwaa ne sen la. A ta chɛ kɛ o ba na he ɡwaŋa dɛ he bala la te bwadabii wer. A ba ɡɛ naa, o ken ɛɛ koh he waa dɛ́ kpo mɛ.”

¹¹ Asɛ Daneɛl ŋɔ nɛn koodem nomoa la aa leo ŋɔ wɛɛ nyiŋi o ne Hanania ne Mesael dɛ Asaria nɛɛ la be ŋɔ,

¹² “N poori, tɛ yaa dɔkpɔɡa komɛlbwa aa wola toole a ta, ne nee ɡbo tɔpera fi, dɛ́ kpɔ daah yaa na.

¹³ Ásɛ dɛ kpɔ yaa maɡɛ yabala baa dɛ di kooro dem kondikwaa la, dɛ́ che a ta na ɡɛ haa ɛ yaa.”

¹⁴ Anomanta, o sɛoh, dɛ tɛɛ ba kondikwa baa bɔɔ a waa la tɔpera fi, dɛ́ kpɔ daah ba na.

¹⁵ Tɔpera fi la aa tela la, dɛ Daneɛl ne o bala batoro la dɔ bokpeɡa kohona, ba bwadabii ɡe do wer ɡwaa banɔ la baa dɛ di kooro dem kondikwaa la.

¹⁶ Le a ta dɛɛ kaa la, nɛn waa dɛ nyiŋi ba nɛɛ la ta ɡelɛ ba di kooro dem kondikwaa la kpa, dɛ ɡel baa di dɔkpɔɡa komɛlbwa aa wola toole a ta.

¹⁷ Korowii tɛ ɡɛ bonɔɔna banaarɛ la wejema ne waa mun noe, ba won kure tɔne dɛ jemɛ chwera ɡe kɛrɛdɛ. Dɛ Daneɛl berɔ won wepila ne deera bwa soo siwi mun baɡla.

¹⁸ Bene atoro kooro la aa doa ŋɔ bá kpɔ ba ba o be la, koodem nomoa Aspenas kpɔ bonɔɔna la bwa la Kooro Nebukadnesa be.

¹⁹ Kooro la ne ba bol wa, asɛ o na kɛŋɔ ba bini bɛlbwa toole dɛ do kɛ Daneɛl ne Hanania ne Mesael dɛ Asaria, anomanta, ba kpɔ ba do koodem toma ta.

²⁰ Le ɡɛ saŋ dɛɛ kaa la, wobɛlbwa kooro la aa dɛ nyin a wejema ne waa mun noe waa la, o dɛ bɔɔ ba, asɛ dɛ na kɛŋɔ Daneɛl ne o bala batoro la wejema ɡwaa voɡra ne dobodobo tena baa lɔ o harɛ ta bwa kerafi.

²¹ Daneɛl soɡe koodem bela dɛɛ tomɛ, ka tel Pɛɛsea Koojen Saeros aa baa yo Babelɔn harɛ tena dɛ di kora.