Emɔs 9 - mzwDBL

Israel harɛ chɔɡa wa

¹ N na Korowii kɛŋɔ waa cheɡɛ kon baa dɛ ɛ saraha o ta la jwɛh, dɛ ŋɔ, “Kpɔ kon lɔ pilare la doa ásɛ Dea la doonyoa danjwɛɛre yiiɡi. Ásɛ a peri kuuɡi le nyundua ba le nɛra la nɛɛ ba serewe. Ba bini banɔ la baa ka la, mɛɛ kpoo ba laa taa. Ba bɛlbwa aa won le, beŋkpoŋ ɡba aa bɔree dɔ chwa.

² Hale ba kwi bɔɔ ka le lalabwɛɛ kwaraa naa, mɛɛ ta nɔnee laɡ ba. Ba teehnɔ ir kaa nyundua ɡe kwaraa naa, mɛɛ le ba ne belaa ba harɛ.

³ Ba chwao ka sɔh Kaamɛl Bwejen doa aa, mɛɛ nyin ba bɔree, dɛ́ laɡ ba. Ba chwao le n sie ka sɔh mpo bini naa, mɛɛ ɡeloo mpo bini oljen laɡ ba chwe.

⁴ A lole kɛŋɔ ba dɔma laɡ ba laa ta kaa bojaŋ harɛfale ta, mɛɛ ɡeloo bá kpoo ba laa ta. N siwi swɛɛ ba nɛ, ba wedɛɛɡa te waa laa, ba kpoora waa.”

⁵ Korowii, onee Koranar Bwa Kooro, onee kpɔ nɔn leɡe harɛ wɛɛ mwɛɛ, asɛ nɛra baa lɔ o ta bwa ɛɛ wi. Harɛ la bwa ɛɛ beɡre kɛŋɔ Nael Moo yon su, dɛ́ berɛ hweeh ka chɔ o buɡ ta la.

⁶ Korowii ma o dobɔr o do nyundua, dɛ ta nyundua o bɔle harɛ bwa ta, dɛ ɡel mpo ba bɔle harɛ nɔ ta bwa. O sɔne Korowii.

⁷ Korowii ŋɔ, “Israel tena, n dɛ nyin he waa kɛŋɔ maa dɛ nyin Itiopia tena waa la. Gɛ maa lawɛ he Israel tena le Ijipt harɛ ta la, ɡɛɛ n lawɛ Filisti tena le ekwi harɛ Kret ta, dɛ lawɛ Siiria tena le Kir. Men Korowiirii bola.

⁸ Men Nemenɛ Korowii, n dɛ nyiŋi Israel harɛ wechɔɡa aa suu nɔ. Mɛɛ chɔɡoo le harɛ nɔ ta, kɛ maa Jekɔb naanaree chɔɡ kwaraa.

⁹ Mɛɛ bol waa ásɛ dɛ yiiɡi Israel tena harɛre nɛra bwa bini, kɛŋɔ baa dɛ ɡboo boyu beŋkpoŋ ɡba aa wola harɛ le la.

¹⁰ Wechɔɡ-ɛɛra baa lɔ n nɛra bini bwa, baa kpoo ba laa taa. Banee dɛɛ bol ŋɔ, ‘Korowii aa ɡel wechɔɡa bɛlbwa ba ya nɛ.’ ”

Israel kwaara dɛ́ vɔrɔwe wa

¹¹ Korowii ŋɔ, “Tɔpere bɛl dɛ ba ásɛ n berɛ kwaa cheɡ Kooro Devid kora waa ɡua la. Mɛɛ kwaaroo vɔrɔwe bɔra aa paɡra ne dimɡbeeni bwa, dɛ́ kwaa maa a do ɡɛ a fa aa doa wubwa la,

¹² Israel tena ɛɛ ka yo nɛra baa ka Edom harɛ taa, dɛ́ pɔ ba nɛ, ásɛ harɛre ta nɛra ba fa aa ɛ n nɛra la jemɛ kɛ menee ɡela a ba ɡɛ. Men Korowiirii bola.”

¹³ Korowii ŋɔ, “Tɔpera la dɛ ba, ásɛ nɛn waa dɛ parɛ tɔ nɛn waa dɛ komɛ sie, onɔ la waa dɛ du ɡe tɔ nɛn waa dɛ tiɡri ɡrepo nɔna sie. Senfala ɛɛ koruu le bwejena dor dɛ́ palɛ kpɔ deŋɡarere ta.

¹⁴ Mɛɛ berɔ ba n nɛra Israel tena baa laɡ ba laa ta kaa bojaŋ harɛfale ta la nee, bá ba kwaa vɔrɔwe dimɡbeeni dɛ́ so a bini. Baa parɛ daa koonii, dɛ́ nyɔ a sen, dɛ́ parɛ bodɛɛɡa, dɛ́ di kondikwa baa parɛ la.

¹⁵ Mɛɛ lawɛ Israel tenaa ba so ba ɡbaɡba harɛ ta, nomɛlbwa aa wola won ba doŋ ba le harɛ maa kpɔa tɛɛ ba la ta. Men Korowii haa dɛ tom mɛ laanee bola.”