Emɔs 8 - mzwDBL

Wɛɡrɛ bɛl ne daa nɔna aa bea wa

¹ Nemenɛ Korowii berɔ ɡel men Emɔs na waane wepila ta ja. N na wɛɡrɛ bɛl daa nɔna aa bea do o bini.

² Asɛ o bɔɔ mɛ ŋɔ, “Bɔkwaa hɛɛ na nɔ?” N chaŋe ŋɔ, “N na wɛɡrɛ daa nɔna aa bea do o bini.” Ate, Korowii ŋɔ n be ŋɔ, “N nɛra Israel tena tɔpere telo kɛ n tɛr ba deŋne, maa ba bwaraa kpɔ kɛ ba kpa.

³ Awola tɔpere la, yela baa ɡo n Dea la ɛɛ berɛ wii. Nɛra ɛɛ serewoo kohona chɔ bobɛlbwa, ásɛ bɔr hel.”

Israel tena bwɛɛlɛ

⁴ Hé no, he nɛra haa dɛ fiiɡi nyaara dɛɛ chɔɡ nɛŋɡwɛɡra harɛ la ta,

⁵ dɛɛ bol ŋɔ, “Saŋ besoo Korobifala Tɔpejena dii ɛɛ ba a jaɡa bala ásɛ ya yoɡ mea ɔ? Saŋ besoo Ona Tɔpere ɡe ba kaa ásɛ ya ka yawɛ kwa ɔ? Ásɛ ya kpɔ kwaa aa wola chɛ kɛ ya kpɔ maɡɛ kwa, dɛ́ dawɛ a yoɡ, dɛ́ faah nɛra a maɡa ta,

⁶ dɛ́ kpɔ suuɡapoŋa aa wola naŋɡawa ɡba yoɡ tele yawɛ nyaara yoma, dɛ́ kpɔ yoɡ dawɛ mea ta.”

⁷ Korowii Israel tena aa dɛ tomɔ la ŋwɛɛrɔ ŋɔ, “Maa ba waa baa ɛa bɛlbwaa soh bwa.

⁸ Harɛ la ɛɛ jiɡruu a waa, ásɛ nomɛlbwa waa soɡe harɛ la ta di suna. Harɛ la dɛ́ ba dɛɛ beɡre kɛŋɔ Nael Moo yon su, ásɛ dɛ berɛ hweeh ka chɔ o buɡ ta la ken.”

⁹ Nemenɛ Korowii ŋɔ, “Awola tɔpere la, mɛɛ ɡeloo bɔr jo webaŋa ásɛ bobɛlbwa bir.

¹⁰ Mɛɛ ɡeloo he Tɔpejena dii berɛ lwe, ásɛ he yela ɡoe berɛ wii. Mɛɛ ɡeloo he bwa tɔ lweyale dɛ́ fonɛ he nyuune. Mɛɛ ɡeloo awola do kɛŋɔ nomɛl aa dɛ wi o bibambeŋkpoŋ la, dɛ́ ɛ tɔpechɔɡe ka tonɛ.

¹¹ Tɔpera ane dɛ ba, ásɛ men Nemenɛ Korowii ɡel lɔr chole harɛ nɔ ta. Kondikwaa kɛɛ nyɔɡre laa, men Korowii waa la bɛ dɔe dɛ́ no la waa. Men Korowiirii bola.

¹² Nɛra ɛɛ ɡaaɡoo le weekaŋle nyunduabɔr, dɛ́ ba kaa weekaŋle harɛbɔr, ne wee leebɔr dɛ́ ba kaa wee cholibɔr, dɛɛ nyin Korowii waa la dɛ́ no, kɛ baa dɔ no.

¹³ Awola tɔpere la, toli ne bonɔɔna ba bwara aa kpeɡa sie ɛɛ bir baa bá choɡli, nyɔɡre wa.

¹⁴ Banɔ la baa dɛɛ ŋwɛɛ Samaria voɡa, kɛɛ dɛɛ ŋwɛɛ Dan dea voɡ, kɛɛ voɡ waa lɔ Beɛseeba bwa dɛ́ ba choɡla, baa wola won ir kpa.”