Emɔs 7 - mzwDBL

Wepila aa ɛ tontombɛ wa

¹ Nemenɛ Korowii ɡelɔ men Emɔs na waane wepila ta. N nao kɛŋɔ waa dɛ boa tontombɛ nyoa, ɡɛ saŋ dɛ ba teŋe kpɔɡa ba kpɔa dɛɛ tɛ kooro jaɡre tonɛ, kpɔɡa pa mun dɛɛ moɡɛ, asɛ nɛra pa mun dɛɛ du konfala.

² Tontombɛ la balɔ, dɛ ba chɔɡ konlwɛɛ te bɛlbwa harɛ la ta, asɛ n ŋɔ, “Nemenɛ Korowii, ɡel kɛ he nɛra! Ɛrɛɛ he nɛra ɛɛ ba wona so nɔ? Ba nɔn ta kao!”

³ Anomanta, Korowii ɡelɔ. Dɛ ŋɔ, “Maa ɡela ba a chiɡ kpa.”

⁴ Nemenɛ Korowii ɡelɔ n na waane wepila ta ja. N nao kɛŋɔ waa kpɔ nii dɛɛ ba ba fuh harɛ la, dɛ́ kpɔ tɛr o nɛra deŋne. Nii la fuoh dɛ hweeh viljena bwa, dɛ fuh dɛɛ ba ba chɔɡ harɛ ɡe.

⁵ Belaa n ŋɔ, “Nemenɛ Korowii, n dɛ soŋe, ɡel! Ɛrɛɛ he nɛra ɛɛ ba wona so nɔ? Ba nɔn ta kao!”

⁶ Anomanta, Nemenɛ Korowii ɡelɔ, dɛ ŋɔ, “Maa ɡela ba a chiɡ kpa.”

⁷ Korowii ɡelɔ men Emɔs na waane wepila ta ja. Dɛ Korowii cheɡɛ danjwɛɛ bɛl baa mao jwɛh, dɛ kpoŋe ŋwɛn baa kpɔa dɛɛ toɡre danjwɛ.

⁸ Korowii bɔɔ mɛ ŋɔ, “Emɔs, bɔkwaa hɛɛ na nɔ?” Asɛ n chaŋe ŋɔ, “Ŋwɛn baa kpɔa dɛɛ toɡre danjwɛɛ.” Ate, Korowii ŋɔ, “N kpɔɔ dɛɛ baɡle kɛŋɔ n nɛra do kɛŋɔ danjwɛɛ waa ɡola. Maa ba deŋnetɛraa kpɔ kɛ ba kpa.

⁹ Mɛɛ chɔɡ bɔra Aesek naanar aa ka dɛ tomɛ bwaa, ásɛ Israel harɛ bɔra aa do ɡoroŋ ɡe chɔɡ, dɛ́ ka yo Kooro Jɛroboam dem nɛra laa.”

Emɔs ne sɔfo Amasea

¹⁰ Belaa sɔfo Amasea waa lɔ Bɛtel la kpɔ kala tɛ Israel Kooro Jɛroboam ŋɔ, “Emɔs dɛ vɔrɔwe he vɔrɔwa Israel harɛ ta bonɔ. O waa waa dɛ bol la ɡwaalɔ to.

¹¹ Waa Emɔs aa dɛ bol laanee kɛŋɔ, ‘Baa kpo Kooro Jɛroboam laa taa, ásɛ ba lawɛ Israel tena laa ta kaa, ba le ba ɡbaɡba harɛ ta kaa bojaŋ harɛfale ta.’ ”

¹² Belaa Amasea ŋɔ Emɔs be ŋɔ, “Korowii keame, ir kaa Juda harɛ ta kaa bol Korowii waa la, dɛ́ so bela baa bɔe a kem.

¹³ Bɛ Korowii waa la bol Bɛtel bonɔ kpa, dɛkalkɛ bonɔɔ harɛ nɔ ta nɛra ne kooro bwa ba dɛ baa tomɛ.”

¹⁴ Emɔs chaŋo ŋɔ, “N ta Korowii keame ɛɛ, kɛɛ dɛ ɛ Korowii keame bie. Dɛ peteɡree men, asɛ n berɛ dɛɛ nyiŋi fiɡ daa ta.

¹⁵ Kɛ Korowii ɡelɔ n ɡel peera teɡa, dɛ ŋɔ n be ŋɔ ń ba bol o waa la baɡle o nɛra Israel tena.

¹⁶ Hé no waa Korowii aa dɛ bol he be. He ŋɔ, ‘Bɛ Korowii waa la bol, ɡel waa aa dɛ ba Israel tena nɛɛ bala la waa bola. Ásɛ dɛ ɡel waa bola dɛ́ yaɡɛ Aesek dea tena.’

¹⁷ Anomanta, waa Korowii aa dɛ bol sɔfo Amasea be laanee nɔ. ‘He haah ɛɛ valɛ bwɛjen nɔ taa dɛɛ bɔ jwamane. Baa kpoo he bibaala ne bihaahna laa taa. Baa lɛ he harɛ peraa, dɛ́ bɔne tɛ nɛra, ásɛ he ka sewɛ voɡtoroma harɛ ta. Kasinteŋ, baa lawɛ Israel tena laa taa le ba ɡbaɡba harɛ ta kaa bojaŋ harɛfale ta.’ ”