Emɔs 6 - mzwDBL

Israel harɛ chɔɡa wa

¹ Saayɔn tena haa dɛ lii kɛŋɔ wobɛlbwa aa heyaa ha, ne Samaria Bwejen dor tena haa dɛ lii kɛ he soɡe deŋnesɔɔhna ta la, hé bwɛɛlɛ! Nomonjena haa dɛ tɔ Israel harɛ waa sie, Israel tena ɛɛ ba he be hɛɛ cha ba la bwa, hé bwɛɛlɛ!

² Hé la bwɛjen Kalne ka na, dɛ́ le bela la bwɛjen Hamat, dɛ́ berɛ kaa Filisti tena bwɛjen Gat. Ba ɡwaa he harɛre anɛ nɔ naa? Ba harɛ la kan ɡwaa he kon aa?

³ Haa lii kɛŋɔ tɔpechɔɡe bɛl dɛ ba, kɛ he we-ɛɛla ɡbo ɛɛ ɡeloo ó ba warane.

⁴ Mpare baa ɛa dɛ kpɔ bala nyena mɛɛ a taa hɛɛ chɔ, dɛɛ yale he kanedɛɛɡa ta. Hé kpoo pebiiri aa wera, ne nabali aa do bwara dɛɛ chwe.

⁵ Hé dɛ nyin yela kɛŋɔ Kooro Devid ken, dɛɛ lɔa he janjelare ne.

⁶ He dɛ nyɔ numojena ne sen, dɛ kpɔ konsɔɔhsoma aa wera dɛɛ ɛ he te, kɛ haa chɔɡa Israel aa dɛ ba chɔɡa te waa wi.

⁷ Anomanta, hɛɛ ja nɛra baa tɔ sie dɛ́ laɡ ba laa ta kaa bojaŋ harɛre ta la nɛɛ, ásɛ kwaa haa dia dɛɛ lɛ sie, ne he waa bwa ba a jaɡa.

Korowii hah mbarafo Israel tena aa dɛ ɛ

⁸ Nemenɛ Korowii, Korowii Waa Ɛ Kpeɡri Bwa Dɔɔ ŋwɛɛ o ɡbaɡba ŋɔ, “N hah mbarafo Israel tena aa dɛ ɛ la, dɛ ki ba dekpeɡa baa soɡe a bini. Mɛɛ kpɔ bwɛjen la ne komɛlbwa waa lɔ o taa do ba dɔma nɔn ta.”

⁹ Baala fi ka dembeŋkpoŋ ta kwaraa naa, ba ɡe ɛɛ serewoo.

¹⁰ Nɛra baa serewa la lole bɛl ɛɛ bao, dɛ́ ba pa lala la le dem bela, dɛ́ bɔɔ nomɛlbwa waa ka dem bela ŋɔ, “Nomɛl ta lɔ he be bonɔ kɛɛ?” Ásɛ taa bɛl chaŋe ŋɔ “Ɔɔhɔh!” Ásɛ lole la ŋɔ, “Hel! Ya nyiŋi kɛrɛdɛ dɛ bɛ Korowii sɔn yerɛ.”

¹¹ Dɛ Korowii ŋɔ ba taɡɛ demjena ne demjeɡre bwa ɡooɡe aa, baa taɡɛ a bwaa ɡooɡe, á paɡre buruburu ken.

¹² Jaɡre won bwea dor chwae yaa? Nɛn ɛɛ kpɔ nae ka parɛ bela aa? Kɛ he ɡelɔ kasinteŋ do kɛ tɛɡchɔɡa, asɛ waa aa toɡra berɛ do kɛŋɔ wechɔɡa ken.

¹³ He dɛ maŋkura he te kɛŋɔ haa kaa yo lɛ Lo Debar dɛ ŋɔ, “Ya cheɡɛ ya bokpeɡa ta dɛ ka yo lɛ Kanaim.”

¹⁴ Korowii Waa Ɛ Kpeɡri Bwa Dɔɔ ŋɔ, “Israel tena, mɛɛ ɡeloo harɛ bɛl nɛra ba yo heya, dɛ́ ba fiiɡi heyaa le Lebo Hamat ŋwɛnɛ weekaŋle nyundua, dɛ́ ba weekaŋle harɛbɔr Jɔɔdan Moo ta.”