Emɔs 5 - mzwDBL

Liire chara dɛ́ berɛ ba Korowii be

¹ Emɔs ŋɔ, “Israel tena, hé no wiile maa taara dɛɛ tɛ heyaa nɔ.

² ‘Israel harɛ waa do kɛŋɔ bitolo waa wola baa jemɛ la paɡrɔ waa wola werii do kpa, harɛ la chɔ pɛɛ nomɛlbwa toole dɛ́ kwaa vɔrɔwo.’ ”

³ Nemenɛ Korowii ŋɔ, “Bwɛjen bɛl lɔ Israel harɛ ta, dɛ́ kpɔ laa tena kaɡboŋ la laa, kɛ nɛra lafa ɡboo dɛ́ berɛ ba. Bwɛɛ bɛl ɡe kpɔ laa tena lafa la, kɛ ba nɛra fi ɡboo dɛ́ berɛ ba.”

⁴ Korowii ŋɔ Israel tena be ŋɔ, “Hé berɛ ba n be, ásɛ dɛ dɔ he nyu.

⁵ He bɛ Bɛtel la ka tom mɛ, he bɛ Gelɡal la, he bɛ Beɛseeba ɡba la. Kasinteŋ, baa lawɛ Gelɡal tena laa taa kaa bojaŋ harɛ ta, ásɛ Bɛtel paɡre kwaraa.”

⁶ Emɔs ŋɔ, “Hé berɛ ba Korowii be dɛ́ dɔ he nyu, ɡɛ laa aa, wɛɛ ba he Israel tena nɛɛ kɛŋɔ nii, dɛ́ ba fuh heya, dɛ́ fuh Bɛtel tena ɡe, nomɛlbwa aa wola won dima.

⁷ He berɛ waa aa ɛ kasinteŋ sie, dɛ tɔ waa aa toɡra ŋwɛnɛ.

⁸ Korowiirii ta Baŋɡaana ne weweela bwa so siwi, dɛ berɛ ɡel bɔr ɛɛ beɡre, dɛ ɡel bɔr bir dɛɛ chaah, bɔr chaah dɛɛ bir. Dɛ ta mpo o ba bɔle harɛ ta. O sɔne Korowii.

⁹ Onee dɛɛ chɔɡ ba dekpeɡa, dɛ ɡel bwɛjen baa ma danjwɛɛ baro ɛɛ berɛ dimɡbia.

¹⁰ Hé hah nomɛlbwa waa wola nyosone teŋe, dɛɛ bol kasinteŋ kɔɔto dea.

¹¹ He fiiɡi nyaara dɛ ɛɡre ba dɛɛ lɛ mea. Anomanta, haa deene haa kpɔ bwedɛɛɡa maa la binii so, kɛɛ dɛ́ dɔ sen nyɔ le he daa kodɛɛɡa haa para la ta.

¹² N jemɛ ɡɛ he wechɔɡa aa kana, dɛ jemɛ wedoŋa bwa haa ɛa. He ɛɡre nɛra ba wa aa toɡra, dɛ ɡel baa yawɛ heyaa sen, haa nyaara waa bolɛ dɛɛ tɛɛ ba aŋwɛnɛ ta kɔɔto.

¹³ Anomanta, nɛn waa jemɛ waa la tɔ nyoa, a ɡɛ wechɔɡa saŋ nɔ waa aa do ɡɛ nɔ ta.

¹⁴ Hé nyin wedɛɛɡa, dɛ́ ɡel wechɔɡa ɛɛ, ásɛ dɛ dɔ he nyu. Anee dɛ́ ɡel Korowii Waa Ɛ Kpeɡri Bwa Dɔɔ ja he nɛ, ɡɛ haa bol o waa la.

¹⁵ Hé hah wechɔɡa, dɛ́ nyin wedɛɛɡa, hé ɡel kasinteŋ ɛɛ ɛ toma kɔɔto deene. Nemenɛ Korowii ken ɛɛ sune Josef dea nɛra baa kaa nɛɛ.”

¹⁶ Anomanta, Nemenɛ Korowii Waa Ɛ Koranar Bwa Kooro ŋɔ, “Nɛra ɛɛ wi fɔɡbaahnaa, ásɛ lokua wii do bela nɛra aa dɛ cheme bwa. Baa yerɛ paara bwaa cheme ba wi tɛ nɛra baa serewa, dɛ́ ka kpɔ nɛra bá ba wi.

¹⁷ Nɛra ɛɛ wi daa kooni ta bwaa. Gɛ waa nɔ bwa ɛɛ bao, dɛkalkɛ n dɛ ba ba tɛr he deŋne. Men Korowiirii bola.”

Korowii Tɔpere waa lea cheɡ

¹⁸ Emɔs ŋɔ, “Nomɛlbwa waa dɛ nyin o na tɔpere Korowii aa dɛ ba ba bol nɛra waa dɛ́ pa bole la, ó bwɛɛlɛ. Ɛrɛɛ hɛɛ nyin he na Korowii Tɔpere waa lea cheɡ laɔ? Biro ɡboo awola, bɔr aa o ta chaahna ba.

¹⁹ Aa ɛo kɛŋɔ nɛn aa dɛ chwa nyujente dɛ ka cheme sisire ken. Aa doo kɛŋɔ nɛn aa jo o dea dɛ kpɔ nɔn dawɛ danjwɛɛ ta, asɛ harɛkon domɔ.

²⁰ Korowii Tɔpere waa lea cheɡ la, biro kpirkpir ɡboo, wee aa lee do kwara, dɛ́ chaah bɔr.”

²¹ Korowii ŋɔ, “N hah he tɔpejena haa dɛ di la, n sie aa a ta lɛ kwaraa.

²² A lole kɛŋɔ he kpɔ saraha kwaa baa dɛ fuah ne mea sarahare baa tɛ mɛ, maa an lɛ. He kpɔ deŋnesɔɔhna sarahare baa tɛ mɛ te, n sie aa a taa lɛ.

²³ Hé kpɔ he ɡbɔɡa yela le n nɛ. Maa he janjela yela nyin dɛ́ no.

²⁴ Kɛ, hé ɡel kasinteŋ do le saŋ bɛlbwa, kɛŋɔ moo aa dɛ palɛ, waa aa toɡra ɡe do kɛŋɔ nenabɔɔ waa wola hweeh bwa.

²⁵ Israel tena, n ta sarahare ne kwaa lɛɛ le he be bene fifraanaarɛ haa lɔ pua hɛŋle ɡbo harɛ la ta.

²⁶ Hé dɛ tomɛ voɡ Sakut haa ɛo kooro, ne Kaiwan haa ɛo kɛŋɔ wewee. Hɛɛ che ɡɛ voɡa nɔɔ,

²⁷ ɡɛ saŋ maa lawɛ heyaa kaa bojaŋ harɛfale ta, Damaskɔs baŋ le la. Men Korowii Maa Ɛ Koranar Bwa Kooroo bola.”