Emɔs 4 - mzwDBL

Israel tena ta berɛ ba Korowii be

¹ Hé no, haahna haa lɔ Samaria dɛ do bwara kɛ nae aa lɔ Basan harɛ ta, he dɛ fiiɡi nyaara ne nɛŋɡwɛɡra, dɛɛ ŋɔ he jaranar be ŋɔ, “Hé kpɔ sen baa tɛ yaa.”

² Nemenɛ Korowii waa do ɡoroŋ ŋwɛɛrɔ ŋɔ, “Tɔpera ane ɛɛ bao ásɛ ba lawɛ heyaa ɡoŋri ne kaa. Baa tɛɡre bɛlbwaa kaa kɛŋɔ pɛŋe ken.

³ Baa lawɛ heyaa kpɔ danjwɛɛ waa pera ta, dɛ́ tɛɡre heyaa kaa bobɛl baa dɛ yerɔ Haamɔn.” Korowiirii bola.

⁴ Korowii ŋɔ, “Israel tena, he dɛ nyin aa, hé ir kaa Bɛtel, bela haa dɛ tom mɛ la, ka ɛ wechɔɡa. Hé kaa Gelɡal ɡe ka ɛ wechɔɡa kohona. Hé kpɔ saraha kwaa kaa tɛ chɔɔ bɛlbwa, dɛ́ bɔne kwaa haa dɔa bini bɔre fi, dɛ́ kpɔ bɔrbeŋkpoŋ kaa tɛ tɔpera atoro bɛlbwa.

⁵ Israel tena, hé kpɔ paanoo iisi aa lɔ a ta ɛ saraha ba jam mɛ, dɛɛ baɡle he te saraha aa le he bambile la ta, dɛkalkɛ anee hɛɛ nyin ɛɛ kɛrɛdɛ. Men Nemenɛ Korowiirii bola.

⁶ Menee ɡela lɔr chole he bwɛjena bwa ta, asɛ he paŋɛ kondikwa bwɛɛ bɛlbwa ta, kɛ he ta berɛ ba n be.

⁷ Menee ɡela bwaala ɡel nɛɛ, ɡɛ saŋ aa ka korobie atoro he komɛ koo koŋkwaare. N ɡelɔ bwaala nɛ bwɛɛ beŋkpoŋ ta, dɛ ɡel o ta bɛl te ta nɛɛ. O nɛ koo bɛl ta, bɛl ta bwaala dɔe, harɛ hol.

⁸ Nyɔɡre kpo bwɛjena nɛra ɡalɡa bane ba ɡwɛɡre, dɛ ɡaaɡe la bwɛjen bɛl ta dɛ́ ka nyin nee nyɔ, ba ta dɔe. Ane a bwa, he ta berɛ ba n be. Men Korowiirii bola.

⁹ Keraŋwɛnɛ bwaa n ɡel he koo koŋkwaare chɔɡ, weela anee n kpɔ chɔɡa. Tontombɛ di he fiɡ ne ɔleve daa, kɛ he ta berɛ ba n be. Men Korowiirii bola.

¹⁰ N kpɔ weechɔɡa ba ta he nɛ, ɡɛ n fa aa ɛ Ijipt harɛ ta la. N kpoo he bonɔɔna laa ta, dɛ lawɛ he jaɡre kaa. Dɛ ɡel nɛra baa serewa chɔ sɔɔh kpo heya, bela haa soɡa, kɛ he ta berɛ ba n be.

¹¹ N chɔɡ he bini bane, ɡɛ maa chɔɡ Sodom ne Gomoora tena la. Dɛ he do kɛŋɔ nindaa waa lɔ nii ta n kee heyaa le, kɛ he ta berɛ ba n be. Men Korowiirii bola.

¹² Anomanta, Israel tena, mɛɛ tɛr he deŋnee. Maa dɛ ba heyaa ɡɛ ɛɛ nomanta, hé kpɔ he te dɛɛ kpa men Korowii haa dɛ tom mɛ, ásɛ n pa heyaa bolchɔɡe.”

¹³ Korowiirii ta bwejena dɛ ta peu ɡe, dɛ ɡel nɛn jemɛ o liire. Onee ɡela webaŋa won jwaana bera, bwejena dor ɛ o natiɡribɔr, o sɔne Korowii Waa Ɛ Kpeɡri Bwa Dɔɔ.