Emɔs 3 - mzwDBL

¹ Korowii ŋɔ, “Israel tena, he no waa aa le n be dɛɛ ba he harɛbir nɛra maa lawɛ heyaa le Ijipt harɛ ta la nɛ.

² He ɡboo ɛ nɛra maa le heya tɛ n te harɛre nɛra bwa bini, a waa a chɛ kɛ ń tɛr he deŋne he wechɔɡa bwa waa la.”

Korowii keame toma

³ Nɛra banɛ nyoa ta pɛɛ yaa baa wono pɛ dɛ́ valaa?

⁴ Nyujente dɛ si kɔr bini dɛ ol laa o dɔ lawaa? Wɛɛ do o bɔɔ binii dɛɛ ŋoo dɛ komɛl laa o lawɛ dɛɛ di aa?

⁵ Ba ta bel harɛ aa jumbie ɛɛ ba le o taa o lawɔ waa? Bel won tae pɛɛ dɛ waane laa ɛo waa?

⁶ Laa bɛla sio bwɛjen bɛl ta naa, o nɛra aa ɔmaa? Wechɔɡa ane chiɡ bwɛjen bɛl nɛra nɛ aa, dɛ Korowii laa ɡela a ba ɡɛ naa?

⁷ Nemenɛ Korowii aa waanee ɛ, dɛ o ta a bini pile baɡle o bonɔɔna baa ɛ o keamere.

⁸ Nyujente kɔraa, umee wola ɔmɔɔ? Nemenɛ Korowii bol wa aa, umee wola la ka bol o waa aa dɛ ba bala laɔ?

⁹ Emɔs ŋɔ Samaria nomonome be ŋɔ, “Hé la ka bol nɛra baa soɡe Asdɔd ne Ijipt dekpeɡa bini la be ŋɔ, ‘Hé ka cheme Samaria bwejena dor, dɛ́ na yoi we-ɛɛla ne fiiɡa baa dɛ fiiɡi nɛra bela.’ ”

¹⁰ Korowii ŋɔ, “Baa jemɛ waa aa wera la ɛ. Ba cheɡɛ laa ta, dɛ che laala su ba dekpeɡa bini.”

¹¹ Anomanta, Nemenɛ Korowii ŋɔ, “Dɔma ɛɛ ba bar ba harɛɛ cheme, dɛ́ kuuɡi dekpeɡa, dɛ́ pa ba dejena bini laala kaa kɛŋɔ laa ta kwa.”

¹² Korowii ŋɔ, “Gɛ peteɡre yon yo lɛ pee le nyujente nyoa, dɛ o nakpale anɛ ɡbo kɛɛ o deŋnekera ɡboo kaa la, ɡɛ tentenee mɛɛ ba Israel tena lɛɛ, banɔ la baa lɔ Samaria ne Damaskɔs dɛ yale ba kanedɛɛɡa ta bwa.

¹³ No ɡɛ waa nɔ, ásɛ dɛ kah Jekɔb naanar.” Korowii Waa Ɛ Kpeɡri Bwa Dɔɔ laanee bola.

¹⁴ “Awola maa ba tɛr Israel tena deŋne ba wechɔɡa waa la, mɛɛ paɡre kwaa baa dɛ ɛ saraha a ta Bɛtel bwaa, dɛ́ kuuɡi kwaa aa do kɛŋɔ nyeɡlare dɛ paaɡe a ta bwaa bil harɛ.

¹⁵ Mɛɛ paɡre ba dejena ne ba dejeɡre bwaa. Mɛɛ chɔɡ deene baa kpɔ bala nyena ɛ kwaa cheɡ a bini a do wer la bwaa. Dejena bwa ɛɛ chɔɡoo kwaraa, Men Korowiirii bola.”