Emɔs 2 - mzwDBL

¹ Korowii ŋɔ, “Moab tena teŋɔ dɛɛ ɛ wechɔɡa, a chɛ kɛ ń tɛr ba deŋne. Ba ta Edom kooro bui, ba huɡri o hoɡa, dɛ fuah a berɛ tɔɔ.

² Mɛɛ ɡeloo nii ba fuh Moab harɛ, dɛ́ fuh dekpeɡa aa bar bwɛjen Kereɔt. Moab tena ɛɛ serewoo, a ɡɛ saŋ laa tena aa dɛɛ do ɡbɔɡa dɛɛ hoh laa bɛle la.

³ Mɛɛ kpo Moab kooro ne o nomonome baa ja o nɛɛ bwaa. Men Korowiirii bola.”

⁴ Korowii ŋɔ, “Juda tena teŋɔ dɛɛ ɛ wechɔɡa, a chɛ kɛ ń tɛr ba deŋne a wa. Ba vɛh me Mmarare la, ba ta waa maa do ba a ta teŋɛ, dɛ le n waa ta, dɛ kaa tomɛ voɡa ba naawa fa aa toma la.

⁵ Anomanta, mɛɛ ɡeloo nii ba fuh Juda harɛ, dɛ́ fuh Jerusalam dekpeɡa, dɛ́ chɔɡa.”

Korowii pa Israel tena bolchɔɡe

⁶ Korowii ŋɔ, “Israel tena teŋɔ dɛɛ ɛ wechɔɡa, a chɛ kɛ ń tɛr ba deŋne a wa. Ba yoɡ nɛra ba wa aa toɡra, dɛ di kema baa wola won bɔ la. Ba lɛ suuɡapoŋa ba ka ɛ yoma, dɛ yoɡ nyaara baa di kema, kema la suuɡa aa wola won yawɛ naŋɡawa ɡba.

⁷ Ba tiɡri nyaara dɛɛ do harɛ kɛŋɔ teera ken, dɛ vɛh nɛra baa dɛ fiɡ ba waa bola dɛ tɛɛ ba aŋwɛnɛ ta. Mɛɛ ne o bie bwa pɛ hahbeŋkpoŋ, dɛ kpɔ doŋa kah men Korowii sɔn waa do ɡoroŋ la.

⁸ Bobɛlbwa baa dɛ tom mɛ la, ba pa yale baa lɛa cheɡ awɔba la dɛɛ chɔ a ta. Ba cheme n Dea aa, suuɡa baa faah nɛra dɛ lɛ le ba be la, a nee baa nyɔ sene.

⁹ Israel tena siwi taa n chɔɡ Amɔre tena kwaraa, dɛ ba kpekpeɡo ba bwara do kpeɡri, kɛŋɔ peleme daa ne dajena ken, asɛ n chɔɡ a nɔna ne a lune.

¹⁰ Menee lawɛ heyaa le Ijipt harɛ ta, dɛ kpɔ heyaa kpɔ pua hɛŋle ɡbo harɛ ta bene fifraanaarɛ, dɛ ba kpɔ Amɔre tena harɛ tɛ heya.

¹¹ N berɔ le he bibaala la bini bane ba ɛ n keamere, ba bini bonɔɔna la bini bane ɡe ɛ Nasiri tena. Israel tena, n teŋe nyosone naa? Men Korowiirii bola.

¹² Kɛ he ɡelɔ Nasiri tena nyɔ sen, dɛ do n keamere ŋɔ ba bɛ n waa aa dɛ ba bala la ka bol.

¹³ Taraken, mɛɛ tiɡrii do harɛ kɛŋɔ torɔɡo yon che bone kohona dɛ tire kon ta la.

¹⁴ Nɛra baa won chwae la aa won le a nyoa, bokpeɡa tena ɛɛ ɛo kahonɛ, banyoo bɛlbwa ɡe aa won lɛ o nyu.

¹⁵ Nɛn waa jemɛ hɛm tae ɡba aa won che a nyoa, laa te bɛlbwa waa won chwae aa won le a nyoa, nɛn waa soɡe jaaɡɔ ta ɡba aa won lɛ o nyu.

¹⁶ Hale banyoola ba bambile aa kpeɡa, ɛɛ chwao ɡel ba dɔmkwaa awola tɔpere, Men Korowiirii bola.”