Aesaya 9 - mzwDBL

Ba lolɛ bie tɛ yaa

¹ Kɛ ane abwa, wenaale bɛlbwa toole dɛ ba nɛra ba bwara aa dɛ nyɛɡ nɛ. Saŋ la, Korowii ɡelɔ Sebulon ne Naftale deene tena harɛre sɔn ba harɛ. Kɛ kerekere wɛɛ ɡeloo Galilia harɛ ta bela hɔɔhra aa wara dɛ koo Juu tena bini la bwa dɔ jirima. Harɛ waa lɔ Jɔɔdan Moo la baŋ, dɛ kpɔ dɛɛ kaa moo la nyoa bela bwa.

² Nɛra ba fa aa do kɛŋɔ nɛra baa soɡe biro ta, berɔ na nii bɛl o chaah tɛ ba bwa. Gɛ nɛra nɔ ba wechɔɡa aa ɡela ba do seo lɔɡa, kɛ nɛra baa soɡe biro ta la, ba na nii bɛl o chaah kohona tɛ ba bwa.

³ N Naa Korowii, he ɡelɔ ba harɛ la nɛra ya, he tɛɛ ba silɛɛ kohona. Ba dɛ hɛɡre he sie kɛŋɔ nɛra koo kondikwaa yon ɛ kohona baa koma dɛɛ hɛɡre la. Ba berɔ dɛɛ hɛɡre kɛŋɔ nɛra aa kaa yo laa, dɛ pa ba dɔma laala dɛɛ bɔne la.

⁴ He pɔ ba dɔma ba fa aa dɛ ha ba, kɛŋɔ baa kpɔ daa dawɛ nae anɛ nɛ aa parɛ, dɛ kpɔ daŋɡbale dɛɛ lɔɔra la nɛ. Gɛ tentenee he kuuɡi daa aa dawɛ Midian tena nɛ dɛ lɛɛ ba.

⁵ Laala baa doa dɛɛ yo laa, ne kon te bɛlbwa chal aa ɛo la, baa kpɔa do nii ta a fuh, baa kpɔa mar nii.

⁶ Ba lolɛ bie tɛ yaa, bibaalee. Onee dɛɛ ba harɛ nɔ bwa kooro ɛɛ, baa yerɔ Nyokponɛn, ne Nomondɛɛɡe Waa Won Nɛra Jae, ne Nemenɛ Korowii, ne Saŋ Te Bɛlbwa Mɛɛ, dɛ Deŋnesɔɔhna Kooro.

⁷ O kora ɛɛ do kanee dɛɛ ja saŋ bɛlbwa, ásɛ deŋnesɔɔhna aa wola jaɡa dɔe do le saŋ bɛlbwa dɛɛ la. Wɛɛ chiɡ Kooro Devid naa taa, dɛ́ di kora. O kora ɛɛ che kasinteŋ ne waa aa toɡra taa dɛ́ do kpeɡri, dɛ́ le saŋ nɔ ka tel waa bwa jaɡa saŋ. Koranar Bwa Kooro ɛɛ do siee dɛ́ ɛ anɔ bwa.

Korowii ɛɛ tɛr Israel tena deŋnee

⁸ Korowii bol waane Jekɔb naanar baa ɛ Israel tena be, aa ba ba pui,

⁹ ásɛ nɛra la bwa jemɛ a wa. Israel ne Samaria tena la dɛ ɡɔɔ ba te dɛɛ maŋkura ba te dɛ ŋɔ,

¹⁰ “Berekese dea la cholo, kɛ yaa sɛh bweaa dɛ́ berɛ kpɔ ma. Ba teŋni fiɡ daa aa pwɛra la ta, kɛ yaa kpɔ peleme daa aa kpeɡaa chiɡ a buɡe ta.”

¹¹ Korowii ɛɛ ɡeloo Israel tena dɔma baah di bá ba yoo ba.

¹² Siiria tena le wee leebɔr, ásɛ Filisti tena ɡe le wee cholibɔr, dɛ́ ba haah Israel tena pɛ dɛ́ laɡ ba lile. Anɔ nɔ bwa habɔɔ Korowii baah aa sɔɔh, o nɔn waa ira dɛ́ tɛr ba deŋne la ɡe ta cheɡɛ ɡɛ.

¹³ Israel tena la ta ba liire charɛ ba deŋnetɛra la habɔɔ, á ba ɛ kɛŋɔ baa nyin Nemenɛ Korowii bɔree.

¹⁴ Korowii ɛɛ tɛr Israel tena nomonome ne ba nɛra deŋnee. Wɛɛ teŋ baa ta kɛŋɔ baa teŋe daa nyundua ne o harɛbɔr bwa ta ken.

¹⁵ Nomonome ne nɛra baa dɔ jirima laanee daa la nyu, asɛ Korowii keamere baa dɛ teŋe nyosone o waa la ta la, ɡee daa la harɛbɔr.

¹⁶ Nɛra baa tɔ nɛra la sie la, ɡelɔ baa koni, dɛ ɡel banɔ la baa teŋɛ ba nɛɛ la ɡe nyoɡre kwaraa.

¹⁷ Anomanta, Korowii sie aa ba bini bonɔɔna nɛɛ lɛɛ ba, hale waa bilalbii ne luhaahna kwaraa sum nae ba, dɛkalkɛŋɔ ba bini bɛlbwa aa o waa ta teŋɛ, dɛ ɛ wechɔɡ-ɛɛra, ba wobol aa were. Anɔ bwa habɔɔ, o baah aa sɔɔh, o nɔn waa ira dɛ́ tɛr ba deŋne la ɡe ta cheɡɛ ɡɛ.

¹⁸ Ba wechɔɡa do kɛŋɔ nii naa dɛ lawɛ, dɛɛ fuh jabalnadaŋɛ ne sɔɔhne ken. A dɛ lawɛ kɛŋɔ kɔr aa dɛ fuh, a chuu ɛɛ kaa nyundua la ken.

¹⁹ Koranar Bwa Kooro bandia nomanta, o deŋnetɛra do kɛŋɔ nii aa dɛ fuh harɛ la ta bwa, dɛɛ fuh nɛra. Ásɛ nomɛlbwa aa o dɔŋ sumii na kpa.

²⁰ Baa kah kondikwaa nɔndiɡ ne ɡal bwa nee dɛɛ di, kɛ baa vaɡɛ, hale dɛ́ larawe ba biirere chwe.

²¹ Manasɛ dea nɛra ɛɛ yo Efrem dea nɛraa, ásɛ Efrem dea nɛra ɡe yoo ba, a ɡɛ deene anɛ nɔ ɛɛ pɛo dɛ́ yo Juda dea nɛra. Anɔ nɔ bwa habɔɔ, Korowii baah aa sɔɔh, o nɔn waa ira dɛ́ tɛr ba deŋne la ɡe ta cheɡɛ ɡɛ.