Aesaya 7 - mzwDBL

Kala aa kaala dɛɛ tɛ Kooro Ahas

¹ A ɡɛ saŋ, laa chole Juda Kooro Ahas ne koranar banɛ bane baah ta. Koranar la bɛlee Siiria Kooro Resin, bɛl ɡee Israel Kooro Pɛka, o mɛɛ sɔne Remalia. Kooro Ahas ɡe mɛɛ sɔne Jotam, o nabaa ɡee Ussia. Kooro Resin ne Pɛka kpɔ ba laa tena ba Jerusalam dɛ ba yoo ba, kɛ ba ta wone pɔ ba nɛ.

² A ɡɛ waa nɔ tel Juda Kooro Ahas ne o nɛra be kɛŋɔ Siiria tena ne Israel tena pɛo ba harɛ la ta dɛ́ ba yoo ba, asɛ ba bwara yɔr dɛɛ sa kɛŋɔ peu aa taa jo daa bini la.

³ Belaa Korowii ŋɔ Aesaya be ŋɔ, “Yerɛ he bie Sea Jasub, ásɛ he ne o ka cheme Kooro Ahas bɔɔ baa kwiu feelɔɔ ken le nyundua tam la ta nee palɛ dɛɛ kpɔ o bini la harɛbɔr, ŋwɛnɛ baah ta bela baa dɛ ɛ yale toma la.

⁴ Ŋɔ Kooro Ahas be ŋɔ ó sɔɔh bwara, wɛ́ɛ berɛ ɔma. Wɛ́ɛ berɛ ɡela o bambile chɔɡ. Ŋɔ o be ŋɔ, nindaa anɛ chuu ɔma ɡwaa Kooro Resin, ne o harɛ Siiria tena dɛ Kooro Pɛka ne o nɛra bandia.

⁵ Siiria tena ne Israel tena ne ba kooro nyoa pɛo ba dɔ liichɔɡa dɛ vɔrɔwe kɛŋɔ,

⁶ bá ka jo Juda tena harɛ ta dɛ́ yoo ba, dɛ́ bɔne o bini, ásɛ bɛ́lbwa dɔ o pera, dɛ́ kpɔ Tabeel bibaa so kora ta wɛ́ɛ nyiŋi o bwa ta.”

⁷ Anee Nemenɛ Korowii ŋɔ, “Aa ɡɛɛ ba. Aa chiɡa ba.

⁸ Damaskɔs laa Siiria harɛ bwɛjen aa? Kooro Resin ɡee Damaskɔs nyu te. Onee umeo? Bonɔ bene fifraanumɛl dɛ anue dɛ Israel harɛ paɡrɔ, waa bwɛbirii tel kpa.

⁹ Israel harɛ ta bwɛjen laa Samaria aa? Kooro Pɛka ɡee bwɛɛ la nyu te. Onee umeo? Dɛ he ta yarada dɔe dɛ che kiŋkiŋ naa, haa won che kɛrɛdɛ kpa.”

¹⁰ Korowii tomɔ ba ka ŋɔ Kooro Ahas be ja ŋɔ,

¹¹ “Soŋe Korowii háa dɛ tomɔ dɛ́ na waane, hale dɛ le lalabwɛɛ kɛɛ nyundujaɡla, á baɡle waa nɔ kasinteŋ.”

¹² Anee Kooro Ahas ŋɔ, “Maa soŋe dɛ́ na wobɛlbwa, maa Korowii daah dɛ́ na.”

¹³ Ate, Aesaya chaŋe ŋɔ, “Kooro Devid naanar, hɛ́ɛ no. Hae haa dɛ ha nɛra ba mee le ta maɡrɛ, asɛ he berɛ dɛɛ nyin he ha Korowii ɡe naa?

¹⁴ Korowii ɡbabir ɛɛ ɡeloo he na waane, á baɡle waa nɔ kasinteŋ. Hé no! Bitolo waa wola baa jemɛ bwa ɛɛ kpoŋe teaa dɛ́ lolɛ bibaa, ásɛ ba yerɔ Imanoɛl.

¹⁵ O baa kpeɡ dɛ jemɛ wedɛɛɡa ne wechɔɡa aa, waɡasi ne tohnoo ɡboo dɛɛ ba o kondikwaa ɛɛ.

¹⁶ A ne ɡɛ saŋ tela la, koranar banɛ nɔ baa dɛ aah heyaa nɔ, ba dɔma ɛɛ ba yoo baa dɛ́ pɔ ba nɛ, ba harɛre chɔ pɛɛpɛɛ.”

¹⁷ Aesaya ŋɔ, “Saŋ bɛl dɛ ba ásɛ Korowii ɡel wekpeɡa ba he ne he nɛra, ne he koodem nɛra nɛ, dɛ́ ɡwaa ɡɛ saŋ Israel tena ne Juda tena aa peɡri dɔŋa baah la. Korowii ɛɛ kpɔ Asiiria koojen ne o laa tenaa bá yo heya.

¹⁸ Gɛ saŋ Korowii ɛɛ fooloo yerɛ Ijipt harɛ ta nɛra baa lɔ nee nyoa bojaŋ bá wur ba kɛ chwɛɛhne ken, ne Asiiria tena ba ɡe warɛ ba kɛŋɔ toohna ken.

¹⁹ Baa bao dɛ́ ba su fɛlembɔɔne ne bwebɔɔne bini, dɛ́ tɔ sɔɔhne ne kondɛɛra dibɔra bwa ta.

²⁰ Gɛ saŋ Korowii ɛɛ kpɔ Asiiria koojenii kɛŋɔ nɛn waa dɛ fonɛ dɛ le Yufretis Moo baŋ, ó ba fonɛ he nyumpona ne he tampona dɛ he bwara pona bwa.

²¹ A ɡɛ saŋ la baa tel dɛ nɛn dɔ nalor ne boohna anɛ kwaraa naa,

²² aa wonoo tɛo elnee ɡɛ del waa dɛ nyin. Nɛra baa ba dɔ ba nyu dɛ́ ka harɛ la ta la, waɡasi ne tohnoo ɛɛ bu ba nɛɛ.

²³ Gɛ saŋ la, bobɛlbwa baa parɛ daa kooni la, daa kaɡboŋ a yoɡ aa ɛ suuɡapoŋa kaɡboŋ la bwa ɛɛ heo, bela berɛ le sɔɔhne ne jabalnadaŋɛre ɡbo.

²⁴ Nɛra ɛɛ kpɔ belaa berɛ kpaah bɔr, dɛ́ kpɔ hɛma jo bela. Harɛ la bwa dɛ ba sɔɔhne ne jabalnadaŋɛre ɡbo lee.

²⁵ Deŋɡarere ba fa aa dɛ para la, jabalnadaŋɛre ne sɔɔhnee dɛɛ ba a ta lee, nomɛlbwa aa wola won jo bela. Nae ne peeraa dɛɛ ba bela kpɔe dɛ́ berɛ dibɔr.”