Aesaya 66 - mzwDBL

Korowii ɛɛ bol harɛre nɛra waa dɛ́ pa bole

¹ Korowii ŋɔ, “Nyunduaa n kara, asɛ harɛ ɡee n natiɡribɔr. Debesoo siwii hɛɛ ba wona ma ń jo o ta nɔ? Debesoo taa ń won jo dɛ́ chɔ onɔɔ?

² N ɡbaɡba laa ta ɡɛ kwaa nɔ bwa kɛɛ?” Korowiirii bola. Korowii berɔ ŋɔ, “Nɛra baa pwɛr ba te, dɛ sɛh ba liire chara laanee mɛɛ nyin kohona. Banee dɛɛ ɔm mɛ dɛɛ no n wa.

³ Gɛ nɛra la dɛ ɛ waa aa too ba tea. Ba kpo nao ɛ saraha tɛ mɛ naa, a do kɛŋɔ baa kpo nɛn ken, a do kɛŋɔ baa kpo nyoate. Gɛɛ nomɛlbwa waa ɛ mea saraha la, a do kɛŋɔ parakoo chal, bɛlbwa fuh daawiile ɡe aa, a do kɛŋɔ waa dɛ tu voɡa. Kwaa maa kia la taa ba sie ɛɛ lɛ.

⁴ Anomanta, mɛɛ kpɔ wekpeɡaa ba ta ba nɛ, waa baa dɛ ɔma kohona la. Dɛkalkɛŋɔ n yer ba, bɛlbwa ta chaŋɛ, dɛ bol wa, bɛlbwa ta deŋne cheɡɛ dɛ no. Ba berɛ habɔɔ kpo mɛ, dɛɛ ɛ waa maa wola nyin.”

⁵ Hé no waa Korowii aa dɛ bol, he nɛra haa dɛ ɔmɔ dɛɛ no o deŋna waa la. O ŋɔ, “He wa aa dɔ kasinteŋ tɛ mɛ nomanta, he bala bane hah heya, dɛ vɛh heya. Ba dɛ muɡli he baah ŋɔ, ‘He ɡel Korowii baɡle o kpeɡri dɛ́ lɛ heya ásɛ ya na he silɛɛ.’ Kɛ ba ɡbaɡbaa dɛɛ ba sihiih dii kohona.

⁶ Hɛɛ no moola kohona aa dɛ le bwɛjen la bini, dɛ́ no ɡbɔɡa aa le Korowii Dea bela. Korowii deŋnetɛra waa kpɔa dɛɛ tɛ o dɔma moolaa.

⁷ N bwɛjen waa do ɡoroŋ la do kɛŋɔ haah waa lolɛ bie waa wola weweele bɛlbwa nae.

⁸ Nomɛl noɔ kɛɛ dɛ na waa nɔ dɔŋa ka aa? Baa won vɔrɔwe harɛbir tɔpebeŋkpoŋ aa? Gɛɛ loltea aa wola Saayɔnee lɔ biɡri ó na weweele mɔɔ dɛ́ lolɛ o bii.

⁹ Mɛɛ pili haah lolee dɛ́ berɛ vɔmɔ bie aa? He bɛ lii kɛŋɔ saŋ telo kɛŋɔ ba lolɛ n bii aa, mɛɛ tɔ a ŋwɛnɛɛ.” Korowiirii bola.

¹⁰ He banɔ la haa dɛ nyin Jerusalam waa la, he ne ó pɛ lɛ sie. Nɛra haa wia tɛo bwa ɡe hɛɡre.

¹¹ Jerusalam ɛɛ dɛɛ heyaa hé dɔ o kondɔɔh la ane hé sie lɛ, kɛŋɔ haah elne yon bu o bie nɛɛ ó ɔr vaɡɛ la.

¹² Korowii berɔ ŋɔ, “Jerusalam, mɛɛ ɡeloo deŋnesɔɔhna ne harɛre kondɔɔh bu he nɛɛ kɛŋɔ, nee waa wola hweeh bwa ken. Hɛɛ ɛo kɛŋɔ haah yon kpoŋe o bie nɔn ta, dɛɛ nyinu, dɛɛ dɛɛro la.

¹³ Mɛɛ larawe Jerusalam tena bwaraa, ɡɛ haah yon dɛɛ ɛ o bie la.

¹⁴ Dɛ he na ɡɛ waa nɔ a chiɡ aa, he sie ɛɛ lɛo, a tɛɛ kpeɡri, ásɛ he jemɛ kɛŋɔ n dɛ cha nɛra baa dɛ no n deŋna wa, dɛɛ baɡle n bandia nɛra baa ɛɛ mɛ dɔm nɛ.”

¹⁵ He na, Korowii kpɔ o torɔɡore dɛɛ ba nii ne kɛŋɔ kawulewule. O baah dɛ fuh kohona, wɛɛ ba ó ba tɛr nɛra deŋne.

¹⁶ Nii ne laalee wɛɛ ba kpɔe tɛr harɛ nɔ nɛra bwa deŋne. Nɛra waa kpoo ba ɛɛ warɔɔ taeh.

¹⁷ Korowii ŋɔ, “Saŋ telo kɛŋɔ n kpoo banɔ la baa laa doŋa kpɔ ba nɛɛ dɛɛ la voɡa ta daa mune, ne banɔ la baa dɛ chwe parakoo ne mari, dɛ kondikwaa bwa soo siwi maa kia la.

¹⁸ Maa jemɛ ba liire ne ba we-ɛɛla nomanta, n dɛ ba ń yerɛ harɛre nɛra, ne wobol bɛlbwa tena bwa cheme, ásɛ ba na n jirima.

¹⁹ Mɛɛ ɛ waane ba binii, dɛ́ tomɛ banɔ la baa le a nyoa la, ásɛ ba la bojaŋa harɛre nɛra baa wola n waa noɛ dɛ na n jirima ne n kpeɡri la be. Harɛre nɛra kɛŋɔ, Taases ne Lebya dɛ Lidia tena. Lidia tena nɔ jemɛ to tae taeh, ne Tubal ne Grik tena harɛ. Gɛ harɛre nɔ nɛra bee baa ba laŋa dɛ́ ka bol n kpeɡri maa dɔa la waa baɡ ba.

²⁰ Baa kpɔ he bala baa lɔ bela harɛre la ta laanee ba tɛ mɛ kɛŋɔ koŋkɛɛla ken. Jaɡre ne keeɡore ne nyoɡmare ne kwaa aa do kɛŋɔ torɔɡore, ne anɔ la aa dɔ tɔre baa taɡa nee baa ba koŋkɛɛla ne bala ba tɛ mɛ, n bwejen waa do ɡoroŋ ta Jerusalam. Baa ba a nee kɛŋɔ Israel tena yon kpɔ mea sarahare do kondɛɛɡa bini baa tɛ mɛ n Dea la ken.

²¹ Mɛɛ le ba bini banee ɛ sɔfore ne Lewi dea tena.”

²² Korowii ŋɔ, “Gɛ harɛfale la ne nyundufale maa dɛ́ ba tae a che n kpeɡri ta dɛ́ che kiŋkiŋ la, ɡɛɛ he ne he naanar sɔna ɛɛ ba cheɡa.

²³ Korobifale Tɔpejena dii ne Ona Tɔpere bɛlbwa ta la, nɛwɛnyina bwa ɛɛ ba tom mɛɛ Jerusalam bonɔ.

²⁴ Nɛra ɛɛ leo dɛ́ kaa nyiŋi banɔ la baa ɛɛ mɛ deŋnekpeɡ la lala kɛ baa serewa chɔ. Dudule aa dɛ di ba ola la aa sewɛ bwa, nii aa dɛ fuuh ba ɡe aa dime bwa, ásɛ ba waa pe nɛwɛnyina bwa.”