Aesaya 6 - mzwDBL

Korowii yerɛ Aesaya ŋɔ ó ɛ o keame

¹ A bena Kooro Ussia aa sewa, men Aesaya na Korowii chaahna ta, dɛ o soɡe kookara waa daŋa dɛ ɡwaa komɛlbwa ta, asɛ o laala tɔ Korowii Dea bela harɛ bwa.

² N berɔ na hweera kwaa ane aa dɛ lawɛ nii dɛ baro cheme baa yera Serafim. A bɛlbwa dɔ kena anumɛl. A kpɔ a kena la bini anɛ dɛɛ tɔ a siebɔr, dɛ kpɔ anɛ dɛɛ tɔ a nakpale ta, asɛ dɛ kpɔ anɛ aa kaa la ɡe dɛɛ ir.

³ Asɛ a bini bɛlbwa ɛɛ ŋɔ o dɔŋ be ŋɔ, “Koranar Bwa Kooro do ɡoroŋ, o do ɡoroŋ kɛrɛdɛ. O jirima su harɛ nɔ bwa ta.”

⁴ Asɛ a taa ɡel Korowii Dea la doonyoo ɡbeni daa la ne a doonyojoo bwa ɛɛ jiɡri, chuu tɔ Dea bela bwa.

⁵ Anee n ŋɔ, “Akwe! N na wa. Wechɔɡa ɡboo n nyoa wobol bwa, asɛ n so nɛra wechɔɡa aa lɔ ba nyoo baah ta, dɛ berɛ na Koojen, Nemenɛ Korowii nɔ.”

⁶ Belaa Serafim la bɛl kpɔ nyɛwa, dɛ kpɔ ka nyɛwɛ nihɔl le kon baa ɛ saraha o ta dɛɛ tɛ Korowii la ta, dɛ kpɔ ir ba n be,

⁷ dɛ ba kpɔ tɔrɛ n nyoa dɛ ŋɔ, “Na, nihɔl nɔ aa tɔre he nyotɔn nɔ, he bolchɔɡ bwa le he nɛ. Korowii kpɔ he wechɔɡa kɛɛ.”

⁸ Asɛ men Aesaya berɛ no kɛ Korowii aa ŋɔa ŋɔ, “Umee ń tomɔɔ? Umee dɛ́ la tɛ yaɔ?” Anee n sɛh ŋɔ, “Mɛɛ lao, tom mɛ.”

⁹ O ŋɔ, “La dɛ́ ka ŋɔ Jerusalam tena be ŋɔ, ‘Hɛ́ɛ no n waa kohonaa, kɛ haa a mun noe ba, hɛɛ nyiŋi a bini kohonaa, kɛ haa waa aa dɛ ba chiɡa jema ba.’ ”

¹⁰ Korowii berɔ ŋɔ n be ŋɔ, “Ka ɡel nɛra nɔ bambile do kpeɡri, tɔɔɡe ba deŋna, dɛ tɔɔɡe ba sibie ɡe. A waa laa aa, ba sie fe ɛɛ nao, ásɛ ba deŋna no, ba bambile lawa, bá berɛ ba n be ń lɛɛ ba.”

¹¹ Anee n ŋɔ, “N Naa Korowii, dɛ ka tel saŋ besoo?” O chaŋe ŋɔ, “Dɛ ka tel kɛŋɔ bwɛjena la aa berɛ dimɡbia, nomɛlbwa aa wola a taa so, ásɛ deremi aa lɔ a ta la chɔ pɛɛ, kooni bwa berɛ pua.

¹² Mɛɛ doŋi nɛra laanee kaa bojaŋ, dɛ́ ɡel harɛ la bwa chɔ pɛɛ.

¹³ Dɛ nɛn beŋkpoŋ kwaraa ka harɛ la ta kwaraa naa, mɛɛ chɔɡ o ɡbaa. Wɛɛ ɛo kɛŋɔ ba yon teŋe daa a ka o muŋkpul che dɛɛ moɡɛ la.” Daa la muŋkpul la cheɡɔ tɛ n nɛra baa ba ka harɛ la ta la.