Aesaya 57 - mzwDBL

¹ Nɛra ba wa aa toɡra dɛ́ serewe, dɛ nomɛlbwa waane laa, hale nomɛlbwa aa a mun jemɛ. Ba serewaa, wenaale bɛlbwa aa ba nɛɛ ba kpa.

² Nɛra baa ɛ nɛndɛɛɡa la, ba serewaa, ba dɛ chɔ sɔnɔnɔɔ deŋnesɔɔhna ta.

³ Kɛ heya, sɔmmɔra bii, nɛra baa dɛ chɔɡ yal ne jwamane tena bii, hé ba bonɔ!

⁴ Ume loroo hɛɛ di nɔɔ? Ume baahnee hɛɛ muɡli dɛɛ mile he nyoo o nɛɛ nɔɔ? Deŋnekpeɡ tena naanar ne nyosonteŋna dwee laa heyaa?

⁵ Hé liire bwaa kɛŋɔ hɛɛ di sɛm he voɡa dajena mune. Hé dɛ kpoo he bii dɛɛ ɛ sarahare voɡa aa lɔ bwebɔɔne aa bɛne nenabɔɔne ta.

⁶ Bwea aa bwara aa loɡaa, he kpɔ le nenabɔɔne ta ɛ voɡa dɛɛ toma. Anee he wee sen saraha dɛɛ tɛa, dɛɛ tɛa mea saraha ɡe. Anɔ nɔ bwa, a chɛ kɛŋɔ, n sie lɛ a ta naa?

⁷ Bwejena doree he la dɛ ka kpoo kwaa dɛɛ ɛ saraha, dɛɛ di sɛm.

⁸ Hale he kpɔ he voɡa cheɡ he deremi dɛ tɔ ɡbeni a ta. He chwa mɛ, dɛɛ tomɛ voɡa, a do kɛŋɔ he ne aa dɛ chɔ mpa ta dɛɛ di sɛm ken. He bambile lawa taeh, he yoɡ he te tɛa he ne a pɛ dɛɛ ɛ wedoŋa.

⁹ He dɛ fɔɡle ɔleve noo ne nosɔɔhsoma kohona dɛ kaa tomɛ he voɡ Molɛk. He tomɛ nɛra bojaŋ, hale lalabwɛ dɛɛ nyin voɡfala.

¹⁰ He chwao ti voɡa dɛ koh, kɛ dɛ vɛh ɡela. He berɔ kwaa dɔ bokpeɡfala dɛɛ nyin voɡfala, haa ɡwɛɡre.

¹¹ Korowii ŋɔ, “Bɔkwa tenee voɡa hɛɛ ɔma kohona dɛ le n habɔɔ, dɛ soh n waa kwaraa ɡɛ nɔɔ? Maa mwaa he bwa ne saŋ la bwa, waa ɡela haa wola men ɔmɛ nɔ kɛɛ?

¹² He dɛ lii kɛŋɔ anɔ la haa dɛ ɛ la toɡrɔ, kɛ mɛɛ le he mun nee waa haa dɛ ɛ ta. He voɡa aa tɔnɔ bɛlbwaa dɔ tɛ heya.

¹³ Dɛ waane pu heya aa, hé do lɔŋɔ tɛ he voɡdamanta la, á ba lɛ heya. Peu bɛlbwa ɛɛ won che a bwa kaa. Nyoa peu kwaraa ɛɛ won kpɔa kaa. Kɛ nomɛlbwa waa kpɔ o te dawɛ n nɛɛ la te ɛɛ so harɛ la taa, dɛ́ tom mɛ N Dea Jerusalam.”

Nɛra baa dɛ pwɛr ba te bolarawa

¹⁴ Korowii ŋɔ, “Kwaa ŋwɛnɛ, kwaa ŋwɛnɛ tɛ n nɛra bá ba! Laa komɛlbwa waa tɔ bɔr la kpɔ ta.

¹⁵ Menee dɔ sɔn dɛ ɡwaa komɛlbwa dɛ do ɡoroŋ, dɛ do le saŋ bɛlbwa. N soɡe n kookara waa daŋa ta boɡoroŋ nyundua, dɛ berɛ so nɛra ba tea bini aa chɔɡa ba wechɔɡa wa. Ba pwɛr ba te baah ta, dɛ́ ɡel ba sie sɔɔh, bá dɔ hwɛɡa ja.

¹⁶ Maa teŋɛ dɛ kpɔ waa dawɛ n nɛra nɛ, kɛɛ n baah di ba nɛɛ saŋ bɛlbwa. Dɛ ɡɛ laa aa, ba bwara ɛɛ hwaoh n sie. Menee ta ba, dɛ tɛɛ ba mkpa.

¹⁷ Ba wechɔɡa ne ba sibeɡra waa nomanta, n baah fa di ba nɛɛ taeh, asɛ n tɛr ba deŋne dɛ laa sie kpɔ ba nɛ. Kɛ ane a bwa ba deŋne kpeɡri, dɛɛ ɛ waa ba bambile aa lawa.

¹⁸ N jemɛ ɡɛ ba wechɔɡa ɛɛ aa chɔɡ ba kɛŋɔ weela, kɛ mɛɛ chaah baa, dɛ́ tɔ ba sie, dɛ́ baɡ ba ŋwɛnɛ, dɛ́ larawe banɔ la baa dɛ wi bwara,

¹⁹ ásɛ Israel tena wii berɛ kpɛɛra. Banɔ la baa lɔ bojaŋa ne sie bonɔ la, mɛɛ tɛɛ baa deŋnesɔɔhna tentenee, mɛɛ chaah baa. Men Korowiirii bola.

²⁰ Wechɔɡ-ɛɛra te do kɛŋɔ mpo nehɛma aa wola won bobeŋkpoŋ che, dɛ yon che doŋa bwa soo siwi baa ta la ken.

²¹ Deŋnesɔɔhna toole tɛ wechɔɡ-ɛɛra.” Korowiirii bola.