Aesaya 55 - mzwDBL

Korowii dɛ yerɛ nɛra nyɔɡre aa dɛ kpo ba

¹ Korowii ŋɔ, “Hé banɔ la nyɔɡre aa dɛ kpo heyaa la, nee lole, hé ba nyɔ! He ta suuɡa dɔe yaa, hé ba, hɛɛ dɔ kondikwaa di pɛɛpɛɛ! Sen ne na-elnee lole, suuɡa ne laa baa yawa, yoɡ ɡe toole a ta!

² Bɔkwa waa hɛɛ chɔɡ suuɡa kwaa aa wola kondikwaa ɛɛ ta, dɛɛ koh kwaa aa wola vaɡɛ ta nɔɔ? Hé cheɡ deŋne kɛrɛdɛ dɛɛ no waa maa dɛ baɡle heya, ásɛ dɛ dɔ kondikondɛɛɡa di.

³ Hé cheɡ deŋne, dɛ́ ba n be, hé no n be, ásɛ dɛ dɔ mkpa. N ne hɛɛ fɔwɛ fɔwee o do le saŋ bɛlbwa dɛɛ la, ɡɛ maa baɡɛ Devid nyoa ŋɔ, mɛɛ dɛɛ nyin o waa kasinteŋ nee la.

⁴ Menee ɛo harɛre nɛra sitɔɔ ne nomoa, ásɛ a che o nɛɛ ń baɡle n kpeɡri.

⁵ Kpelaa, hɛɛ yerɛ harɛre nɛra baa wola hen jemɛɛ, bá ba he be, harɛre nɛra haa wola ban jemɛ ɡe ɛɛ chwao ba he be. Men Israel Nɛŋɡoroŋ haa dɛ tom mɛ nomanta, baa ba he bee, jirima maa ɡela he dɔ la wa.”

⁶ Hé nyin Korowii bɔr saŋ haa nao nɔ ta, hé yerɔ, taraken waa bɛne heyaa nɔ.

⁷ Nɛnchɔɡe ɡel wechɔɡa ɛɛ, dɛ́ charɛ o liire, dɛ́ berɛ ba Korowii yaa dɛ tomɔ be. O dɛ sune nɛn nɛ, dɛ kpɔ wechɔɡa dɛɛ kɛ o bambile bwa ne.

⁸ Korowii ŋɔ, “Waa haa dɛ lii laa mɛɛ lii, he we-ɛɛla dɔŋa laa mɛɛ ɛ.

⁹ Gɛ harɛ ne nyundua baah aa jaŋa la, ɡɛɛ n we-ɛɛla ne n liire ɡwaa he kwa.

¹⁰ N waa la do kɛ bwaala ne mɛn yon le nyundua dɛ pweh harɛ la ken. A ɡelɔ kwaa baa dua won ɛɛ, nɛra dɔ kondikwaa di, dɛ́ dɔ a dwee ɡe du.

¹¹ Gɛɛ waa aa le n nyoa ɛɛ ba ɛɛ. Maa bol á berɛ ba n be pɛɛpɛɛ, nemenɛ waa maa dɛ nyin la bwa aa ɛa ka tonɛ.

¹² Silɛɛ nee hɛɛ ba Babelɔn lee, bosɔɔhna nee baa ba he sie tɔe le he ne bwɛjen la ta. Bwejena ne deŋɡarere bwa ɛɛ nao dɛɛ ɡo yela, daa bwa ɡe lɔ kpaŋa.

¹³ Bela sɔɔhne aa lole la, dajaŋa ɛɛ le a buɡ taa, ásɛ jabalnadaŋɛre le dadɛɛɡa buɡ ta. Gɛ waa nɔ ɛɛ ɡeloo Korowii dɔ sɔn kohona, dɛ́ chɔ saŋ bɛlbwa dɛɛ lii waa men Korowii aa ɛa.”