Aesaya 48 - mzwDBL

Israel tena deŋnekpeɡ wa

¹ Korowii ŋɔ, “Hé no, Jekɔb naanar baa bera dɛɛ yerɛ heyaa Israel tena he le Juda dea, he dɛ ŋwɛɛ men Korowii sɔn, dɛɛ ɛ kɛŋɔ he dɛ tomɛ Korowii Israel tena aa dɛ tomɔ la, kɛ haa waa haa dɛ bol la ɛ.

² He dɛ́ maŋkura he te ŋɔ he le bwɛjen Jerusalam, dɛ ŋɔ he kpɔ he te dawɛ men Koranar Bwa Kooro, Israel tena aa dɛ tom mɛ la nɛ.

³ Fini laa n le dɛ bol waa aa ɛa. N bola biɡri asɛ he jemɛ, buɡ la taa n den ɡel a ɛ.

⁴ Dɛ n jemɔ kɛŋɔ he deŋne kpeɡri kɛŋɔ buni, he lwɛɛma do kpeɡri kɛŋɔ bwe.

⁵ A waa ɡela n bol waa aa dɛ ba bala kerekere la, dɛ bol waa aa dɛ ba chiɡa mɔɔ á chiɡ, ásɛ he bɛ ba ŋɔ he voɡaa ɡela a chiɡ.

⁶ He no waa n fa aa bola baɡle heyaa asɛ a ɛ ɡɛ. A chɛ kɛŋɔ hé sɛh kɛŋɔ a ɛ kpela. Le fini dɛɛ kaa mɛɛ bol wefala aa sɔah maa wola he be bolɛ la he bee.

⁷ Tarakenii mɛɛ ba ɡela a chiɡ. Waa aa do ɡɛ ta chiɡe bwa. Ane chiɡo ka aa, he fe ŋɔ he jemɛ a wa.

⁸ N jemɔ kɛŋɔ he waa ta kasinteŋ dɔe, he ɛ nɛra bane baa jema kɛ ɡaeh tenaa heya. A waa haa wola waa nɔ bwa no la.

⁹ N sɔn ne kpɛɛra waa mɛɛ lawɛ bambile he nɛ, ásɛ dɛ bɛ heyaa ba chɔɡ.

¹⁰ N do heyaa weweele ta, dɛ daah heyaa na, kɛŋɔ ba yon do suuɡapoŋ nii ta dɛ mwɛɛlo la. Kɛ n nao kɛŋɔ haa siwi su.

¹¹ N ɡbaɡba waa n ɛa ɡɛ. Maa ɡel n sɔn chɔɡ, maa ɡel he kpɔ jirima aa chɛ mɛ la tɛ nomɛl.”

Israel tena dɔ ba te le Babelɔn lɔɡa

¹² Korowii berɔ ŋɔ, “Hé no n be, Israel tena maa yerɛ heya. Menee Korowii, menee komɛlbwa sitɔɔ, ne muŋkaa.

¹³ N ɡbaɡbaa kpɔ nɔn pa harɛ mun, dɛ kpɔ n nɔndiɡ baŋre nyundua. N yera aa, a dɛ ba n be.

¹⁴ Hé bwa ba cheme dɛ́ no. Voɡa la bini umee wona baɡle anɔ nɔɔ? Nɛn maa leo la ɛɛ yo Babelɔn tenaa. Wɛɛ ɛ waa maa dɛ nyin kɛ o ɛ bwaa.

¹⁵ Menee pili nyoa dɛ yerɔ, menee leo dɛ ɡel o won ɛ o toma bwa ka tonɛ.

¹⁶ Hé suuh tel n be, dɛ́ ba no waa nɔ. Le waa nɔ mumpar bwa n ta wobɛlbwa bolɛ a sɔh heya, n wobɛlbwa maa bol la, a dɛ ɛ kpela.” Nemenɛ Korowii cheɡɛ o Doma ta, dɛ tom mɛ.

¹⁷ Waa Korowii, waa ɛ he Lɛɛ, Israel Nɛŋɡoroŋ la aa dɛ bolee nɔ, “Menee Korowii haa dɛ tom mɛ la, menee dɛɛ chaɡle heyaa anɔ la aa wera tɛ heya, dɛ berɛ dɛɛ chaɡle heyaa ŋwɛnɛ aa chɛ kɛŋɔ hé kpɔ o ta.

¹⁸ Dɛ he fe cheɡ deŋne n waa ta naa, he fe dɔ deŋnesɔɔhna kɛrɛdɛ, kɛŋɔ nenabɔɔ waa wola hweeh bwa, dɛ́ dɔ kpeɡri kohona kɛŋɔ mpo nehɛma ken, dɛ́ won wobɛlbwa ɛɛ á toɡre.

¹⁹ He naanar fe ɛɛ warɔ kɛŋɔ mpo nyoa hɛŋle ken. N fe nyiŋ ba kɛrɛdɛ ba dɔma bɛ won chɔɡ ba, ásɛ ba sɔn bɛ he.”

²⁰ Hé le Babelɔn harɛ ta, hé chwa le o nɛra bini! Hé kpɔ silɛɛ taa bol bobɛlbwa ŋɔ, “Korowii lɛ o bonɔɔna Israel tena.”

²¹ Waa kpɔ ba kpɔ pua hɛŋle ɡbo harɛ ta la, nyɔɡre ta ban kpoe. O ɡelɔ nee bule le bwe ta tɛɛ ba. O pere bwe nee palɛ le o ta.

²² Korowii ŋɔ, “Bosɔɔhna toole dɛ tɛ wechɔɡ-ɛɛra.”