Aesaya 47 - mzwDBL

Babelɔn paɡra wa

¹ Korowii ŋɔ, “Babelɔn, bwɛjen baa wola yoi dɛ pɔ he nɛ, he do kɛŋɔ bitolo waa wola baa jemɛ. Tu he kookara ta, dɛ́ ba so harɛ. Taraken baa hen ɡbɛɡbɛ kpa, he berɛ yom.

² Ka namɛ men nam ta, laa kon haa kpɔa bɔle sie la kpɔ, dɛ́ laa yal ɡbaa he hwie ta, dɛ́ jo neerare le a baŋ.

³ Nɛra ɛɛ nae kɛŋɔ he cheɡɛ mumɡbal, baa na sihiih haa dia. Mɛɛ bɔe he wechɔɡa kemee, maa nomɛlbwa nɛɛ sune.”

⁴ Ya Lɛɛ, Israel Nɛŋɡoroŋ, Koranar Bwa Kooro yaa dɛ tomɔ la.

⁵ Korowii ŋɔ, “Babelɔn haa do kɛŋɔ bitolo, so harɛ biro ta jeiih ken. Baa hen harɛ nɔ ta bwa bwɛɛre haŋkooroo yerɛ kpa!

⁶ N baah fa di n nɛra Israel tena nɛ, n tɛr ba deŋne kɛŋɔ n nɛra laa ban ken, dɛ kpɔ ba do hen Babelɔn nɔn ta. He ta ba nɛɛ sune, hale banɔ la baa hwɛɛhra kwaraa la, he do ba hɔhɔrɔwa.

⁷ He fa ŋɔ hɛɛ teŋɔɔ dɛ ɛ haŋkooro saŋ bɛlbwa dɛɛ la, anomanta, he ta ɡɛ we-ɛɛla nɔ kpɔe do he liire bini, a ba ɛ kɛŋɔ hɛɛ lii ɡɛ aa dɛ ba he chiɡa.

⁸ No, he dɛ di he bwara, dɛɛ lii kɛŋɔ wobɛlbwa toole dɛ́ won ɛɛ. He ŋɔ he ne Korowii kɛrɛdɛ, dɛ ŋɔ, nomɛlbwa toole he habɔɔ. He ta liire kɛŋɔ hɛɛ ɛ luhaahnee bwa, haa biseo ɡee di.

⁹ Gɛ webele anɛ nɔ ɛɛ piɡri tɔpebeŋkpoŋii. Ane he kaberere bwa, hɛɛ di bisewee, he jaa sewɛ.

¹⁰ He kpɔ he te dawɛ he wechɔɡa ɛɛ ta, dɛ ŋɔ, ‘Nomɛlbwa aa men na.’ He wejema ne he liire wili dɛ ɡel he ŋɔ, ‘Menee men. Nomɛlbwa toole n habɔɔ kpa.’

¹¹ Wekpeɡa ɛɛ pui, he bebee waa bwa aa won sɔɔh a nyoa. Siswɛm waa ɛɛ pui, waa haa wola a waa deere bwa piɡri.

¹² Anomanta, ir nyu ne, dɛ́ do sie he kaberere ne he dobodobo we-ɛɛla aa wara he le a ne bechale saŋ, dɛɛ ɛa la. A ken ɛɛ won ɛ waane, he ken ɛɛ won kpɔ aah he dɔma.

¹³ Jae bwa haa dɔa habɔɔ, he ta kpeɡri bɛlbwa dɔe. Gel wejerema baa jemɛ weweela wa, dɛɛ baɡle waa aa dɛ ba chiɡa korobie bɛlbwa ta, ir ba lɛɛ le waa aa dɛ ba he pui la ta.

¹⁴ Na, ba do kɛŋɔ kpɔɡhole, nii ɛɛ fuuh baa. Hale baa won lɛ ba te le ninlao la ta kwara. Gɛ nii la ta doe kɛŋɔ nii haa won la a jwɛɛh ka ŋwee.

¹⁵ Waa nɛra haa le he bechale saŋ dɛɛ la ba be baa jae la aa dɛ ba ɡela he na laanee. Bɛlbwa ɛɛ nyin bɔree dɛ́ chwa kaa, bɛlbwa aa lee do, dɛ́ lɛɛ.”