Aesaya 46 - mzwDBL

Babelɔn voɡa wa

¹ Korowii ŋɔ, “Babelɔn tena voɡa Bel ne Nɛbo baa dɛ toma la di sihiih, ba paa dawɛ keeɡore ta a ɛ bontɔɡa a chea dɛɛ koh.

² Voɡa la ta wone lɛ a te, ba dɔma cheɡɛ a bwa kaa.

³ Israel tena haa kaa la bwa, hé no n be. Menee nyiŋi he nɛɛ le ɡɛ saŋ baa lolɛ bwa.

⁴ Menee dɛɛ ba he nɛɛ nyiŋa, dɛ́ ka tel he hwɛɛhra saŋ he nyumpona aa to. Menee ta heya, mɛɛ chwaa heyaa, dɛ́ kpoŋe heya, dɛ́ lɛ heya.

⁵ Umee hɛɛ ba men kpɔe maɡɔɔ? Umee do kɛ men ɔ?

⁶ Bane fuɡe suuɡaswɛm ne suuɡapoŋa le pure bini, dɛ kpɔa dawɛ kon baa kpɔa dɛɛ kari kwaa ta. Ba kpɔa tɛ nɛn waa dɔ suuɡaswɛm kpɔe dɛ ɛ kwaa wejema o kpɔ kwaa voɡ, asɛ ba ɡuŋi dɛɛ tomɔ.

⁷ Ba ɡɔɔro dɛ chwaa, dɛ choɡo cheɡ o chebɔr aa, dɛ o cheɡɔ, waa won tu nakpala. Ba yerɔ waa won sɛh. Waa won lɛɛ ba le ba wahala ɡe ta.

⁸ Wechɔɡ-ɛɛra, hé lii waa nɔ, dɛ́ ɡel a ka he nyu bini. Hé ɡel he siwi swɛɛ a ta.

⁹ Hé lii waa aa chiɡa saŋ la. N ɡboo Korowii, n dɔŋ toole.

¹⁰ N bol waa aa dɛ ba chiɡa mɔɔ a ba, saŋ la bwaa n le baɡle anɔ la a taa dɛ ba bala. N ŋɔ waa maa maɡla bil bwa ɛɛ ɛo, mɛɛ ɛ anɔ la bwa n tea aa tooraa.

¹¹ Mɛɛ yerɛ nomɛlee le bojaŋ harɛ wee leebɔr, ásɛ o ba tawɛ harɛ nɔ ta nɛra baah ta kɛŋɔ kela ken, dɛ́ ba tonɛ anɔ la maa maɡla bil bwa. Waa maa bola la, anee dɛɛ ba ɛɛ.

¹² Hé no n be, deŋnekpeɡ tena, he ne waa aa toɡra baah jaŋne.

¹³ N dɛ ba n waa aa toɡra ne. A toole bojaŋ, aa biɡri kwaraa. Mɛɛ lɛ Jerusalam tenaa, dɛ́ ɡel ba dɔ n jirima.”