Aesaya 41 - mzwDBL

Korowii waa dɛ cha Israel tena

¹ Korowii ŋɔ, “Harɛre nɛra, hé hel dɛ́ no n be! Harɛre nɛra, hé nyin bokpeɡfala, dɛ́ ba bol he wa! Ya bwa cheme kɔɔto ásɛ bɛlbwa bol o wa.

² Umee le nɛn le wee leebɔr ɔ? Umee tɛo kpeɡri o won yo lɛ harɛre dɛ pɔ a koranar nɛɔ? O kpɔ o tokobi dɛ kpoo ba, dɛ kpɔ o to ne hɛma ba peɡre, kɛŋɔ peu aa taa dɛ kpɔ tutuɡ ne haahra kaa la.

³ O dɛ ti ba, dɛ́ doŋ ba dɛɛ kaa, wobɛlbwa aa wola on ha. O ɡbaŋre, a do kɛŋɔ o nakpale aa harɛ leɡe ken.

⁴ Umee ɛ waa nɔ dɛ ɡel a maɡre, kɛŋɔ waa yerɛ nɛra ne ba naanar ne ba ɡe naanar le mumpar bá ɛ o toma ɔ? Men Korowii maa lole le mumpar la, menee ɛa, menee dɛɛ ba nɛra baa ka mun ɡe nɛɛ jae.

⁵ Nɛra baa lɔ ekwie harɛre ta naa dɛ ɔmɛ, hale banɔ la baa lɔ harɛ jaɡa bwara ɛɛ sa ba suuh tel dɛ ba,

⁶ bɛlbwa ɛɛ cha o dɔŋ, ásɛ dɛ yon ŋɔ o be ŋɔ, ‘Che kiŋkiŋ!’

⁷ Nɛn waa dɛ sɛh kwa dɛ́ do nɛn waa jemɛ suuɡaswɛm kpɔe dɛ ɛ o bwara ɡbemba. Nɛn waa lɔ suuɡaswɛm dɛɛ pɛ dɛ ɛo voɡ la, dɛ́ do onɔ la waa dɛ loɡa o bwara ɡe ɡbemba. O ŋɔ o be ŋɔ o ɛ wa, dɛ kpaa dadowɛre do voɡ la ta, o bɛ chole.

⁸ Kɛ he te, Israel tena haa ɛ n bonɔɔna, Jekɔb naanar maa le heya, n dam Abraham dwee,

⁹ harɛ jaɡa lee n kpɔ heyaa le, o jaɡaa n yerɛ heyaa le, dɛ ŋɔ, ‘N bonɔɔnaa heya.’ N le heyaa tɛ n te, n ta heyaa tae.

¹⁰ Anomanta, he bɛ ɔmɛ, n ja he nɛ. He bɛ ɡel he bambile chɔɡ, menee Korowii haa dɛ tom mɛ. Mɛɛ tɛ heyaa bokpeɡaa, dɛ́ cha heya. Mɛɛ kpɔ nɔnee tɔ he nɛ, dɛ́ lɛ heya.

¹¹ Nɛra ba baah aa di he nɛɛ kohona la bwa, sihiih ɛɛ kpo baa ba baŋa ɡole. Nɛra baa ŋɔ bá yo heyaa la, ɛɛ serewoo dɛ́ tonɛ.

¹² Hɛɛ ɡaaɡe he dɔma bɔree, kɛ haa ban na. Nɛra baa kpɔ yoi pu heyaa ɛɛ serewoo.

¹³ Menee Korowii haa dɛ tom mɛ, mɛɛ tɛ heyaa bokpeɡa. N dɛ ŋɔ he be ŋɔ, ‘He bɛ ɔmɛ, mɛɛ cha heyaa.’ ”

¹⁴ Korowii ŋɔ, “Israel tena, haa kanɛ, haa kpeɡe. He bɛ ɔmɛ, mɛɛ cha heyaa. Men Israel Nɛŋɡoroŋ maa ɛ he Lɛɛ laanee ŋɔa.

¹⁵ Hé na, mɛɛ ɛ heyaa kɛŋɔ kon baa kpɔa dɛɛ erɛ boyu onfale o do nyɛɡre, ásɛ he kuuɡi bwejaŋa dɛ́ paɡra, dɛ́ bur deŋɡarere kɛŋɔ tutuɡ ken.

¹⁶ Hɛɛ palaa ásɛ peu kpɔa kaa, peujen lɔa merɛ. Kɛ he te sie ɛɛ lɛ Korowii nɛɛ, ásɛ dɛ kpɛɛ men Israel Nɛŋɡoroŋ la.

¹⁷ Nyaara ne banɔ la ba waa aa suma ɛɛ ba nyin nee dɛ́ nyɔ kahonɛ ba lobi hol, men Korowii ɛɛ no ba wesoŋaa tɛɛ ba. Menee Israel tena ɛɛ tomɛ, maa ban ta.

¹⁸ Mɛɛ ɡeloo nee palɛ le bwejena aa hola dor, dɛ́ ɡel fɛlembɔɔne bule ne. Mɛɛ beɡre pua hɛŋle ɡbo harɛɛ ó ɛ kataŋa, dɛ́ ɡel harɛ waa do kpakee bule ne.

¹⁹ Mɛɛ ɡeloo peleme ne akaasia ne mɛtel ne ɔleve daa le pua hɛŋle ɡbo harɛ ta. Mɛɛ ɡeloo kɔr bini daa le harɛ waa wola were tɛ komɛlbwa ta,

²⁰ ásɛ nomɛlbwa na dɛ́ lii dɛ́ no a mun kɛŋɔ men Korowiirii ɛa, dɛ́ jemɛ kɛŋɔ Israel Nɛŋɡoroŋ laanee taa.”

²¹ Korowii, Israel tena kooro la ŋɔ, “Hé kpɔ he waa ba, dɛ́ ba baɡle ɡɛ aa ɛa he kon do som.

²² Hé ba he voɡa ne á baɡle waa aa dɛ ba chiɡa kerekere, ásɛ dɛ a baa chiɡ aa ya jemɛ, dɛ́ baɡle waa aa chiɡa saŋ la, ásɛ ya nyiŋi a bini dɛ́ no a mun.

²³ Hé ɡel a baɡle yaa waa aa lɔ le kerekere, ásɛ ya jemɛ kɛ a ɛ voɡa kpela. Hé ɡel á ɛ waa aa ɛ wedɛɛɡa kɛɛ wechɔɡa ásɛ ya bwara yɔr ya ɔmɛ.

²⁴ Voɡa la ta komɛlbwa ɛɛ, asɛ a we-ɛɛla ɡe ɛ wepuu. N kii nɛra baa dɛ toma la ne ba voɡa.

²⁵ N le nomɛl o le weekaŋle nyunduabɔr. Wee leebɔree o so dɛɛ tom mɛ. Wɛɛ tiɡri koranar nɛɛ kɛŋɔ demamaa yon dɛɛ ɡbɛr teera, kɛɛ vimamaa yon dɛɛ charame choh la.

²⁶ He bini ume voɡee bola bil wubwa kɛŋɔ waa nɔ ɛɛ chiɡuu ásɛ ya jemɛ kɛŋɔ o dɛ bol kasinteŋ ɔ? Voɡ bɛlbwa toole dɛ bol ɡɛ waa nɔ. Nomɛlbwa ta an noɛ le he be bwa.

²⁷ Men Korowiirii tɔ sie bol amanesoma la Jerusalam tena be. Men tomɛ torome ŋɔ ó ka bol ba be.

²⁸ N nyiŋi voɡa la bini, dɛ a bɛlbwa toole dɛ́ won baɡle waa la, a bɛlbwa toole dɛ́ won chaŋe waa la.

²⁹ Na, a bwa ɛ neɡra! A we-ɛɛla bwa ɛ pɛɛpɛɛ. A do kɛŋɔ peu ken, komɛlbwa toole a be.”