Aesaya 39 - mzwDBL

Toroma baa le Babelɔn harɛ ta wa

¹ A ɡɛ saŋ dɛ Babelɔn harɛ ta kooro bɛl sɔne Mɛrɔdak Baladan, o mɛɛ sɔne Kooro Baladan. Kooro Mɛrɔdak Baladan aa no Kooro Hɛsɛkea weela waa la, o chwerɛ tɔne dɛ kpɔ koŋkɛɛla ja tomɛ ŋɔ, bá kpɔ ka tɛo.

² Kooro Hɛsɛkea lɛ toroma la silɛɛ ne, asɛ dɛ kpɔ o kara mun kwaa aa lɔ dem, suuɡapoŋa ne suuɡaswɛm, ne konsɔɔhsoma ne nodɛɛɡa, dɛ o dɔmkwaa ne bela waa dɛ cheɡa bwa baɡ ba. Komɛlbwa toole dɛ do o dem kɛɛ harɛ la ta waa wola ban baɡlɛ.

³ Ate, Korowii keame Aesaya la ka bɔɔ Kooro Hɛsɛkea ŋɔ, “Leperaa ɡɛ nɛra nɔ leɔ? Dɛ́ ba amaneɛ ɔ?” Anee Kooro Hɛsɛkea ŋɔ, “Ba le bojaŋ harɛ bɛl baa dɛ yerɔ Babelɔn ta.”

⁴ Aesaya pɛɛro ŋɔ, “Bɔkwaa ba na he koodem ɔ?” Kooro Hɛsɛkea ŋɔ, “Ba na komɛlbwa aa lɔ n koodem. Komɛlbwa toole n kara mun maa wola kpɔe baɡ ba.”

⁵ Aesaya ŋɔ Kooro Hɛsɛkea be ŋɔ, “Koranar Bwa Kooro ŋɔ,

⁶ Saŋ bɛl dɛ ba ásɛ komɛlbwa waa lɔ he koodem bonɔ ne anɔ la bwa he naanar aa nyina cheɡ ba le fini la bwa Babelɔn tena ba kpɔa kaa ba harɛ ta, komɛlbwa aa ka. Korowiirii ŋɔa.

⁷ Baa larawe he ɡbaɡba naanar la banee kaa, dɛ́ ka fɔɡɛ ba lure, bá do Babelɔn koodem dɛɛ tomɛ.”

⁸ Kooro Hɛsɛkea chaŋe ŋɔ, “Waa haa ɡela n no le Korowii be nɔ wer.” Dɛkalkɛŋɔ, o liiro kɛ wɛɛ dɔ deŋnesɔɔhnaa o kora che kɛrɛdɛ o saŋ.