Aesaya 38 - mzwDBL

Kooro Hɛsɛkea weela wa

¹ Aa ba dɛ la sie la, weela lɔ Kooro Hɛsɛkea wɛɛ ba sewa. Asɛ Emɔɔs bibaa Korowii keame Aesaya la o be dɛ ka ŋɔ, “Waa Korowii aa dɛ bol laanee kɛŋɔ, ɛ he dem ne he wobɛlbwa kɛrɛdɛ, dɛkalkɛŋɔ haa he weela nɔ taa ir, hɛɛ chɔ he banɔn taa!”

² Ate, Kooro Hɛsɛkea berɛ o sie chaɡɛ danjwɛ, dɛ soŋe Korowii ŋɔ,

³ “N Naa Korowii, n poori, lii ɡɛ maa ta tea bwa tɛɛ, dɛ tomɛ kasinteŋ ne, dɛ ɛ waa haa dɛ nyin.” Dɛ wi lokua ne kohona.

⁴ Anee Korowii berɛ ŋɔ Aesaya be ŋɔ,

⁵ ó berɛ, dɛ́ ka ŋɔ Kooro Hɛsɛkea be kɛŋɔ, “Men Korowii he nabaa Devid fa aa tomɔ la, n no he wesoŋa, dɛ na siniire aa dɛ yɔɔre. Mɛɛ kpɔ bene fi dɛ anuee ja he mkpa ta.

⁶ Mɛɛ lɛ he ne bwɛjen Jerusalam tenaa, ásɛ Asiiria koojen bɛ won pɔ he nɛ. Mɛɛ kpɔ nɔnee tɔ bwɛɛ nɔ ta.”

⁷ Aesaya ŋɔ, “Korowii ɛɛ ɛ waanee á baɡle kɛŋɔ wɛɛ ɛ waa waa baɡɛ nyoa laanee.

⁸ Wɛɛ ɡeloo wee chunchule kaa mun ta, ásɛ chunchule ka dawɛ kon Kooro Ahas aa mao dɛ che o ta teeh dɛɛ jo dea la naɡale fi kon la ta.” Waa bol ɡɛ la, wee berɔ kaa mun ta, chunchule la ka dawɛ naɡale fi kon la ta.

⁹ Juda harɛ ta Kooro Hɛsɛkea aa ɡbaŋra habɔɔ la, o chwerɛ jam yel.

¹⁰ “N liiro kɛŋɔ n ta n saŋ tele, dɛɛ ba sewa. N cheɡɛ lalabwɛɛ doonyoa, dɛ n fe aa lii kɛŋɔ mɛɛ dɔ mkpaa.”

¹¹ N ŋɔ, “Maa Korowii na harɛ nɔ ta kpa, kɛɛ dɛ́ na nɛra ba soɡe harɛ nɔ ta.

¹² Ba lɛ me mkpa le harɛ nɔ ta, kɛŋɔ baa boŋi tɛnte dea baa baŋro. Gɛ yasɔɔh yon sɔh yal tonɛ dɛ́ laa teŋe la, ɡɛɛ n ɡe ɛɛ ba teŋa sewɛ. N liiro ŋɔ Korowii fe lɛ me mkpa tonɛ.

¹³ Jwaana bwaa n kpɔ weweele bini dɛ wi, a do kɛ nyujente aa dɛ paɡre n hoɡa ken. N liiro ŋɔ Korowii fe lɛ me mkpa tonɛ.

¹⁴ N wio n taa do jeɡaa kɛŋɔ kweah aa dɛ si ken. N ha sie nyiŋi nyundua dɛ ba koh. N Naa Korowii, ba lɛɛ mɛ le n wenaale bwa maa dɛ na nɔ ta.

¹⁵ Ń bol ameo? Korowiirii bol a waa n be, dɛ ɡbaɡba berɛ ɛa. Suna aa lɔ n bambile bini nomanta, maa won dom chɔ.

¹⁶ N Naa Korowii, anɔ bwa taa nɛwɛnyina mkpa do, a taa n ɡe mkpa do. Gel n ɡbaŋre, ásɛ dɛ dɔ n nyu.

¹⁷ N weweele ɛɛ ber mɛ deŋnesɔɔhnaa. He cheɡɛ he nyina ta, dɛ lɛɛ mɛ le wekpeɡa a fe aa dɛ ba n nɛɛ bala ta, dɛ kpɔ n wechɔɡa bwa kɛ mɛ.

¹⁸ Nɛra baa lɔ lalabwɛɛ aa won kpɛɛre, serewe aa won ɡo yel kpɛɛre. Nɛra baa lɔ lalabwɛɛ aa won hwɛɡɛ he waa aa dɔ kasinteŋ la ta.

¹⁹ Weeraa dɛɛ kpɛɛre ɡɛ maa dɛ kpɛɛre fini nɔ. Eehnanar dɛ bol he kasinteŋ waa ba bii be.

²⁰ Korowii ɛɛ lɛɛ mɛɛ, ásɛ ya lɔ janjela dɛɛ ɡo yela o Dea, ya soɡa bini bwa.”

²¹ Aesaya bol Kooro Hɛsɛkea be wubwa ŋɔ, bá ka toɡri fiɡ nɔna dɛ́ nama dɛ́ kpɔ dɛɛ marɛ Kooro Hɛsɛkea ɔr la ta, ásɛ o ɡbaŋre.

²² Kooro Hɛsɛkea bɔɔrɔ ŋɔ, “Bɔkwa waa dɛ́ baɡle kɛ mɛɛ la Korowii Dea nyundua belaa yɔ?”