Aesaya 37 - mzwDBL

Aesaya jae waa ja Kooro Hɛsɛkea

¹ Kooro Hɛsɛkea aa no waa la, o ɡe laa o yal waa tɔɔ la kɛɛ, dɛ ka kpɔ lweyal tɔ dɛ ka jo Korowii Dea.

² O tomɛ Eliakim waa dɛ nyiŋi koodem waa ta, ne Sɛbna waa ɛ karake, dɛ bela sɔfore nomonome ba ɡe aa tɔ lweyale ŋɔ, bá la Emɔɔs bibaa Korowii keame Aesaya be.

³ Waa waa kpɔa tɛ ŋɔ ba ka ŋɔ Aesaya be laanee kɛŋɔ, “Wahala ne deŋnetɛra ne sihiih tɔperee fini. Ya do kɛŋɔ haah loltea aa lɔɔ o ɡwɛɡre waa wola won lolɛ la ken.

⁴ Asiiria koojen tomɛ o laa sitɔɔla nomoa, ó ba chɛɡre Korowii waa lole saŋ bɛlbwa la. N dɛ soŋe Korowii haa dɛ tomɔ kɛ, ó tɛr a ɡɛ nɛra la deŋne a wa. Anomanta, soŋe Korowii tɛ ya nɛra ya taa kaa nɔ.”

⁵ Kooro Hɛsɛkea toroma la aa ba Aesaya be la,

⁶ anee o ŋɔ ba be ŋɔ, “Hé ka ɡel he dɔɔ no kɛŋɔ Korowii ŋɔ, ‘Bɛ Asiiria koojen waa la ɔmɛ kɛŋɔ maa won lɛ heya.

⁷ No, mɛɛ ɡeloo koojen la no waane aa ɛ ɔmewa, ásɛ a ɡel o berɛ kaa o harɛ ta, ásɛ Korowii ɡel bá ka kpoo kere ne.’ ”

⁸ Asiiria laa nomoa la noɔ kɛŋɔ, Asiiria koojen ne o laa tena le Lakes, dɛ kaa yo bwɛjen Lebna tena baa bɛn ba, asɛ o ir la koojen la be bela.

⁹ Belaa Asiiria koojen no kɛŋɔ, Ijipt Kooro Tirhaka waa le Itiopia ne o laa tena dɛ ba ba yoo. Anomanta, o chwerɛ tɔn, dɛ kpɔ tomɛ toroma Juda Kooro Hɛsɛkea be ŋɔ,

¹⁰ “Bɛ he Korowii haa dɛ tomɔ, dɛ kpɔ he te dawɛ o nɛɛ la neɡre kɛŋɔ, Asiiria koojen la aa won yo lɛ Jerusalam.

¹¹ A lole kɛŋɔ he no ɡɛ Asiiria koojen bɛlbwa aa ɛ harɛre nɔ bwa, dɛ chɔɡa kwaraa. He te ɛɛ won le a nyoa aa?

¹² N naawa yo harɛre nɛra bane baa le Gosan ne Haran ne Rɛsɛf, dɛ chɔɡ ba harɛre, dɛ kpoo Bɛt Eden tena baa soɡe Tɛl Asa, ba voɡare wono lɛɛ ba aa?

¹³ Leperaa bwɛjena Hamat ne Aapad ne Sefavaim dɛ Hena kɛɛ Iva koranar dɔɔ?”

Kooro Hɛsɛkea wesoŋa

¹⁴ Ate, Kooro Hɛsɛkea lɛ tɔn la dɛ kure, dɛ kpɔ la Korowii Dea, dɛ ka laa paɡri bil Korowii sie.

¹⁵ Asɛ dɛ soŋe Korowii ŋɔ,

¹⁶ “N Naa Koranar Bwa Kooro, Israel tena aa dɛ tomɛ, he so kena kwaa Kerobim doa. Korowii bɛlbwa toole ka ja he nɛ dɛɛ nyiŋi harɛre bwa ta. Henee ta nyundua ne harɛ.

¹⁷ Ir nyu ne, dɛ́ no n wesoŋa nɔ, no waa Koojen Senakerib aa ba a ne, dɛ baa chɛɡre hen Korowii haa lole saŋ bɛlbwa nɔ.

¹⁸ A ɛ kpela, Korowii, kɛŋɔ Asiiria koojena yo harɛre ɡalɡa nɛra, dɛ chɔɡ ba harɛre a chɔ pɛɛpɛɛ.

¹⁹ Ba pa ba voɡare do nii ta a fuh, dɛkalkɛ a ɛ daa ne bwea nɛn aa sɛah.

²⁰ Korowii yaa dɛ tomɛ, lɛ yaa le Asiiria koojen Senakerib nɔn ta, ásɛ harɛre bwa nɛra jemɛ kɛŋɔ he ɡboo Korowii.”

Kooro Senakerib chola waa chola wa

²¹ Ate, Emɔɔs bibaa Korowii keame Aesaya kpɔ kala tɛ Kooro Hɛsɛkea ŋɔ, “Waa Korowii Israel tena aa dɛ tomɔ aa dɛ bol laanee kɛŋɔ, o no Asiiria koojen Senakerib wesoŋa haa soŋo la,

²² Korowii ŋɔ, ‘Jerusalam waa do kɛ bechatolo, waa wola baa jemɛ la hah hen Koojen Senakerib, dɛɛ nyiŋi he nyubaah.

²³ Koojen Senakerib, umee hɛɛ lii he nyu bini kɛ onee hɛɛ chɛɡre dɛɛ ɛo nɛnhɛla nɔɔ? Men Israel Nɛŋɡoroŋ laanee hɛɛ ɛ sisawaa la.

²⁴ He tomɛ he toroma ba ɛ mbarafo baɡ mɛ ŋɔ, he wono kpɔ torɔɡore teeh kaa bwejena aa lɔ Lɛbanɔn dor. He ŋɔ belaa he teŋni peleme daa aa jaŋa kohona, ne dadɛɛɡa bwa soo siwi, dɛ jo kaa kɔr la baah tenten.

²⁵ He ɛ mbarafo ŋɔ, he kwi buli harɛfala ta, dɛ nyɔ a bini nee bela. Dɛ ŋɔ he laa tena nakpale ɡbo ɡelɔ Ijipt Nael Moo hweeh.

²⁶ He ta noɛ kɛ saŋ la bwaa n le vɔrɔwa bil kɛɛ? N tɛɛ kpeɡri he ɡel bwɛɛre danjwɛkpeɡa aa bara kuuɡi, dɛ berɛ dimɡbeeni.

²⁷ N ɡelɔ a nɛra bwa ɡwɛɡre, ba bwara yɔr ba di sihiih. Ba ɛo kɛŋɔ kpɔɡa aa lɔ koo ta, kɛɛ kpɔɡa aa lɔ lɔɡ doa, asɛ wee leebɔr peu chɔɡe yon ta a sewɛ la ken.

²⁸ N jemɛ he wobɛlbwa bini, he laŋa ne he bala bwa, ne he deŋnekpeɡ we-ɛɛla haa dɛ ɛɛ mɛ.

²⁹ N no he deŋnekpeɡ we-ɛɛla, ne he mbarafo haa dɛ ɛ, a chole n deŋna ta. Mɛɛ kpɔ ɡoŋaa do he mee ta, dɛ́ kpɔ kabaɡrare do he nyoa, dɛ́ berɛ kpɔe kpɔ ŋwɛnɛ haa kpɔ o ta ba la ta kaa.’ ”

³⁰ Ate, Aesaya ŋɔ Kooro Hɛsɛkea be ŋɔ, “Waa aa che a ta, n naa Kooro Hɛsɛkea, he jemɛ laanee nɔ. Koo kwaa baa koma bena nɔ la, ane ɛɛ le a buɡ taa, ásɛ he dia, ásɛ benanyoa chemaa, hé di a tenten. A bentooro te la, hé du mea dɛ́ koma, dɛ́ parɛ daa kooni, dɛ́ di a nɔna.

³¹ Nɛra baa ka, dɛ́ le Juda dea la ɛɛ doo kɛŋɔ, daa waa ta lune kaa bini, dɛ won nɔna la ken.

³² Bane ɛɛ kao dɛ́ do Jerusalam Saayɔn Bwejen ta. Nemenɛ Korowii ɛɛ do siee, dɛ́ ɛ anɔ bwa.”

³³ Asiiria koojen waa Korowii aa bola laanee nɔ. “Waa bwɛjen nɔ taa dɔ jo, á ba ɛ kɛŋɔ wɛɛ ta hɛm bonɔɔ. Waa konee kpɔ tɔ o te ɡbemɡbe dɛ́ ba o doonyoa, kɛɛ dɛ́ ma kon waa che o ta teeh jo o bini dɛ́ yo.

³⁴ Ŋwɛnɛ waa kpɔ o ta ba la, wɛɛ berɔɔ kpɔ o ta kaa waa wola won jo bwɛjen nɔ ta. Men Korowiirii bola.

³⁵ Mɛɛ tɔ bwɛɛ nɔ ɡbemɡbee dɛ́ lɛo, n jirima ne nyoa maa baɡɛ n bonɔɔ Devid nomanta!”

³⁶ Ate, awola jwaana, Korowii nyundua torome la bela Asiiria laa tena aa lole la, dɛ ka kpoo ba bini kaɡboŋa lafa fifraanuatoro dɛ banue. Nɛra iro chɔɔ, dɛ ba na ɡɛ nɛra la aa serewa chɔ bobɛlbwa.

³⁷ Aa ba ɡɛ la, Asiiria koojen Senakerib ɡel laa la yoi, dɛ ir ka so Asiiria bwɛjen Niniwe. Dɛ belaa ɛ koojen soŋnibɔr.

³⁸ Awola bɛl, o ka dɛ tu voɡa o voɡ Nesrɔk dea, asɛ o bibaala banɛ, Adramɛlɛk ne Saresa ka kpoo kere ne, dɛ chwa kaa Ararat harɛ ta. Asɛ o bibaa Esaahadon chiɡ o naa ta, dɛ di kora.